Húrmetli Prezidentimizdiń Qaraqalpaqstan ushın qaratıp atırǵan itibarınıń shegi joq. Máselen,basqa wálayatlar menen salıstırmalı túrde alıp qaraytuǵın bolsaq, áyne Qaraqalpaqstan ushın, bul jerde jasap atırǵan adamlardıń turmıs abadanlıǵı jolında izbe-iz qabıl etilip atırǵan oǵada áhmiyetli párman qararlardı aytıp ótsek boladı.
Sonıda ayrıqsha atap ótiw kerek, járdemge mútáj bolǵan studentlerdiń shártnama pulların húkimet tárepinen tólew, densawlıǵın tiklew hám materiallıq járdem menen qosa basqa da járdem qarjıları eń kóp Qaraqalpaqstan ushın ajıratılıp atır.
Mine jaqında ǵana Prezidentimiz tapsırması menen Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı Qaraqalpaqstan ushın ayrıqsha qarar qabıl etilip, Qaraqalpaqstan Respublikası boyınsha jámi 21 mıń 94 úydi shiferlap beriw, 709 úydi qaytadan qurıw ushın 343,9 mlrd. sum qarjı ajıratıldı.
Qabıl etilgen qarar kóp kúttirmey óziniń dáslepki nátiyjelerin berip basladı. Mine keshe ǵana Tórtkúl rayonındaǵı turaq jaylardı ońlaw, qayta qurıw hám shiferlaw jumısları baslanǵan bolsa, búgin Taxtakópir rayonında bul jumıslar dawam etpekte.
Taxtakópir rayonı aymaǵındaǵı járdemge mútáj jámi 1586 xojalıqlardan 1499 xojalıqtıń túraq jayın shiferlap beriw hám 87 xojalıqtıń túraq jayın qaytadan qurıp beriw ushın jámi 25,8 mlrd. sum qarjı ajıratılǵan bolsa, sonnan bir ǵana Jizzax walayatı tárepinen 12,8 mlrd. sumlıq qurılıs jumısları alıp barılıwı rejelestirilgen.
Rayon aymaǵındaǵı bir neshe orınlarda Jizzax walayatı tárepinen puqaralarǵa múnásip turmıs sharayatın jaratıw baǵdarında olardıń turaq-jayların ońlaw, shiferlaw hám qayta qurıw jumısları baslap jiberildi.
Házir shın mánisinde hár bir insan, hár bir xojalıq mámleketimizdiń itibarı, insan qádirin uluǵlawday ullı maqsetti turmısqa engiziw boyınsha alıp barılıp atırǵan jumıslardı óz shańaraǵında, óz úylerinde sezinbekte.
Álbette, bul ámeliy jumıslardıń barlıǵı hár bir insannıń abadan turmısın, búgingi turmısınan razılıǵın támiyinlewdey joqarı ideya átirapında jámlenbekte.
Joqarǵı Keńestiń sociallıq tarmaqlardaǵı rásmiy kanalların baqlap barıń. Biz sizge respublikamızdıń barlıq rayonlarında alıp barılıp atırǵan kólemli jumıslar, iygilikli ámeller haqqında maǵlıwmat berip baramız.
Qaraqalpaqstan Respublikası Joqarǵı Keńesiniń Málimleme xızmeti
