Joqarǵı Keńes Baslıǵı Nókis qalasınıń kóshe biyleri, nuranıy-aqsaqallar hám belsendileri menen ushırastı
934
Onda eki mıńnan aslam máhálle belsendileri, sonnan 1 700 ge jaqın kóshe biyleri qatnaspaqta. Ushırasıw 2 kún dawamında ótkerilmekte.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasındaǵı máhállelerde ushırasıp atırǵan mashqalalarǵa sheshim tabıw hám aldaǵı ámelge asırılıwı tiyis wazıypalardı belgilep alıw maqsetinde kóshe biyleri, nuranıy-aksaqallar hám belsendiler menen ushırastı.
Onda dáslep Joqarǵı Keńes Baslıǵı sózge shıǵıp, Prezidentimiz basshılıǵında respublikamız ushın qaratılıp atırǵan úlken itibar, ámelge asırılıp atırǵan jumıslar haqqında keń túrde atap ótti.
Húrmetli Prezidentimizdiń “Xalqımız razı bolsa, jumısımızda ónim hám bereket boladı.” dep atap ótkenindey, búgingi kúnde xalqımızǵa múnásip turmıs sharayatın jaratıw, olardıń abadan ómir súriwin támiyinlew baǵdarında alıp barılıp atırǵan salmaqlı jumıslar turmısta óz sáwleleniwin tawıp atır.
Bul baǵdarda bir qatar qarar hám pármanlar qabıl etilip, turmısqa engizilmekte. Usılar qatarında usı jıldıń 13-aprel kúni «2023-jılda bazar ólemshelrine tiykarlanǵan ipoteka kreditleri arqalı xalıqtı úy-jay menen támiyinlew baǵdarlamasın ámelge asırıw is-ilajları haqqında» Ózbekstan Respublikası Prezidentiniń pármanı qabıl etildi. Qarar boyınsha banklerge ipoteka kreditlerin rásmiy daramatqa iye bolmaǵan fizikalıq shaxslarǵa da ajıratıwǵa ruxsat etildi. Banklerge dáslepki tólem muǵdarı, jeńillikli dáwir múddeti hám basqa kórsetkishlerden kelip shıǵıp, kreditler boyınsha siyasiy qatlamlastırılǵan procent stavkaların ornatıw huqıqı berildi. Subsidiyaǵa ajıratılǵan qarjılardı tezirek jumsaw ushın, subsidiya xabarnamasınıń ámel etiw múddeti 12 aydan 4 ayǵa túsirildi.
Bunnan basqa da qararlar, pármanlar hám mámleketlik baǵdarlamalar sheńberinde xalqımızǵa múnásip turmıs sharayatın jaratıw baǵdarında salmaqlı jumıslar dawam ettirilmekte.
Prezidentimiz basshılıǵında ámelge asırılıp atırǵan jumıslar tiykarında respublikamızda puqaralardı qıynap kiyatırǵan mashqalalarǵa sheshim tabıw baǵdarında barlıq rayonlarda, ásirese eń shetki aymaqlarda da qabıllawlar ótkerilmekte.
Usı jumıslardıń dawamı sıpatında Joqarǵı Keńes Baslıǵı barlıq rayonlardaǵı kѳshe biyleri menen ushırasıp, xalqımızdı razı etiw jolında jáne qosımsha qanday jumıslardı alıp barıw kerekligi boyınsha pikir alıspaqta.
Búgin Nókis qalasında bolıp ótken ushırasıw da ashıq-aydın pikirlesiw túrinde bolıp, kóshe biyleri menen rayondaǵı máhállelerdi hár tárepleme rawajlandırıw, puqaralarǵa múnásip turmıs sharayatın jaratıw baǵdarında wazıypalar belgilep alındı.
Óz náwbetinde kóshe biyleri tárepinen bir qatar áhmiyetli máseleler kóterilip, mashqalalar atap ótildi.
Joqarǵı Keńes Baslıǵı tárepinen kóterilgen barlıq máseleler belgilep alınıp, aldaǵı waqıtta bul jumıslardı orınlaw boyınsha qadaǵalawǵa alındı.
Esletip ótemiz Joqarǵı Keńes Baslıǵınıń Nókis qalası kóshe biyleri menen ushırasıwı 19-aprel kúni de dawam etedi.
Qaraqalpaqstan Respublikası Joqarǵı Keńesiniń Málimleme xızmeti