Joqarǵı Keńes Baslıǵı Nókis rayonındaǵı kóshe biyleri, nuranıy, aqsaqallar hám belsendiler menen jaqınnan pikirlesti

Qaraqalpaqstan Respublikası Joqarǵı Keńesiniń Baslıǵı Amanbay Orınbaev máhállelerdegi birinshi dárejeli sheshiliwi kerek máselelerdi belgilep alıw maqsetinde Nókis rayonındaǵı kóshe biyleri, nuranıylar hám bir qatar belsendiler menen ushırastı.

  Ótkerilgen ushırasıwda Joqarǵı Keńes Baslıǵı shıǵıp sóylep, húrmetli Prezidentimiz tárepinen Qaraqalpaqstan Respublikasına qaratılıp atırǵan ayrıqsha itibar, bul baǵdarda qabıl etilgen qarar hám pármanlar, mámleketlik baǵdarlamalar sheńberinde orınlanıp atırǵan jumıslarǵa keń túrde toktaldı. Ushırasıw dawamında mine usınday iygilikli baslamalar haqqında sóz etilip, xalqımızdıń búgingi turmısınan razılıǵın támiyinlew baǵdarında aldaǵı waqıtta jáne qanday mashqalalarǵa sheshim tabıw zárúrligi bar ekenligi boyınsha kóshe biyleri menen másláhátlesip alındı. Óz náwbetinde kóshe biyleri, nuranıy-aqsaqallar tárepinen bir neshe áhmiyetli máseleler kóterildi hám Joqarǵı Keńes Baslıǵı tárepinen bul mashqalalarǵa aldaǵı waqıtta sheshim tabıw hám saplastırıw boyınsha wazıypalar belgilep alındı. Kóshe biyleri, nuranıylar hám máhállelerdegi belsendiler menen pikirlesiwdiń áhmiyeti ayrıqsha. Sebebi, olar tikkeley xalqımız benen birge jasap, mashqalalar menen birgelikte duslaspaqta.

  Ótkerilgen ushırasıwda Joqarǵı Keńes Baslıǵı ashıq-aydın pikirlesip, kóshe biyleri, máhálle belsendileri hám nuranıylar menen jiyi-jiyi ushırasıp turatuǵınlıǵın, mashqalalardı sheshiw boyınsha birgelikte wazıypalardı belgilep alıw zárúr ekenligin atap ótti. Óz náwbetinde nuranıylar da xalqımızdıń abadan turmısın támiyinlew jolında bar kúsh-ǵayratın jumsaytuǵınlıǵın aytıp ótip, elimizde búgingi kúnde «Insan qádiri ushın» principi tiykarındaǵı ámelge asırılıp atırǵan jumıslardan minnetdar ekenligin bildirdi.

 

Qaraqalpaqstan Respublikası Joqarǵı Keńesiniń Málimleme xızmeti