“Mádeniyat hám kórkem óner tarawı xızmetkerleri kúni» múnásibeti menen saltanatlı bayram ilajı bolıp ótti
2366
Búgin Berdaq atındaǵı Qaraqalpaq mámleketlik akademiyalıq muzıkalı teatrında «Mádeniyat hám kórkem óner tarawı xızmetkerleri kúni» múnásibeti menen saltanatlı bayram keshesi bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.
Bayram ilajına Ózbekstan Respublikası Prezidentiniń keńesgóyi T.Xudaybergenov qatnastı.
Hár qanday xalıqtıń mádeniyatı menen kórkem ónerine degen húrmet – bul sol xalıqtıń ótmish tariyxı, milliyligi, úrp-ádet hám dástúrlerine bolǵan húrmet sanaladı.
Sonlıqtan da búgingi bayram tamırı tereń tariyxqa iye kóp milletli xalqımızdıń, pútkil elimizdiń bayramı, desek aljaspaǵan bolamız.
Aytıp ótiw orınlı, sońǵı jılları elimizde Húrmetli Prezidentimizdiń basshılıǵında mádeniyat hám kórkem-óner tarawın rawajlandırıwǵa, taraw xızmetkerlerine qolaylı sharayatlar jaratıwǵa hám olardıń xızmetlerin múnásip bahalawǵa, xalıqtıń mádeniy dem alıwın mazmunlı shólkemlestiriwge ayrıqsha itibar qaratılıp, bul baǵdarda keń kólemli jumıslar ámelge asırılmaqta.
Ótken qısqa dáwir ishinde tarawǵa baylanıslı bir qatar Nızam, Párman hám Qararlardıń qabıl etilgeni bul baǵdardaǵı ilajlar kólemin jańa basqıshlarǵa kótermekte.
Ásirese, jaqında ǵana Húrmetli Prezidentimizdiń Qaraqalpaqstanǵa saparı dawamında Berdaq atındaǵı Qaraqalpaq mámleketlik akademiyalıq muzıkalı teatrında taraw wákilleri menen ushırasıp, jaqınnan pikirlesiwi, mádeniyat hám kórkem óner tarawında xızmet etip atırǵan insanlardıń dóretiwshilik miynetlerine joqarı baha beriwi – bul taraw pidayılarına, qalaberse pútkil xalqımızǵa degen joqarı itibardıń kórinisi sanaladı.
Ótkerilgen saltanatlı ilaj dawamında búgingi bayram múnásibeti menen ózleriniń joqarı nátiyjeleri hám tabısları menen ajıralıp kiyatırǵan bir qatar taraw pidayıları Qaraqalpaqstan Respublikası Joqarǵı Keńesi hám Ózbekstan Respublikası madeniyat hám turizm ministrligi tárepinen kókirek belgileri hám Húrmet jarlıqları menen sıylıqlandı.
Qaraqalpaqstan Respublikası Joqarǵı Keńesiniń Málimleme xızmeti