Awıl xojalıǵı kárxanalarınıń atız shetlerindegi jer maydanlarında ónim jetistiriw sistemasın jetilistiriw ilajları haqqında

Ózbekstan Respublikası Prezidentiniń qararı

Respublikamızdaǵı fermer xojalıqlarınıń atız shetlerindegi jer maydanların ózlestiriw, olarda awıl xojalıǵı ónimlerin jetistiriw hám olardıń isenimli satıp alınıwın shólkemlestiriw jumısların sistemalastırıw, bul sistemaǵa ayrıqsha juwapker shólkemdi biriktiriw sonday-aq, atız sheti jer iyelerin qarjılay qollap-quwatlaw maqsetinde:

1. Respublikamızdaǵı fermer xojalıqlarınıń atız shetlerinde 58,9 mıń gektarǵa shamalas maydanlar házirgi kúnde jer iyeleri tárepinen tolıq paydalanılmay atırǵanı Awıl xojalıǵı ministrligi tárepinen anıqlanǵanlıǵı maǵlıwmat ushın qabıl etilsin.
2. Awıl xojalıǵı ministrligi janındaǵı Awıl xojalıǵında xızmetler kórsetiw agentligine (keyingi orınlarda – Agentlik) fermer xojalıqlarınıń atız shetlerin ózlestiriw, olarda ónimler jetistiriw hám jetistirilgen ónimlerdiń isenimli satıp alınıwın shólkemlestiriw wazıypası júklensin.
3. Agentlikke:

atız shetlerinde jumıslardı durıs hám sapalı shólkemlestiriw, jer iyelerine egiwden baslap ónimdi realizaciyalawǵa shekemgi dáwirde ámeliy járdem beriw ushın 2023-jılı hár bir rayonǵa 4 ewge shekem, jámi 672 ge shekem máwsimlik agronomlardı jumısqa qabıllawǵa ruqsat berilsin; Awıl xojalıǵı ministrligi janındaǵı Ovoщ, palız eginleri hám kartoshka jetistiriw ilimiy-izertlew institutı hám Akademik M.Mirzaev atındaǵı baǵshılıq, júzimgershilik hám vino jetistiriw ilimiy-izertlew institutı biriktirilsin. Agentlik sistemasındaǵı shtat birlikleri sheńberinde awıl xojalıǵı kárxanalarınıń atız shetlerindegi jer maydanlarında ónim jetistiriw sistemasın engiziwge juwapker bolǵan direktor orınbasarı shtatı engizilsin. Máwsimlik agronomlardıń 2023-jıldaǵı miynet haqıların tólewge baylanıslı qárejetler alınǵan byudjet ssudası hám awıl xojalıǵı ónimlerin jetistiriwshilerge berilgen kreditler procent stavkası arasındaǵı ayırmashılıq nátiyjesinde Agentlik erkinde qalatuǵın qarjılar esabınan qaplanatuǵını belgilensin.

4. Agentlikke biriktirilgen ilimiy-izertlew institutlarına tómendegi wazıypalar júklensin:

fermer xojalıqlarınıń atız shetlerinen paydalanıw nátiyjeliligin arttırıw boyınsha ilimiy tiykarlardı islep shıǵıw, ovoщ, palız hám kartoshka eginleri selekciyası jetiskenliklerin hár bir aymaqtıń klimat sharayatlarınan kelip shıǵıp qollanıw; fermer xojalıqlarınıń atız shetlerinde awıl xojalıǵı eginlerin jetistiriw, ónimin saqlaw, olardı kesellik hám zıyankeslerden qorǵawdıń nátiyjeli, úylesimli innovaciyalıq usıllardı engiziw boyınsha usınıslar islep shıǵıw hám hár bir rayonda seminar hám treningler ótkerip barıw.

5. Ózbekstan Respublikası Prezidentiniń 2023-jıl 5-apreldegi «2023-jılı awıl xojalıǵı ónimlerin islep shıǵarıw, qayta islewdi keńeytiw hám qollap-quwatlawdıń qosımsha ilajları haqqında»ǵı PQ-113-sanlı qararı sheńberinde Agentliktiń Baǵshılıq hám ıssıxana xojalıǵın rawajlandırıw qorına 2023-jılı ajıratılıwı názerde tutılǵan 400 milliard sum byudjet ssudası esabınan 100 milliard sum jıllıq 10 procentlik stavkada tómendegi maqsetler ushın jumsalatuǵını belgilensin:

atız shetin ózlestiriw hám ónim jetistiriw ushın zárúr bolǵan tuqım, náller, mineral tóginler, ximiyalıq preparatlar, materiallıq-texnikalıq resurslar menen támiyinlew; suw menen támiyinlew ushın nasos hám qubırlardı ornatıwǵa qarız shártnaması tiykarında, naq pul túrinde awıl xojalıǵı kárxanaları hám atız shetiniń jer iyelerine 6 ayǵa shekem jeńilletilgen dáwir menen 12 ay múddetke jıllıq 14 procentlik stavkada qarız ajıratıw. Onda berilip atırǵan qarız qarjıları alınıp atırǵan dáramattıń 50 procentinen artıp ketiwi múmkin emes. Usı qarar sheńberinde Agentlik tárepinen talabanlardıń eń jaqsı usınısların tańlaw usılı arqalı qarız qarjıları olardıń qaytarılmay qalıw qáwpin qamsızlandırıw boyınsha qamsızlandırıw polisi berilgennen soń ajıratılatuǵını belgilensin. Agentlikke atız shetlerine kredit tiykarında nasos hám qubırlardı ornatıp, suw menen támiyinlew ilajların kóriw ushın úsh tárepleme shártnama tiykarında kárxanalardı tartıwǵa ruqsat berilsin.

6. Ózbekstan fermer, diyqan xojalıqları hám qıytaq jer iyeleri keńesi (A.Xaitov) keptiriw cexı hám suwıtqıshlı qoymaxanlardı satıp alıwǵa Fermer, diyqan xojalıqları hám qıytaq jer iyelerin qollap-quwatlaw qorınıń esabınan 50 milliard sum qarjı ajıratsın.

Bul qarjılar Fermer, diyqan xojalıqları hám qıytaq jer iyelerin qollap-quwatlaw qorı tárepinen: awıl xojalıǵı kárxanalarına 36 ayǵa shekemgi jeńilletilgen dáwir menen  84 ay múddetke jıllıq 14 procentlik stavkada ajıratılsın. Onda, kredit summasınıń 60 procenti boyınsha girew támiynatı sıpatında ornatılatuǵın keptiriw cexı hám suwıtqıshlı qoymaxanalar alınıwı, 40 procenti boyınsha girew támiynatı sıpatında olardıń qaytarılmay qalıw qáwpin qamsızlandırıw boyınsha qamsızlandırıw polisi alınatuǵını belgilensin; intakerlerge keptiriw cexı hám suwıtqıshlı qoymaxanalar ornatıp berilgennen soń ónim jetkerip beriwshiniń esap betine ótkerip beriw shárti menen ajıratılsın.

7. Shańaraqlıq isbilermenlikti rawajlandırıw baǵdarlamaları sheńberinde awıl xojalıǵı jerleri átirapında kollektor-drenaj tarmaqları bolǵan fermer xojalıqlarına salmadaǵı suwlarda 200-250 bastan úyrek baǵıw hám palhárreleri uyasın shólkemlestiriw ushın jıllıq 14 procentlik stavkada jeńilletilgen kreditler ajıratılsın.
8. Fermer xojalıqlarınıń atız shetinde egiletuǵın egin hám jetistiriletuǵın awıl xojalıǵı ónimleri, baǵılatuǵın qus hám palhárre uyaları sonday-aq, suwıtqıshlı qoymaxana hám keptiriw úskenelerin jaylastırıw boyınsha prognoz kórsetkishleri 1-4.13-qosımshalarǵa muwapıq tastıyıqlansın.
9. Paydalanılmay bos turǵan atız shetleri hám kollektor-drenaj tarmaqları átiraplarındaǵı awıl xojalıǵı eginleriniń jer maydanlarında ónimlerdi jetistiriw ushın 5-qosımshaǵa muwapıq tiyisli ministrlikler hám uyımlardıń basshılarına wazıypalar júklensin.
10. Sırdárya wálayatı hákimligi, Awıl xojalıǵı ministrligi 2023-2025-jılları Sırdárya wálayatında paydalanılmay bos turǵan atız shetleri hám kollektor-drenajlar átiraplarındaǵı 500 gektar maydanda ıqsham «sociallıq ıssıxana»nı shólkemlestirip, «Temir dápter», «Jaslar dápteri», «Hayal-qızlar dápteri»ne kirgizilgen hám miynet migraciyasınan qaytqan puqaralarǵa tayar halda 2,5 sotıxtan ajıratılıwın támiyinlesin.

Awıl xojalıǵı ministrligi «sociallıq ıssıxana» joybarın ámelge asırıwdı qarjılandırıw ushın xalıqaralıq finans institutlarınan 50 million AQSh dolları muǵdarında jeńilletilgen kredit resursların tartsın.

11. Awıl xojalıǵı ministrligi hám Agentlik jıldıń aqırına shekem atız shetlerinde jumıslardı shólkemlestiriwge tartılǵan máwsimlik agronomlardıń unamlı nátiyjesin tallaǵan halda, bul sistemanı keyingi jılları da engiziw boyınsha Ózbekstan Respublikası Prezidenti Administraciyasına tiykarlanǵan usınıs kirgizsin.
12. Ózbekstan Respublikası Prezidentiniń hám Ózbekstan Respublikası Húkimetiniń ayırım qararlarına 6-qosımshaǵa muwapıq ózgerisler hám qosımshalar usınıslar kirgizilsin.
13. Awıl xojalıǵı ministrligi mápdar ministrlik hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
14. Málimleme hám ǵalaba kommunikaciyalar agentligi, Ózbekstan Milliy málimleme agentligi hám Ózbekstan Milliy teleradiokompaniyasına Awıl xojalıǵı ministrligi menen birgelikte usı qarardıń mazmun-mánisi sonday-aq, maqset hám wazıypaların ǵalaba xabar qurallarında keńnen sáwlelendiriw usınıs etilsin.
15. Usı qarardıń orınlanıwın nátiyjeli shólkemlestiriwge juwapker hám jeke juwapker etip awıl xojalıǵı ministri A.B.Voitov, Ózbekstan fermer, diyqan xojalıqları hám qıytaq jer iyeleri keńesiniń baslıǵı A.A.Xaitov, Qaraqalpaqstan Respublikası Ministrler Keńesiniń Baslıǵı hám wálayatlardıń hákimleri belgilensin.

Qarardıń orınlanawın hár sherekte dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikası Bas ministri A.N.Aripovqa júklensin.  

Ózbekstan Respublikası Prezidenti                Sh.MIRZIYOEV