Parijde «Salty Lives» (“Duzlı ómir”) art-joybarı prezentaciyası bolıp ótti

23-aprel kúni Parijde Uzbekistan’s Club dóretiwshilik klubı jámááti tárepinen shólkemlestirilgen «O’zbekistonlik. Generating Ideas» ("Ózbekstanlı. Ideyalardı jaratıw") xalıqaralıq Watanlaslar forumı bolıp ótti. Forumda túrli mámleketler hám tarawlarda xalıqaralıq tabıslarǵa erisken, jáhán dárejesindegi professionallarǵa aylangan 200 den artıq ózbekstanlı watanlaslar qatnastı. Forumǵa Ózbekstannıń kreativ hám media tarawınıń jetekshi wákilleri de keldi. Forumnıń tiykarǵı teması Aral regionı hám qurıp baratırǵan Aral teńizi boldı. Qaraqalpaqstan Respublikası Joqarǵı Keńesi menen birgelikte «Aral Dream» ("Aral arzıwı”) mámleketlik emes kommerciyalıq emes shólkemi «Salty Lives» (“Duzlı ómir”) triptix joybarın usındı. Onda Muxlisa Azizovanıń qaraqalpaqstanlı hayal-qızlardıń portretleri fotokórgizbesi, rejissyor Rustam Melievtiń jańa qısqa metrajlı filmi hám Aral teńizinen ilhamlanǵan Ózbekstannıń jetekshi dizaynerleri tárepinen jaratılǵan kiyim modelleri kórgizbesi bolıp ótti. «Salty Lives» joybarınıń maqseti – pútkil dúnyanıń itibarın aldın ǵalaba xabar qurallarında hám ǵalaba mádeniyatta jarıtılmaǵan temaǵa qaratıw: klimat ózgeriwiniń Aralboyı hayal-qızlarına qanday tásir etiwi haqqında aytıp beriw. Parij bul maqset ushın tosınnan tańlanbaǵan. Tilekke qarsı, dúnya jámiyetshiligi 2015-jılı Parij klimat kelisimi tárepinen atmosferaǵa uglerod shıǵındıların shıǵarıwdı kemeytiw boyınsha belgilengen maqsetlerdi nátiyjeli ámelge asıra almadı. Sonıń menen birge, Aral teńizi regionı planetamızdıń klimat ózgeriwi tásirinen eń kóp jábir kórgen, ázzi aymaqlarınan biri. Joybar avtorlarınıń pikirinshe, sanaatı rawajlanǵan mámleketler global ısıwdıń unamsız tásirin basınan keshirip atırǵan adamlarǵa kóbirek itibar beriwi kerek. Art-joybardıń birinshi bóliminde qaraqalpaqstanlı hayal-qızlardıń fotosúwret-portretleri kórgizbesi bolıp ótti. Avtor Muxlisa Azizova hám fotograf Rustam Meliev túrli jastaǵı hayallardı milliy qaraqalpaq kiyiminde Barsakelmestiń gózzal kebirliklerinde súwretke alǵan. Fotosúwretler xudojnik Abdurahmon Muxammadievtiń installyaciyasında jaylastırılǵan hám balıq awlaw torları menen bezelgen. Portretler kaharmanlardıń jasın kórsetetuǵın sózler menen tolıqtırılǵan. Joybardıń ekinshi bólimi – fotokórgizbe kaharmanları qatnasıwında Rustam Meliev hám operator Jahongir Ibragimov tárepinen súwretke alınǵan qısqa metrajlı film. Filmniń finalında Adham Abduraimovtıń avtorlıǵındaǵı muzıka menen sheber úylesken qaraqalpaq anasınıń pútkil insaniyatqa qaratılǵan monologı jańlaydı. Internette filmning premerasi 25-aprel kúni araldream.com. saytında bolıp ótedi. Kórgizbeniń úshinshi bólimin shólkemlestiriw ushın Ózbekstannıń jetekshi dizayner hám modelerleri birlesti. Forumda Aral teńizinen ilhamlanǵan kiyim modelleri toplami tanıstırıldı. Onı jaratıwda Dilnoza Umrzakovanıń Anor, Lali Fazilovanıń Lali, Zuxra Inattıń Moel Bosh, Nilufar Abduvalievanıń Mursak, Sarvinoz Anvarovaning Art ansar Moda úyleri, sonday-aq, dizaynerler Nigora Hoshimova hám Zulfiya Sulton qatnastı. Toplam Parijge Barsakelmes kebirliklerinen alıp kelingen duz járdeminde jaratılǵan arnawlı installyaciyada usınıldı. Installyaciya avtorı - Saidazim Fazılov. Aral Dream (Aral arzıwı) mámleketlik emes kommerciyalıq emes shólkeminiń tiykarǵı maqseti dúnya jámiyetshiligi itibarın Aral teńizi ekologiyalıq apatshılıǵına, Aralboyı aymaǵı hám Qaraqalpaqstan xalqına qaratıwdan ibarat. Aral Dream shólkemi tiykarshılarınıń pikirinshe, pútkil dúnya bul apatshılıqtı umıtqan hám sol sebepli Aral temasın jáhán ǵalaba xabar quralları hám ǵalaba mádeniyati kún tártibine alıp shıǵıw ushın háreket etpekte. Shólkemniń jáne bir áhmiyetli maqseti – aymaqta insan potencialın, birinshi gezekte kreativ industriyalardı, yaǵnıy dóretiwshilik tarawlardı rawajlandırıw bolıp esaplanadı. 2021-jılı Aral Dream jámááti Jeńisbek Piyazov hám ELEKTROOKO toparı qatnasıwında “Erteńgi kún” klipin dóretken edi, onda Aral teńizi kompyuter texnologiyaları járdeminde qaytqan edi. 2022-jılı bolsa ol Berlinde belgili aktyor Erkin Bozorovtıń qatnasıwındaǵı «Sho’rxok» filmin usındı. Film Amerika kinofestivallarında eki sıylıqqa miyasar bolǵan. Eki videonı da Aral Dream Youtube kanalında kóriwińiz múmkin.  

Qaraqalpaqstan Respublikası Joqarǵı Keńesiniń Málimleme xızmeti