Ramazan hayıtın belgilew haqqında
1548
Ózbekstan Respublikası Prezidentiniń qararı
Mámleketimizde insan qádirin ulıǵlaw, óz-ara húrmet, doslıq hám awızbirshilik ortalıǵın bekkemlew, watanlaslarımızdıń hújdan erkinligi baǵdarındaǵı huqıqların támiyinlew boyınsha alıp barılıp atırǵan keń kólemli reformalarımız sebepli jaratılǵan qolaylı imkaniyatlardan nátiyjeli paydalanıp, xalqımız múbárek Ramazan ayın tınıshlıq-qáterjamlıq penen ótkermekte. Ásirese, máhálle, jaslar, hayal-qızlar hám nuranıylar jámiyetshiligi, diniy ulamalarımız tárepinen orınlarda kóplegen ruwxıy-aǵartıwshılıq jumıslar ámelge asırılıp atırǵanı, saqawat hám miyrim-shápáát ilajları sheńberinde kem támiyinlengen, jalǵız hám mayıplıǵı bolǵan insanlardıń jaǵdayınan xabar alınıp, olarǵa ámeliy járdemler kórsetilip atırǵanı Ramazan ayınıń áhmiyeti hám gózzalıǵın jáne de arttırmaqta. Mine, usınday iygilikli islerdiń dawamı sıpatında ullı áyyyam – Ramazan hayıtın múnásip kútip alıw hám joqarı dárejede ótkeriw, onıń mánisinde jámlengen miyrim-shápáát, saqawat, ullılıq hám keńpeyillik pazıyletlerin qásterlep saqlaw hám keńnen úgit-násiyatlaw, el-xalqımızdıń jaqsı niyetleri hám arzıw-úmitlerin qollap-quwatlaw maqsetinde: 1. Usı jılı Ramazan hayıtınıń birinshi kúni 21-aprel – juma kúnine tuwra keliwi haqqında Ózbekstan musılmanları mákemesi Ulamalar keńesi tárepinen qabıl etilgen qarardı esapqa alıp, mámleketimizde 2023-jıl 21-aprel kúni Ramazan hayıtı bayramı sıpatında keńnen belgilensin. 2. Xalıqtıń Ramazan hayıtı bayramın múnásip kútip alıwı hám joqarı dárejede ótkeriwi ushın qolaylı sharayat jaratıw maqsetinde 2023-jıl 24-aprel (dúyshembi) kúni jumıs háptesiniń túrine qaramastan barlıq xızmetkerler ushın qosımsha dem alıs kúni sıpatında belgilensin. 3. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Din isleri boyınsha komitet hám birge islesiwshi shólkemler menen birgelikte Ramazan hayıtı xalqımızdıń milliy dástúr hám qádiriyatlarına sáykes túrde ótkeriliwi ushın tiyisli ilajlardı ámelge asırsın. Mádeniyat hám turizm ministrligi Transport ministrligi menen birgelikte watanlaslarımız ushın múbárek Ramazan hayıtı kúnlerinde ullı zıyarat orınları hám tariyxıy orınlarǵa zıyaratların shólkemlestiriw maqsetinde qolaylı sharayatlar menen imkaniyatlar jaratsın. 4. Ózbekstan Milliy teleradiokompaniyası, Ózbekstan Milliy málimleme agentligi hám basqa da ǵalaba xabar qurallarına Ramazan hayıtın belgilewge baylanıslı ilajlardı keńnen sáwlelendiriw usınıs etilsin. 5. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi M.M.Kamilovqa júklensin.Ózbekstan Respublikası Prezidenti Sh.MIRZIYOEV