Puqaralıǵı bolmaǵan bir qatar shaxslarǵa puqaralıq pasportları tapsırıldı

Bárshemizge belgili, keyingi jıllarda húrmetli Prezidentimizdiń basshılıǵında barlıq tarawlardı hár tárepleme rawajlandırıw baǵdarında keń kólemli reformalar ámelge asırılmaqta. Bulardıń ámeliy nátiyjelerin búgin hár bir insan óz turmısında sezip kelmekte. Sonı ayrıqsha atap ótiwimiz tiyis, barlıq tarawlarda ámelge asırılıp atırǵan túpkilikli ѳzgerisler eń birinshi náwbette “Insan qádiri ushın” principi tiykarında alıp barılmaqta. Usılar menen bir qatarda, mámleketimizde puqarasızlıqtı kemeytiw hám bunday jaǵdaydıń kelip shıǵıwınıń aldın alıw boyınsha bir qatar ilajlar alıp barılmaqta. Álbette, respublikamızda bir neshe jıllardan berli turaqlı jasap atırǵan shaxslarda puqaralıqtıń joqlıǵı eń baslı sociallıq mashqala sanaladı. Búgingi nızamshılıqta da puqarasızlıqtı kemeytiw tiykarǵı principlerden biri bolıp esaplanadı. Máselen, Qaraqalpaqstanda 2016 jıldan (yamasa sońǵı 5 jıl ishinde) usı kúnge shekem turaqlı jasap atırǵan 1 598 puqaralıǵı bolmaǵan shaxslar Ózbekstan Respublikası puqaralıǵına qabıl etildi. Bul iygilikli baslamalarda húrmetli Prezidentimizdiń miyneti joqarı. Prezidentimiz 2020-jıl 24-yanvarda Oliy Májliske jollaǵan múrájatnamasında “Puqaralıq máselelerinde tiyisli nızamshılıqtı jetilistiriw arqalı insan huqıqların támiyinlewdi turmıstıń ózi talap etpekte”- dep atap ótken edi. Sońǵı jıllarda elimiz basshısınıń baslaması menen puqaralardıń konstituciyalıq huqıqların tolıq támiyinlew boyınsha bir qansha jumıslar ámelge asırıldı. Ásirese, usı tarawda bar bolǵan milliy nızamshılıǵımızǵa tiyisli ózgeris hám qosımshalar kirgizildi. Bul tarawdaǵı ámeliy islerdiń izbe-iz dawam ettirilip atırǵanı bolsa, oǵada áhmiyetli. Sonıda ayrıqsha atap ótiw orınlı, 2020-jıl 13-marttaǵı «Ózbekstan Respublikasınıń puqaralıǵı haqqında»ǵı jańa redakciyadaǵı nızamnıń 6-statyasına ózgerisler kirgizilip,  endigiden bılay 15 jıl dawamında turaqlı jasaǵan biraq puqaralıǵı bolmaǵan shaxslar Ózbekstan Respublikası puqaralıǵına qabıl etiletuǵın boldı. Mine, búgin Húrmetli Prezidentimizdiń Ózbekstan Respublikası puqarlıǵına qabıl etiw boyınsha 2023-jıl 18-aprel kúngi 52-sanlı  Pármanına tiykarında Qarakalpakstanda turaqlı jasaǵan biraq jıllar dawamında puqaralıqqa iye bolmaǵan 4 shaxs, yaǵnıy, Shomanay rayonı turǵınları D.Ádbimuratov hám P.Jolımbetov, Xojeli rayonı turǵını N.Madenova, Qońırat rayonı turǵını I.Djumaniyazovlar Ózbekstan Respublikası puqaralıǵına kabıl etildi.

Shın mánisinde búgin bul puqaralardıń jańa ómiri baslandı. Bunnan kórinip turǵanınday, elimizde alıp barılıp atırǵan barlıq reformalar puqaralarımızdıń ásirese, mámleketimizde turaqlı jasawshı puqaralıǵı bolmaǵan shaxslardıń huqıq hám máplerin tolıq hámde bunnan bılayda nátiyjeli qorǵawǵa qaratılǵanı menen áhmiyetli.  

Qaraqalpaqstan Respublikası Joqarǵı Keńesiniń Málimleme xızmeti