Ózbekstan xalqına Ramazan hayıtı qutlıqlawı
686
Qádirli watanlaslar!
Dúnyadaǵı pútkil islam úmmeti qatarı elimizdiń musılmanları da úlken quwanısh penen kútip alıp atırǵan ullı áyyyam – Ramazan hayıtı menen siz, ázizlerdi, pútkil xalqımızdı shın kewilden qutlıqlap, bársheńizge ózimniń joqarı húrmetim hám qızǵın tileklerimdi bildiriwden oǵada quwanıshlıman. Qálblerimiz quwanısh hám jaqsılıq nurına tolıp turǵan baxıtlı demlerde bárinen burın, mine, usınday qutlı hám nurlı kúnlerge el-xalqımız benen birgelikte saw-aman jetkergeni ushın Jaratqanǵa shúkirshilikler aytamız. Xalqımız ázelden adamgershilik, miyrim-shápáát, qayır saqawat hám keńpeyillik belgisi sıpatında qádirlep keletuǵın Ramazanǵa bıyıl da puqta tayarlıq kórilip, onı múnásip ótkeriw boyınsha tiyisli ilajlar ámelge asırıldı. Bul bolsa musılmanlarımız ushın barlıq diniy ibadatlardı bereketli hám mazmunlı ótkerip, usı múbárek aydıń pazıyletlerinen tolıq paydalanıw imkaniyatın berdi. Ásirese, mıńlaǵan watanlaslarımız eki muqaddes qala – Mekke hám Madinaǵa barıp, usı Ramazan kúnlerinde Umra ámellerin orınlaw baxtına miyasar bolǵanı dıqqatǵa ılayıq. Biz bulardıń bárshesin dinin pák saqlap, pák niyetler menen jasap kiyatırǵan xalqımızǵa Alla taalanıń sheksiz márhamátı sıpatında qabıllaymız. Áziz watanlaslar! Jańa Ózbekstandı qurıw procesinde turmısımızdıń barlıq tarawları qatarı diniy baǵdardaǵı jumıslarımız da jańa basqıshqa kóterilip barmaqta. Keyingi jılları sizler menen birge bul baǵdarda úlken jumıslardı ámelge asırıp atırǵanımız xalqımızǵa, jámiyetshiligimizge jaqsı belgili. Ásirese, elimizde Imam Buxariy, Imam Termiziy, Imam Moturidiy xalıqaralıq ilimiy-izertlew oraylarınıń jumıs baslaǵanı, Buxarada Mir Arab joqarı medresisine, Samarqandta Hádis ilimi mektebine tiykar salınǵanı, Qashqadáryada Abu Muin Nasafiy, Namanganda Sultan Uvays Qaraniy zıyarat etiw orınları, Tashkent qalasında Suzuk ata kompleksiniń jańadan qurılǵanı, onlaǵan sawlatlı meshitler, diniy bilim mákemeleriniń qurılǵanı, zıyarat etiw dárgaylarınıń abat etilgeni mánawiy-ruwxıy turmısımızda ayrıqsha jarqın bet bolıp qaladı. Eń áhmiyetlisi, bunday keń kólemli jumıslarımız Ózbekstandaǵı Islam civilizaciyası orayı, Imam Buxariy estelik kompleksi sıyaqlı sawlatlı estelikler qurılısı mısalında jedel dawam ettirilmekte. Musılmanlarımızǵa ibadat ámellerin emin-erkin orınlawı ushın jáne de qolaylı sharayatlar jaratılmaqta. Bul haqqında sóz bolǵanda, umra zıyaratı boyınsha kvota biykar etilgeni, haj zıyaratına barıwshılar sanınıń 3 esege arttırılǵanın atap ótiw zárúr. Atap aytqanda, tek ǵana usı jıldıń ótken dáwirinde 31 mıńnan aslam watanlaslarımız Mekke hám Madinada muqaddes ibadatların orınlap, el-xalqımızǵa jaqsı niyetler tilep qaytqanın atap ótiw orınlı. Házirgi waqıtta elimizdegi mámleketlik hám mámleketlik emes shólkemler tárepinen muqaddes zıyaratlaw orınları abadanlastırılıp, járdemge mútáj adamlar, kem támiyinlengen shańaraqlarǵa materiallıq hám ruwxıy járdem kórsetilip atırǵanı da Ramazan ayınıń áhmiyeti hám bereketin arttırıwǵa xızmet etpekte. Olardıń barlıǵı mámleketimizde hújdan erkinligin támiyinlew, diniy-aǵartıwshılıq qádiriyatlardı tiklew hám qádirlew jolında alıp barılıp atırǵan háreketlerdiń ámeliy belgisi bolıp, biz bunday sawaplı islerdi keleshekte de úzliksiz dawam ettiremiz. Húrmetli doslar! Biz janajan Watanımızda tınıshlıq hám tatıwlıq, awızbirshilik hám tilekleslikti saqlaw, xalqımızdıń turmısın jáne de erkin, abat hám abadan etiwdi maqset etkenbiz, ótken dáwir dawamında erisken barlıq jetiskenliklerimiz, sonıń ishinde, hújdan hám isenim erkinligin támiyinlew baǵdarındaǵı unamlı ózgerislerdi hár tárepleme bekkemlep barıwımız kerek ekenligin, onı házirgi hám keleshektegi rawajlanıwımız talap etip atırǵanın hámmemiz jaqsı túsinemiz, álbette. Pursattan paydalanıp, búgin Ózbekstanda alıp barılıp atırǵan, insan qádiri, onıń huqıqları menen erkinlikleri, turmıslıq máplerin támiyinlewge qaratılǵan reformalarımızdıń jáne de nátiyjeli hám dawamlı bolıwı ushın jan kúydirip, óz táǵdiri menen keleshegine tereń juwapkershilik hám baylanıslılıq tuyǵısı menen jasap, pidayı miynet etip atırǵan barlıq watanlaslarımızǵa, kóp milletli pútkil xalqımızǵa shın kewilden minnetdarshılıq bildiremen. Áziz hám qádirli watanlaslar! Usı kóterińki demlerde dúnya musılmanların, dos hám birge islesiwshilerimizdi Ramazan bayramı menen qızǵın qutlıqlap olardıń mámleketleri hám xalıqlarına tınıshlıq-turaqlılıq, rawajlanıw hám abadanlıq tileymiz. Shańaraq dógereginde, máhállelerde múbárek Iyd-ál-fitr áyyyamın quwanısh penen kútip alıp atırǵan siz watanlaslarımdı jáne bir márte qutlıqlap, bársheńizge salamatlıq, baxıt-ıǵbal, shańaraqlarıńızǵa qut-bereket tileymen. Niyeti pák, maqsetleri ullı xalqımızdıń arzıw-úmitleri júzege shıqsın! Ramazan hayıtı bárshemizge múbárek bolsın!Shavkat Mirziyoev,
Ózbekstan Respublikası Prezidenti