Joqarǵı Keńes Baslıǵı Qaraózek rayonı xalqınıń abadan turmısın támiyinlew baǵdarında ámelge asırılıwı tiyis wazıypalardı belgilep aldı

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev ekinshi márte Qaraózek rayonındaǵı kóshe biyleri menen ushırastı. Atap ótiw kerek, ótken 2022-jılı da Joqarǵı Keńes Baslıǵı kóshe biyleri, rayon belsendileri menen ushırasqan edi. Búgingi ótkerilgen ushırasıw da ashıq-aydın sóylesiw usılında bolıp, kóshe biyleri menen jaqınnan pikirlesildi. Dáslep Joqarǵı Keńes Baslıǵı shıǵıp sóylep, sonǵı jılları húrmetli Prezidentimiz basshılıǵında elimizde ámelge asırılıp atırǵan reformalar, keń kólemli qurılıs-ońlaw hám abadanlastırıw jumısları haqqında keń túrde atap ótti.

Ótkerilgen ushırasıwda usı sıyaqlı xalıqtıń abadan turmısın támiyinlew baǵdarındaǵı turmısqa engizilip atırǵan jańalıqlar, túpkilikli reformalar haqqında keń túrde sóz etildi. Óz náwbetinde kóshe biyleri bul baǵdardaǵı jumıslardı ámelge asırıwda belsendilik kórsetetuǵınlıǵın atap ótip, búgingi kúndegi ózgeris hám jańalanıwlar hár bir máhállege kirip barıp atırǵanlıǵı ushın Prezidentimizge, respublika basshılarına minnetdarshılıǵın bildirdi. Qaraqalpaqstan Respublikasında túrli millet hám elat wákilleri tınıshlıqta, awızbirshilikli túrde tatıw turmıs keshirip kelmekte. Búgingi jetiskenlikler menen bir qatarda, máhállelerde ayırım sheshimin tabıwın kútip turǵan mashqalalar da barshılıq. Joqarǵı Keńes Baslıǵı menen ótkerilgen ushırasıwda kóshe biyleri bul máselelerdi sheshiwde “bir jeńnen qol shıǵarıp” háreket etilse álbette, barlıq mashqalalar óz sheshimin tabatuǵınlıǵın ayrıqsha tilge aldı. Ótkerilgen ushırasıw dawamında kóshe biyleri tárepinen áhmiyetli máseleler hám usınıslar kóterilip, olardıń barlıǵınıń sheshimin tabıw boyınsha Joqarǵı Keńes Baslıǵınıń jeke qadaǵalawına alındı.

Qaraqalpaqstan Respublikası Joqarǵı Keńesiniń Málimleme xızmeti