Jigitler áskeriy xızmetke, Watandı qorǵawǵa atlandı
1016
Búgin Ózbekstan Respublikası Milliy Gvardiyası Qaraqalpaqstan Respublikası basqarmasında Milliy gvardiya sistemasında xızmet ótep atırǵan áskerlerdiń «Watanǵa ant beriw» máresimi bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, Milliy gvardiya áskerlerin Watan qorǵawshıları qatarınan orın alǵanı hám el tınıshlıǵın qásterlep-saqlaw, xalıq iygiligi jolında xızmet etiwdey Watan aldındaǵı perzentlik parızdı orınlawǵa kiriskeni múnásibeti menen qutlıqladı.
Saltanatlı ilajda mámleketlik hám jámiyetlik shólkemler wákilleri, Watanımızdıń márt qorǵawshılarınıń ata-anaları, ǵalaba xabar quralları wákilleri hám jaslar qatnastı.
Aytıp ótw kerek, húrmetli Prezidentimiz, Qurallı Kúshlerdiń Joqarı Bas sárkardası Shavkat Mirziyoevtiń baslaması menen 2019-jılı «Watanǵa ant beriw»diń mazmun-mánisi jańalanıp, onıń abırayı asıp, áskeriy xızmetkerlerge jawıngerlik ruwx, mártlik baǵıshlamaqta.
2020-jıl 18-noyabrdegi “Ózbekstan Respublikası Milliy gvardiyası haqqında”ǵı Ózbekstan Respublikası Nızamında áskeriy xızmetkerlerdiń ant beriwi belgilep qoyılǵan. Sonday-aq, «Watanǵa ant» tiykarında ana-Watandı kózdiń qarashıǵınday qásterlep-saqlaw muqaddes parız ekenligi belgilengen.
Búgingi kúnde Milliy gvardiya sistemasında xızmet ótep atırǵan jigitlerimiz óz antına sadıq bolıp, elimizde jámiyetlik tártipti saqlaw hám qáwipsizlikti támiyinlew wazıypaların sadıqlıq penen atqarıp kelmekte. Milliy gvardiya Qurallı Kúshlerdiń eń saylandı áskeriy bólimlerinen biri bolıp, oǵan hár tárepleme jetik, fizikalıq jaqtan salamat jaslar xızmetke shaqırılmaqta. Bul bolsa óz gezeginde xalqımızdı qorǵawdıń, jámiyetlik qáwipsizlikti támiyinlewdiń áhmiyetli kepili bolıp xızmet etpekte.
Ant – bul Watandı múnásip qorǵaw boyınsha áskeriy xızmetke qoyılatuǵın talaplardı ózinde jámlegen huqıqıy hújjet bolıp, Qurallı Kúshler qatarına qosılıp atırǵan hár bir puqaranıń muqaddes minnetin orınlawǵa beretuǵın saltanatlı wádesi esaplanadı.
Búgingi saltanatlı ilajda Watan aldında ant berip atırǵan jaslar Milliy gvardiyaǵa bildirilip atırǵan isenim hám alǵa qoyılǵan wazıypalardı inabatlı atqarıp, “Minnet, Sadıqlıq, Mártlik” uranına múnásip xızmet qıladı dep bekkem isenemiz.
Qaraqalpaqstan Respublikası Joqarǵı Keńesiniń Málimleme xızmeti