Joqarǵı Keńes Baslıǵı nuranıy, aqsaqallar hám kóshe biyleri menen másláhátlesip, aldaǵı wazıypalardı belgilep aldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev máhállelerdegi sheshimin kútip turǵan birinshi dárejeli sheshiliwi kerek máselelerdi belgilep alıw maqsetinde Kegeyli rayonındaǵı kóshe biyleri, nuranıylar hám bir qatar belsendiler menen ushırastı. Onda dáslep Joqarǵı Keńes Baslıǵı shıǵıp sóylep, húrmetli Prezidentimiz basshılıǵında elimizde ámelge asırılıp atırǵan reformalar, máhálllelerdegi keń kólemli abadanlastırıw jumısları, puqaralardıń búgingi turmısınan razılıǵın támiyinlew baǵdarındaǵı ámeliy baslamalar haqqında keń túrde atap ótti.

  Sonday-aq, Prezidentimizdiń Qaraqalpaqstan Respublikasına bolǵan saparı dawamında respublikamızǵa ayrıqsha berilgen imkaniyatlar, jeńillikler hám múmkinshilikler haqqında keń túrde aytıp ótildi.

«Awılımnıń ǵarrıların súyemen,

Hár sózine bererem bir túyeden,

Hár birinde Jiyrensheniń aqılı,

Qaltasında túrtip turar naqılı»

- dep shayır jazǵanınday, ázelden xalqımız arasında kóshe biyleri, el aǵaları, nuranıy-kekselerdiń tutqan ornı, abıroyı ayrıqsha bolıp, xalıq arasında awızbirshilikti saqlawda úlken áhmiyetke iye bolıp kelgen. Kóshe biyleri kóbinese eldi izine erte alatuǵın, xalıqqa tórelik etiwshi jası úlkenler, nuranıylardan sol jerdiń jergilikli xalqınıń qálewi menen saylanatuǵın bolǵan. Búgingi kúnde de olardı saylaw tikkeley xalıqtıń qálewi menen ámelge asırılıwı áhmiyetin joytpaǵan. Ótkerilgen ushırasıwda mine usınday awzı duwalı, sózi ótimli nuranıylarımızdıń, kóshe biyleriniń xalıq arasındaǵı mashqalalardıń ortasında jasap kiyatırǵanı, barlıq máselelerden xabardar ekenligi hám usı tiykarda aldaǵı ámelge asırıwı tiyis wazıypalar belgilep alınatuǵınlıǵı ayrıqsha sóz etildi.

  Kóshe biyleri hám jası úlkenler tárepinen bir neshe áhmiyetli máseleler kóterildi hám bul mashqalalarǵa sheshim tabıw Joqarǵı Keńes Baslıǵınıń jeke qadaǵalawına alındı. Óz náwbetinde, kóshe biyleri ámelge asırılıp atırǵan «Insan qádiri ushın» principi tiykarındaǵı jumıslardıń dawamlı bolıwına isenim bildirip, bul ózgerislerdi barqulla kátqudalıǵı, aq pátiyası hám eldiń awızbirshiligin saqlaw menen qollap-quwatlaytuǵınlıǵın bildirdi.

 

Qaraqalpaqstan Respublikası Joqarǵı Keńesiniń Málimleme xızmeti