Qaraqalpaqstan Respublikası Joqarǵı Keńesiniń Baslıǵı respublikamızdıń eń shetki aymaqları bolǵan Shuqırqaq awılı turǵınları menen ushırastı

Búgingi kúnde xalqımızdıń turmıs abadanlıǵın támiyinlew, olardıń jasaw sharayatın jaqsılaw baǵdarında aytarlıqtay jumıslar ámelge asırılıp atır. Baslı maqset, puqaralarımızdıń kúndelikli aturmısınan razı etiw. Usı baǵdarda Qaraqalpaqstan Respublikası Joqarǵı Keńesiniń Baslıǵı Amanbay Orınbaev orınlarda kóshpeli qabıllawlar ótkerip, puqaralardı qıynap kiyatırǵan mashqalalarǵa sheshim tabıw ilajların kórip atır. Sonıń menen birge alıs aymaq turǵınlarınıń mashqalalarına sheshim tabıw ilajların kóriw boyınsha da orınlarǵa barıp, máselelerin úyrenbekte.

Usı maqsette Qaraqalpaqstan Respublikası Joqarǵı Keńesiniń Baslıǵı Amanbay Orınbaev 2022-jıldıń noyabr ayında Shuqırqaq awılı puqaraları menen ushırasqan edi. Búgin Joqarǵı Keńes Baslıǵı bolıp ótken ushırasıwda bildirilgen múrájatlardıń sheshimi hám juwapkerlerge berilgen tapsırmalardıń nátiyjesin kóriw ushın paytaxttan derlik 230 km qashıqlıqta jaylasqan Ellikqala rayonınıń Shuqırqaq awılına bardı hám elatta puqaralar menen kórisip, jaqınnan sáwbetlesti. Onda Ózbekstan Respublikası Oliy Majlis Nızamshılıq palatası spikeriniń orınbasarı Z.Ibragimova qatnastı.

Aytıp ótiw orınlı, Joqarǵı Keńes Baslıǵınıń aldınǵı jeke qabıllawında bildirilgen múrájatlardıń kópshiligi óz sheshimin taptı.  Sonnan, aymaqta bazar yarmarkasın shólkemlestiriw máselesi unamlı sheshildi hám turaqlı túrde yarmarka shólkemlestirilip kelinbekte. Aymaqqa kerek bolǵan quyash panelleriniń dizimi islep shıǵılıp, kem támiyinlengen 6 shańaraqqa, balalar baqshasına hám awıllıq shıpakerlik punktine quyash panelleri ornatıldı. Bostan qalasına barıp keliw ushın avtobus qatnawı jolǵa qoyılıp háptesine 1 márte turaqlı xızmet kórsetip kelmekte. Bunnan tısqarı, aymaqtaǵı shıpakerdiń aylıǵına qosımsha ústeme qosıp beriw máselesinde shıpaker Ibragimov Ǵayratqa 2022-jıl 18-noyabr sánesinen baslap ústeme haqı tólenenip kelinbekte. Sonday-aq, balalar ushın jańa “Workout” maydanshası qurıp pitkerildi. Suwdı filtrden ótkeriwshi EKOStıń 3 dana dvigateli ońlandı. Puqara A.Dawletovanıń jasap atırǵan úyiniń hújjetlerin rásmiylestiriw boyınsha kadastr hújjetleri rásmiylestirilip berildi. Ishki jollardı ońlaw máselesinde ЩPS aralaspasın jatqızıw jumısları alıp barılmaqta. Sonıń menen birge aymaq turǵınlarınıń múrájatı tiykarında jańa mektep imaratınıń qurılısıda baslap jiberilgen.

Búgingi ushırasıwda da bir qatar puqaralardıń tilek-ótinishleri tıńlandı hám óz náwbetinde Joqarǵı Keńes Baslıǵı tárepinen ornında sheship berildi. Máselen, Múrájat tiykarında Shuqırqaq awılında artezian qudıqları qazılıp, ishimlik suwı menen támiyinlew hám suwdı dushshılandırıwshı EKOS ushın quyash panelin qurıp beriw ushın qarjı ajıratıw boyınsha juwapkerlerge tapsırmalar. berildi. Búgingi kúnde ámelge asırılıp atırǵan barlıq reformalar hám ózgerisler puqaralarımızdıń turmıs abadanlıǵında óz sáwlesin tabıwı kerek hám bul ámelde shın mánisinde orınlanıp atır. Aymaqlarda puqaralarımızdıń turmıslıq mashqalalarına sheshim tabıw hám olardıń abadan turmısın támiyinlew jolındaǵı jumıslar elede dawam etedi.  

Qaraqalpaqstan Respublikası Joqarǵı Keńesiniń Málimleme xızmeti