Barlıq jumıslar hám reformalar xalqımızdıń abadanlıǵı ushın degen iygilikli ideya átirapında jámlengen

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonındaǵı máhállelerde ushırasıp atırǵan mashqalalarǵa sheshim tabıw hám aldaǵı ámelge asırılıwı tiyis wazıypalardı belgilep alıw maqsetinde kóshe biyleri, nuranıy-aksaqallar hám belsendiler menen ushırastı. Onda dáslep Joqarǵı Keńes Baslıǵı sózge shıǵıp Prezidentimiz basshılıǵında respublikamız ushın qaratılıp atırǵan úlken itibar, ámelge asırılıp atırǵan jumıslar haqqında keń túrde atap ótti.

  Húrmetli Prezidentimizdiń "Xalqımız razı bolsa, jumısımızda ónim hám bereket boladı." dep atap ótkenindey, búgingi kúnde xalqımızǵa múnásip turmıs sharayatın jaratıw, olardıń abadan ómir súriwin támiyinlew baǵdarında alıp barılıp atırǵan salmaqlı jumıslar turmısta óz sáwleleniwin tawıp atır. Mine usı tiykarda puqaralardı qıynap kiyatırǵan mashqalalarǵa sheshim tabıw baǵdarında barlıq rayonlarda, ásirese eń shetki aymaqlarda da qabıllawlar ótkerilmekte. Usı jumıslardıń dawamı sıpatında Joqarǵı Keńes Baslıǵı barlıq rayonlardaǵı kѳshe biyleri menen ushrasıp, xalqımızdı razı etiw jolında jáne qosımsha qanday jumıslardı alıp barıw kerekligi boyınsha pikir alıspaqta.

  Búgingi ushırasıw da ashıq-aydın pikirlesiw túrinde bolıp, kóshe biyleri menen Qońırat rayonındaǵı máhállelerdi hár tárepleme rawajlandırıw, puqaralarǵa múnásip sharayat jaratıw baǵdarında wazıypalar belgilendi. Óz náwbetinde kóshe biyleri tárepinen bir qatar áhmiyetli máseleler kóterilip, mashqalalar atap ótildi. Joqarǵı Keńes Baslıǵı tárepinen kóterilgen barlıq máseleler belgilep alınıp, aldaǵı waqıtta bul jumıslardı orınlaw boyınsha qadaǵalawǵa alındı.

 

Qaraqalpaqstan Respublikası Joqarǵı Keńesiniń Málimleme xızmeti