Bar bolǵan mashqalalardıń sheshimin tabıw boyınsha kóshe biyleri menen jaqınnan pikirlesildi
923
Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalqımız arasındaǵı eń áhmiyetli máselelerdi anıqlaw hám saplastırıw ushın kóshe biyleri menen óz ushırasıwların baslaǵan edi.
Bugin Joqarǵı Keńes Baslıǵı Bozataw rayonındaǵı kóshe biyleri menen pikirlesiw maqsetinde rayonda boldı.
Ázel ázelden xalqımız turmısında girewli ornı, kátqudalıǵı, salmaqlı sѳzi menen awızbirshilikti támiyinlew baǵdarında aqıl násiyatı menen kѳshe biyleri jámiyetimizde turaqlılıqtı támiyinlep kelmekte.
Dáslep, Joqarǵı Keńes Baslıǵı húrmetli Prezidentimiz basshılıǵında búgingi kúnde ámelge asırılıp atırǵan úlken dóretiwshilik jumısları haqqında keń túrde atap ótti.
Ushırasıwda kóshe biyleri menen sheshimin kútip turǵan áhmiyetli máseleler átirapında pikirlesildi.
Kóshe biyleri tárepinen ushırasıwda bir qatar itibardan shette qalıp ketken, biraq, óz sheshimin tappay kiyatırǵan máseleler kóterildi.
Aymaqlardaǵı bar bolǵan mashqalalar búgin yamasa keshe payda bolıp qalmaǵan, al jıllar dawamında jıynalıp kiyatırǵan máseleler esaplanadı. Awızbirshilik penen barlıq mashqalalardı sistemalı sheshiw ilajları kórilip atırǵanı hám bul iygilikli isler ele de dawam ettiriletuǵınlıǵı ushırasıwda atap ótildi.
Óz náwbetinde kóshe biyleri húrmetli Prezidentimiz tárepinen Qaraqalpaqstanǵa kórsetilip atırǵan itibardan minnetdar ekenliklerin bildirdi.
Álbette bunday ushırasıwlar xalqımızdıń tilek hám ótinishlerin úyreniw, olardı ámelge asırıwda oǵada áhmiyetli bolıp, búgingi ushırasıwda da bir qatar áhmiyetli máseleler átirapında pikirlesildi.
Qaraqalpaqstan Respublikası Joqarǵı Keńesiniń Málimleme xızmeti