Ustazlardıń ullı jolı izdegi shákirtlerge barqulla úlgi alarlıq mektep boladı

Búgin Nókis qalasında jaylasqan záwlim imaratta Mádeniyat hám kórkem óner xızmetkerleriniń úsh áwladı diydarlastı. Ushırasıw keshesinde dáslep uzaq jıllar dawamında elimiz hám xalqımız ushın pidayı miynet etken nuranıylar qatar dizilgen jaslar tárepinen húrmet-izzet kórsetilip kútip alındı. Óz náwbetinde nuranıylar jaslar menen ushırasıp, olardıń yoshlanıp jırlap atırǵan qosıqları, atqarǵan namalarınan tolqınlanıp, ózleriniń jaslıq shaǵların esledi. Diydar nesip ushırasıwda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Prezidentiniń keńesgóyi T.Xudaybergenov shıǵıp sóylep, elimizdiń rawajlanıwına múnásip úlesin qosıp kiyatırǵan bir topar veteranlar hám taraw wákilleriniń úlgili islerin ayrıqsha tilge aldı.

Onda Qaraqalpaqstan Respublikası Ministrler Keńesiniń Baslıǵı F.Ermanov hám respublikamızdıń barlıq rayon hám qalalarınan kelgen uzaq jıllar dawamında xızmet kórsetken mádeniyat hám kórkem óner xızmetkerleri bolǵan kekseler, veteranlar, student jaslar qatnastı. Ótkerilgen ushırasıwda xalqımızdıń mádeniyatı hám kórkem-óner tarawı rawajlanıwında óziniń salmaqlı úlesin qosqan marhum taraw darǵaları, ustaz qosıqshılar, ataqlı artistler, tarawdıń belgili wákilleri yad etildi.

  Miynetkesh xalqımız Ibrayım Yusupov, Igor Savickiy sıyaqlı ullı insanlardıń ólmes dóretpeleri, Ayımxan Shamuratova, Bayram Matchanov kibi xosh hawaz búlbillerdiń jańlar hawazın, basqa da bir qatar ustaz kórkem óner ǵayratkerleriniń miyrasın máńgi yadında saqlaydı. Ushırasıwda uzaq jıllar dawamında elimiz hám xalqımız ushın pidayı miynet etken taraw pidayılarınıń, tájiriybeli nuranıyları, aqıl-keńes berer jası úlkenleri jıynaldı.

  Sonlıqtan, ótkerilip atırǵan bul úsh áwlad ushırasıwınıń shólkemlestiriliwinde úlken mánis-mazmun bar. Jası úlken áwlad wákilleri jaslar menen pikir alısıp, jaslıq kúsh-ǵayratın qayta sezingendey boldı desek aljaspaǵan bolamız. Nuranıylardıń úgit-násiyatları jaslardı jaqsı insan bolıp jetilisiwine, hár dayım jaqsılıq islewge, tereń bilim alıwǵa, mádeniyatımız hám kórkem-ónerimizdiń rawajlanıwına múnásip úles qosıwǵa baǵdarlaydı.

  Diydarlasıw ushırasıwı dawamında koncert baǵdarlaması, elimiz, xalqımız ushın pidayı miynet etken qaharmanlardıń bay turmıs tájiriybesi, úlgili miynet jolı haqqında arnawlı filmler jıynalǵanlar názerine usınıldı. Álbette, bunday ilajlar jaslardıń hár tárepleme jetik insan bolıp jetilisiwine, miynet nuranıylarınıń turmıs mektebi menen jaqınnan tanıs bolıwına xızmet etedi.

 

Qaraqalpaqstan Respublikası Joqarǵı Keńesiniń Málimleme xızmeti