Insan qádiri uluǵlanǵan elde hesh kim mexir hám itibardan shette qalmaydı
856
Búgingi kúnde respublikamız aymaǵında járdemge mútáj, turaq jayında birinshi dárejeli turmıs keshiriw ushın da sharayatı joq shańaraqlar bar. Olarǵa itibar hám ǵamqorlıq kórsetiw kerek. Qanshama úylerdiń shiferi joq, neshshe úyler jasawǵa jaramsız.
Sonı da atap ótiw kerek, mámleketimizde hesh bir insan mehir hám itibardan shette qalmaydı. «Insan qádiri ushın» principi tiykarında xalqımızǵa múnásip sharayat jaratıw, olardıń abadan turmısın támiyinlew boyınsha Prezidentimiz basshılıǵında bir qatar jumıslar ámelge asırılmaqta.
Atap aytqanda mámleketimiz basshısı, húrmetli Prezidentimizdiń tapsırması menen “Mehir háreketi” sheńberinde rayonlardaǵı sharayatı awır shańaraqlardı qıs máwsiminen biyzıyan alıp shıǵılıwın támiyinlew, materiallıq qollap-quwatlaw, turaq-jayların ońlap, zárúrlerin shiferlap beriw, nawqaslıǵı bar puqaralarǵa medicinalıq járdem kórsetiw boyınsha da bir qatar iygilikli jumıslar ámelge asırıldı.
Usı jumıslardıń dawamı sıpatında Ózbekstan Respublikası Prezidentiniń tikkeley baslaması menen Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı Qaraqalpaqstan ushın ayrıqsha qarar qabıl etildi.
Qararǵa tiykar járdemge mútáj shańaraqlarǵa tiyisli úy-jaylardıń tóbesin shiferlap beriw, zárúrlerin qaytadan qurıw belgilep alınıp, bul boyınsha respublikamızdıń barlıq orınlarında búgingi kúnde ámeliy jumıslar baslanǵan.
Qaraqalpaqstan Respublikası boyınsha jámi 21 094 úydi shiferlap beriw, 709 úydi qaytadan qurıw ushın húrmetli Prezidentimiz tárepinen jámi 243,9 mlrd sum qarjı ajıratıldı.
Sonnan, Tórtkúl rayonı aymaǵında da 2521 úy shiferlap beriwge mútáj dep belgilengen bolıp, sonnan 510 úy awır turmıs sharayatındaǵı, 33 turaq jay bolsa jaramsız hám qayta qurıwǵa mútáj dep tabılǵan. Bunıń ushın jámi 36,8 mlrd sum qarjı jumsalıwı rejelestirilgen. Búgingi kúnge kelip rayonda usı úylerde qurılıs-ońlaw jumısları baslap jiberildi.
Máselen, «Iftixor» máhállesindegi Xosiyatxon Isakova hám «Túrkistan» máhállesindegi Lira Garifulinanıń úylerin buzıw jumısları baslanıp, qayta qurıw ushın tayarlanıp atır.
Sonday-aq, «Tashkent» máhállesindegi Usmon Jumaniyazov hám «Anhorli» máhállesindegi Sanobar Karimovalardıń úyleriniń tóbesin shiferlaw jumısları da alıp barılmaqta.
Áhmiyetlisi respublikamız boyınsha mútáj shańaraqlardı anıqlaw jumısları kóshe biyleriniń járdemi hám tikkeley qatnası arqalı anıqlandı.
Óytkeni, ázelden xalqımız turmısında girewli ornı menen belgili bolǵan kóshe biyleri aymaǵındaǵı puqaralardıń turmısın hámmeden kóbirek jaqsı biledi.
Juwmaqlap aytqanda xalqımızdı búgingi turmısınan kewilli jasawın támiyinlew baǵdarında Prezidentimiz basshılıǵında baslanǵan úlken jumıslar elimiz boylap elede dawam etedi.
Qaraqalpaqstan Respublikası Joqarǵı Keńesiniń Málimleme xızmeti