Joqarǵı Keńes Baslıǵı Nókis qalası kóshe biyleri hám máhálle belsendileri menen aldaǵı ámelge asırılıwı tiyis wazıypalardı belgilep alıw boyınsha ashıq-aydın pikirlesip aldı
910
Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalıqtıń mashqalalarına sheshim tabıw jolında jáne qanday ilajlardı ámelge asırıw kerekligin belgilep alıw maqsetinde Nókis qalasındaǵı kóshe biyleri, máhálle belsendileri hám nuranıy-aqsaqallar menen ushırastı.
Onda 2 000 nan aslam máhálle belsendileri, sonnan 1 700 ge jaqın kóshe biyleri qatnastı. Búgin ushırasıwdıń ekinshi kúni bolıp, eki kún dawamında olar menen jaqınnan pikirlesildi.
Búgingi kúnde elimizde Qaraqalpaqstan Respublikasın sociallıq-ekonomikalıq jaqtan rawajlandırıw baǵdarında húrmetli Prezidentimiz basshılıǵında bir qatar reformalar, ámeliy jumıslar ámelge asırılmaqta. Bul baǵdarda Qaraqalpaqstan ushın ayrıqsha qarar hám pármanlar, mámleketlik baǵdarlamalar qabıl etilip, turmısqa engizilmekte.
Máhállelerdi abat etiw boyınsha 408-sanlı qarar, mútáj shańaraqlardıń turaq-jayların ońlaw, zárúrlerin qayta qurıp, shiferlap beriw boyınsha 52-sanlı qarar qabıl etildi. Bul dizimdi ele de dawam ettire beriwge boladı. Usılar qatarında usı jıldıń 13-aprel kúni «2023-jılda bazar ólemshelrine tiykarlanǵan ipoteka kreditleri arqalı xalıqtı úy-jay menen támiyinlew baǵdarlamasın ámelge asırıw is-ilajları haqqında» Ózbekstan Respublikası Prezidentiniń pármanı qabıl etildi. Qarar boyınsha banklerge ipoteka kreditlerin rásmiy daramatqa iye bolmaǵan fizikalıq shaxslarǵa da ajıratıwǵa ruxsat etildi. Banklerge dáslepki tólem muǵdarı, jeńillikli dáwir múddeti hám basqa kórsetkishlerden kelip shıǵıp, kreditler boyınsha siyasiy qatlamlastırılǵan procent stavkaların ornatıw huqıqı berildi. Subsidiyaǵa ajıratılǵan qarjılardı tezirek jumsaw ushın, subsidiya xabarnamasınıń ámel etiw múddeti 12 aydan 4 ayǵa túsirildi.
Álbette, bulardıń barlıǵı Qaraqalpaqstan xalqınıń abadan turmısın támiyinlew hám olarǵa múnásip turmıs sharayatın jaratıwǵa qaratılǵan.
Joqarǵı Keńes Baslıǵı tárepinen Prezidentimiz basshılıǵında ámelge asırılıp atırǵan jumıslar keń túrde atap ótildi.
Sonday-aq, máhállelerdi abat etiw boyınsha ele de qanday ilajlardı ámelge asırıw zárúrligi boyınsha kóshe biyleri hám belsendiler menen pikir almasıldı.
Óz náwbetinde kóshe biyleri, nuranıylar hám belsendiler tárepinen Prezidentimiz basshılıǵında ámelge asırılıp atırǵan jumıslardan xalqımız sheksiz minnetdar ekenligi ayrıqsha tilge alındı.
Sonday-aq, máhállelerdegi sistemalı mashqalalar, infrastruktura, sociallıq obektler menen baylanıslı máseleler kóterildi.
Óz náwbetinde Joqarǵı Keńes Baslıǵı bul mashqalalardıń sheshimin tabıw boyınsha jeke qadaǵalawına alatuǵınlıǵı hám aldaǵı waqıtta álbette, hár bir mashqala itibardan shette qalmaytının bildirdi.
Elimizde «Insan qádiri ushın» principi tiykarında oǵada kólemli jumıslar ámelge asırılmaqta. Hár bir múrájat itibarǵa alınıp, bul baǵdarda puqaralardıń mashqalaların sheshiw boyınsha orınlarda kóshpeli qabıllawlar ótkerilmekte. Kóshe biyleri de xalıq arasında jasap, tikkeley mashqalanı ózinde sezinip atırǵan insanlar esaplanadı. Sonlıqtan, Joqarǵı Keńes Baslıǵı xalqımızdı qıynap kiyatırǵan mashqalalardı sheshiw maqsetinde kóshe biyleri menen pikirlesip, wazıypalardı belgilep almaqta.
Xalqımızdı razı etiw jolındaǵı bunday ushırasıwlar bunnan-bılayda dawam ettiriledi.
Qaraqalpaqstan Respublikası Joqarǵı Keńesiniń Málimleme xızmeti