Prezident saparınan soń… Hár bir máhálle ózinde eldiń sırın saqlaydı. Sırdı biliw bolsa júdá ańsat – onıń menen tanısıw jeterli. Onda hámme nárse ashıq-aydın. Barlıǵı kóringenindey. Bul jerde xalıqtıń keypiyatı, dasturxanında ne bar-joqlıǵı, mámlekette qanday ózgerisler bolıp atırǵanı anıq kórinip tur. Mámleketimiz basshısınıń aymaqlarǵa saparları dawamında máhállelerdi aylanıwı dástúrge kirgeni xalıqqa unamlı bolıp atırǵanı da sonnan dárek beredi. Prezidenttiń Nókis qalasındaǵı Altın jaǵıs máhállesindegi saparın sáwlelendirgen jurnalistler qatarında bizler de bar edik. Sol waqıtları barlıǵı júdá qızǵın ótken edi. Jasıullılar, belsendiler, jaslar mámleketimiz basshısına óz máhállesindegi ózgerislerdi aytıp berdi…. Buǵan sál keyinirek hár tárepleme toqtap ótemiz. Házir bolsa Nókistegi máhállelerde alıp barılıp atırǵan jumıslar, ózgerislerge toqtap ótiwdi orınlı dep bildik. Ótken jılı Jańabazar hám Shımbay gúzarı máhállelerin abat mákanǵa aylandırıwǵa kirisildi. Onıń ushın barlıq mámleketlik uyımlar hám shólkemler bir jaǵadan bas shıǵardı. Xalıqtıń jasaw sharayatın jaqsılaw, máhálle infrastrukturasın jetilistiriw, mánzillerdi abat etiw boyınsha awızbirshilik penen isledi. Bul iygilikli baslama búgin Nókis qalasınıń barlıq máhálleleri boylap keńnen en jaydırılǵan. Jańabazar – Nókis qalasınıń shetki bóliminde, sahra qumları arasında jaylasqan máhállede. Bul jerdiń ózine jarasa mashqala hám qıyınshılıqları kóp edi. Uzınlıǵı 850 metrlik Temir jol jaǵası kóshesiniń boyında 36 turaq jay jaylasqan. Bul turaq jaylardıń qıytaq jerleri tártipke keltirildi. Jigirmadan artıq úy ońlandı, ayırımlarınıń tóbesi shiferlandı. Kóshe boyı arnawlı texnikalar járdeminde tegislendi. Piyada hám avtotransportta háreketleniw ushın qolaylıq jaratıldı. Máhállede bunday 40 úlken-kishi kósheler bar. Hár bir kóshede mine usınday ózgerisler boldı. Bul arqalı pútkil máhállede qanday jańalanıw bolǵanın kóz aldımızǵa keltiriw qıyın emes. Shımbay gúzarı máhállesiniń aymaǵına adamlar bunnan jigirma jıllar aldın jaylasıp baslaǵan. Sol waqıtları úyler rejesiz qurılǵanı aqıbetinde kósheler tártipsiz túsken. Sonday-aq, elektr energiyası hám ishimlik suwı jetispewshiligi awır mashqalalardan biri edi. On tórt mıńnan aslam xalıq jasaytuǵın bul máhálle «Abat máhálle» baǵdarlamasına tústi. Búgin bul jerdegi onlanǵan kósheler, piyadalar jolı kózdi quwantadı. Transformatorlar, zıyan kórgen baǵanalar jańasına almastırıldı. Elektr tarmaqları menen baylanıslı mashqalalar saplastırıldı. Salmalar tazalanıp, kóplegen terekler egildi. Aymaqta jeńil konstrukciyadan toqımashılıq kárxanası shólkemlestirildi. Nátiyjede 300 den aslam hayal-qız turaqlı jumıs ornına iye boldı. Prezidentimiz ótken jılı bul jerde islenip atırǵan jumıslar menen tanısıw maqsetinde máhállege kelgen edi. – Prezidentimiz hár saparı Qaraqalpaqstanǵa baslamalar, jańa ideyalar, kútilmegen jańalıqlar menen keledi,-deydi Qaraqalpaqstan Respublikası kámbaǵallıqtı qısqartıw hám bántlik ministri Saǵındıq Turmanov. – Bul retki saparında da usı dástúr boldı. Atap aytqanda, Qaraqalpaqstandaǵı 452 máhálleniń hár birine tikkeley 500 million sumnan qosımsha qarjı ajıratılıwı úlken jańalıq boldı. Onıń ushın óz aldına Qaraqalpaqstan máhállelerin qollap-quwatlaw qorı shólkemlestirilip, oǵan usı jılı 250 milliard sum qaratılıwı kishi jumıs emes. Sonday-aq, kadastrı joq 38 mıń turaq jay hám kóshpes múlk boyınsha tiyisli hújjetler islep beriletuǵın boldı. Bunnan tısqarı, Qaraqalpaqstandı «jumıssızlıqtan awlaq aymaq»qa aylandırıw, azıq-awqat qáwipsizligin támiyinlew, sociallıq infrastrukturanı jaqsılaw máselelerine ayrıqsha itibar qaratıldı.

Prezidentimizdiń 2022-jıl 25-oktyabrdegi «2022-2023-jılları máhálleler infrastrukturasın jáne jaqsılaw boyınsha qosımsha ilajlar haqqında»ǵı qararınıń qabıl etilgenin atap ótiw kerek. Bul hújjet tiykarında Aralboyında 252 máhállede bir qatar ishki jollar, ishimlik suwı, elektr energiyası hám gaz támiynatı, bilimlendiriw, densawlıqtı saqlaw, mádeniyat, sport hám basqa da infrastrukturalıq obektte qurılıs-ońlaw jumısların alıp barıw belgilengen. Aymaqta hújjettiń orınlanıwı boyınsha keń kólemli jumıslar alıp barılmaqta. Aytılǵanınday, Altın jaǵıs máhállesine qaytamız. Bul jerde 4 mıńnan aslam xalıq jasaydı. Mánzilli jumıslar Altın jaǵısta da óz nátiyjesin bermekte. – Jaqınǵa shekem bul jer transport quralları keliwi qıyın, kommunikaciya tarmaqları kemis jer edi,-deydi máhálle baslıǵı Nigargúl Gobenova. – Ótken jılı bul jer «Abat máhálle» baǵdarlamasına kirgizilip, keń kólemli qurılıs hám abadanlastırıw jumısları alıp barıldı. Jol, elektr energiyası, ishimlik suwı hám gaz tarmaqları jańalandı. Máhálle imaratı jańadan qurılıp, onıń átirapında balalar maydanshaları, medicinalıq punkt, isbilermenlikke járdemlesiwshi oray, sawda shaqapshası shólkemlestirildi. Zamanagóy sport kompleksi qurıp pitkerilmekte. Bunday bir pútin kompleks xalıqqa qolaylıq jaratadı. Mámleketimiz basshısı máhálledegi ózgerislerdi kózden ótkerdi, súmelek seyilimizde qatnastı. Shańaraqlarımızdan birinde iftarlıq etti, xalıqtıń dasturxanın óz kózi menen kórdi. Bul ózgerisler ushın bárshemiz Prezidentimizge raxmet ayttıq. Máhálleniń jeri ónimdarlı emes. Xalıq tiykarınan xızmet kórsetiwdi jolǵa qoyıw arqalı dáramat aladı. Máhállede turmıslıq xızmet kórsetiw shaqapshaları, tigiwshilik kárxanaları, nanbayxana, mebel ustaxanaları hám avtomobillerge texnikalıq xızmet kórsetiw ustaxanaları kóp. Keleshekte qoyan jetistitiriw hám balıqshılıqtı rawajlandırıw rejelestirilmekte. Tınıshlıq hám awızbirshilik bar jerde mánziller abat bola beredi. Aralboyında ámelge asırılıp atırǵan iygilikli baslamalar bolsa xalqımızdıń turmıs tárizin jaqsılaw, turmıstan razı bolıp jasawına tiykar boladı.