Shımbay rayonınıń kóshe biyleri Joqarǵı Keńes Baslıǵına bir qatar máselelerdi kóterdi

Kóshe biyleri menen Shımbay rayonı xalqınıń turmıs abadanlıǵın ele de arttırıw baǵdarında wazıypalar belgilep alındı Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev rayon xalqınıń abadan turmısın támiyinlew baǵdarında ámelge asırılıwı tiyis wazıypalardı belgilep alıw maqsetinde Shımbay rayonınıń kóshe biyleri, máhálleler belsendileri menen ushırastı.

  Ushırasıw basında Joqarǵı Keńes Baslıǵı sózge shıǵıp, húrmetli Prezidentimiz basshılıǵında búgingi kúnde elimizde ámelge asırılıp atırǵan reformalar, keń kólemli qurılıs-ońlaw jumısları, xalqımızǵa múnásip sharayat jaratıw baǵdarındaǵı iygilikli baslamalar boyınsha keń túrde atap ótti. Sonday-aq, Prezidentimizdiń Qaraqalpaqstan Respublikasına bolǵan saparında xalqımızdıń turmıs abadanlıǵın támiyinlew baǵdarında berilgen bir qatar wazıypalar, belgilep berilgen ayrıqsha jeńillikler, máhállelerdegi mashqalalardı máhálleniń ózi kóterip, ornında sheshiliwin jolǵa qoyıw maqsetinde hár birine 500 million sumnan qarjı ajıratılǵanı, 47 mıń shańaraqtıń kadastr hújjetlerin, sonıń ishinde, Shımbayda 746 puqaranıń turaq-jaylarınıń xújjetlerin rásmiylestirip beriw, Qaraqalpaqstan boyınsha 4 mıń turaq-jay qurıw sıyaqlı bir qatar áhmiyetli máselelerdi sheship berip ketkeni ayrıqsha sóz etildi. Ushırasıwda Joqarǵı Keńes Baslıǵı tárepinen Shımbay rayonın rawajlandırıw baǵdarında ámelge asırılıp atırǵan ámeliy jumıslar boyınsha da atap ótilip, bul iygilikli baslamalardı ele de dawam ettiriw, xalıq arasındaǵı sheshimin kútip turǵan, eń zárúrli, birinshi dárejeli mashqalalardı sheshiw ushın olardı belgilep alıw maqsetinde kóshe biyleri menen ashıq-aydın pikirlesildi.

  Onda kóshe biyleri xalqımızdıń abadan turmısın támiyinlew baǵdarında Prezident qararları hám pármanları, sonday-aq, mámleketlik baǵdarlamalar sheńberinde bir qatar jıllar dawamında jıynalıp qalǵan mashqalalarǵa sheshim tabılıp atırǵanlıǵı ushın minnetdarshılıǵın bildirdi. Sonıń menen birge, búgingi kúnde ele de sheshimin kútip turǵan ayırım máseleler bar ekenligin atap ótip, Joqarǵı Keńes Baslıǵına óz pikir-usınısların ayttı. Óz náwbetinde Joqarǵı Keńes Baslıǵı tárepinen barlıq mashqalalar tıńlandı hám aldaǵı waqıtta sheship beriw boyınsha wazıypalar belgilep alındı. Ushırasıwda xalıq abadanlıǵı jolında elimizdiń awızbirshiligin saqlap, birgelikte háreket qılınsa hámme maqsetlerge erisiletuǵınlıǵı, barlıq iygilikli ámeller, álbette, óz nátiyjesin beriwi ayrıqsha atap ótildi.

 

Qaraqalpaqstan Respublikası Joqarǵı Keńesiniń Málimleme xızmeti