Qaraqalpaqstan Respublikasında 38 million dollar muǵdarındaǵı hayallar orayı qurıladı
1198
Ózbekstan Respublikası Oliy Majlis Senatı Baslıǵı Tanzila Norbaeva búgin Qaraqalpaqstanda boldı. Sapar dawamında Senatı Baslıǵı basshılıǵında Qaraqalpaqstan Respublikası Joqarǵı Keńesinde deputatlar hám respublika belsendileri menen birgelikte májilis bolıp ótti.
Ótkerilgen májiliste Oliy Majlis Senatı Baslıǵı T.Narbaeva shıǵıp sóylep, búgingi kúnde húrmetli Prezidentimiz basshılıǵında ámelge asırılıp atırǵan jumıslar, keń kólemli reformalar hám puqaralarǵa múnásip turmıs sharayatın jaratıw baǵdarında orınlarda ámelge asırılıp atırǵan baslamalar haqqında keń túrde atap ótti.
Sonday-aq, mámleketimiz turmısında sonǵı jılları alıp barılıp atırǵan demokratiyalıq ózgerisler, ashıq-aydınlıq siyasatı, respublikanı sociallıq-ekonomikalıq jaqtan rawajlandırıw baǵdarları, usı jóneliste turmısqa engizilip atırǵan keń kólemli reformalar hám olardıń puqaralarımız turmısında óz sáwleleniwin tabıwı sıyaqlı bir qatar áhmiyetli máseleler sóz etildi.
Ótkerilgen ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublika turmısında júz berip atırǵan ózgerisler hám reformalardı hár bir qaraqalpaqstanlınıń úyine shekem kirip barıwın támiyinlew jolında alıp barılıp atırǵan jumıslar hám bul baǵdarda hár bir basshıdan baslap mámleketlik basqarıwdıń tómengi buwınları esaplanǵan máhálledegi beslik, kóshe biylerine shekem birgelikte tiyisli ilajlar ámelge asırılıp atırǵanlıǵın, óz gezeginde xalqımız da bul ózgerislerden sheksiz minnetdar ekenligin atap ótti.
Aytıp ótiw kerek, bıyılǵı jılda Nókis qalasında ulıwma bahası 38 million dollar bolǵan «Qaraqalpaqstan Respublikasındaǵı hayallardı isbilermenlikke úyretiw hám úyretilgen kónlikpelerdi sınaw orayı» qurılıwı rejelestirilgen bolıp, orayda hayal-qızlarǵa isbilermenlik kónlikpelerin úyretiw hám olardıń óz biznesin baslawı ushın jeterli bilim-tájiriybeni beriw rejelestirilgen.
Ótkerilgen májiliste bul qaraqalpaqstanlı hayal-qızlar ushın úlken jańalıq hám imkaniyatlar maydanı bolıwı atap ótildi.
Bunnan soń Senat Baslıǵı Nókis qalasındaǵı bir qatar orınlarda boldı.
Bular qatarında «Jaslar texnoparki», kásip-ónerge tayarlawshı «Mono Oray» jumısları menen jaqınnan tanısıp, miynet jámááti hám jaslar menen ushırastı.
Keyingi mánzilde Qaraqalpaqstan medicina institutı hám usı institut janında ashılǵan klina jumısları, jaratılǵan sharayatlar kózden ótkerildi.
Respublikamızǵa saparı dawamında Senat Baslıǵı Nókis qalasındaǵı baqsıshılıq mektebin barıp kórdi.
Qaraqalpaqstan Respublikası Joqarǵı Keńesiniń Málimleme xızmeti