Moynaqta Xalıqaralıq Araldı qutqarıw qorı dúzilgeniniń 30 jıllıǵı belgilendi

Moynaq rayonında Xalıqaralıq Araldı qutqarıw qorı dúzilgeniniń 30 jıllıǵı keń túrde belgilendi. Sáne múnásibeti menen student jaslar arasında "Aral boyı aymaǵın rawajlandırıwda innovaciyalıq sheshimler" atamasında ideyalar hám oqıwshı balalar arasında "Jańa Aral balalar názerinde" atamasında súwretler hám shıǵarmalar tańlawları shólkemlestirilip, tańlawlarda respublikamızdıń qala hám rayonlarınan kelgen ziyrek, dóretiwshi oqıwshılar, joqarı oqıw orınlarında bilim alıp atırǵan student jaslar ózara bellesti. Tańlawlar qatnasıwshıları 20-aprel kúni Moynaq rayonına keldi hám sol kúni "Aq keme" balalar orayında tańlawlarǵa start berilip, qatnasıwshılar tóreshiler quramı aǵzalarına dóretiwshilik jumısları hám innovaciyalıq ideaların tanıstırdı. 21-aprel kúni tańlawlar qatnasıwshılarınıń Moynaq rayonınıń dıqqatqa ılayıqlı, tariyxıy orınlarına sayaxatı shólkemlestirildi. Sayaxattan keyin tańlaw qatnasıwshılarınıń asıǵıp kútken máwritleri - sıylıqlaw saltanatı bolıp ótti. Ilajǵa kelgen miymanlar dáslep oqıwshılar, student jaslardıń jumısları menen jaqınnan tanıstı. Tańlawlar jeńimpazların sıylıqlaw saltanatında Qaraqalpaqstan Respublikası Joqarǵı Keńesi Baslıǵınıń orınbasarı Rustem Saparbaev sózge shıǵıp, Xalıqaralıq Araldı qutqarıw qorı dúzilgeniniń 30 jıllıq yubeleyi,  ramazan hayıt bayramı menen bársheni qızǵın qutlıqladı.

Ilaj dawamında tarawda pidayı miynet etip kiyatırǵan birqansha xızmetkerlerge kókirek nıshanları saltanatlı túrde tapsırıldı. Atap aytqanda, Xalıqaralıq Araldı qutqarıw qorı Nókis filialı bas esapshısı Zulfiya Doщanova Kalmuratovna "Qaraqalpaqstanǵa miyneti sińgen ekonmist", usı qordıń jetekshi qánigesi Doshtimov Bektursın Bekbawlievich, Araldı qutqarıw qorı Djef agentligi baslıǵı Sokolov Vadim Ilich "Watan pidayısı" kókirek nıshanları menen sıylıqlandı. Bunnan soń tańlawlar jeńimpazları oqıp esittirilip, 1-orın iyelerine 10 mln.swmlıq, 2-orın iyelerine 5 mln.swmlıq, 3-orın iyelerine 3 mln.swmlıq vaucherler saltanatlı túrde tapsırıldı.

Sonıń menen birge, tańlawlarǵa qatnasqan bárshe jaslar qor tárepinen tayarlanǵan húrmet jarlıǵı hám estelik sawǵaları menen sıylıqlandı. Bayram ilajı Moynaq rayonı Mádeniyat bólimi xızmetkerleriniń koncert baǵdarlaması menen dawam etti.  

Qaraqalpaqstan Respublikası Joqarǵı Keńesiniń Málimleme xızmeti