Joqarǵı Keńes Baslıǵı ózi atalıqqa alǵan jaslardıń mashqalaların tıńladı
737
Búgingi kúnde elimizde jaslardı ozıq oylı, joqarı bilimli, fizikalıq jaqtan shınıqqan hám ruwxıy jetik insan etip tárbiyalaw, olardıń qábiletlerin júzege shıǵarıw ushın zárúr sharayatlar jaratıw boyınsha bir qatar ilajlar ámelge asırılıp kelinbekte. Húrmetli Prezidentimiz basshılıǵında jaslarǵa itibar mámleketlik siyasat dárejesine kóterilip, barlıq baǵdarlarda olar hár tárepleme qollap-quwatlanıp atır. Jaqında Prezidentimiz basshılıǵında bolıp ótken videoselektor májilisinde jaslar menen islesiwdiń jańa sisteması engizildi. Oǵan bola 14-30 jas aralıǵındaǵı jaslar sociallıq jaǵdayı, qábileti hám qızıǵıwshılıqlarınan kelip shıǵıp úsh kategoriyaǵa ajıratıldı. Mámlekettiń itibarı hám járdemine mútáj bolǵan jaslar Joqarǵı Keńes Baslıǵı, sektor basshıları, ministrlikler menen qala hám rayon hákimlerine biriktirildi. Usı tiykarda respublikamızda jaslar menen individual islew sisteması jaratılmaqta. Qaraqalpaqstan Respublikası Joqarǵı Keńesiniń Baslıǵı Amanbay Orınbaev ózi atalıqqa alǵan 70 jas penen ushırasıp, olardıń mashqala hám usınısların tıńladı. Ótkerilgen ushırasıwda jaslar menen jaqınnan pikirlesilip, olardıń tilek-ótinishleri, sonday-aq, turmısında ushırasıp atırǵan mashqalaları tıńlandı. Densawlıǵın bekkemlew, bántligin hám ózin ózi bánt etiwin támiyinlew, sociallıq qollap-quwatlaw, oqıw ushın kontrakt pulların tólep beriw, oqıwǵa kiriw ushın arnawlı tayarlaw kursları sıyaqlı bir qatar máseleler jaslar hám olardıń ata-anaları tárepinen kóterildi. Óz náwbetinde Joqarǵı Keńes Baslıǵı bul mashqalalarǵa sheshim tabıwda barlıq ilajlar kóriletuǵınlıǵın atap ótti.
Ushırasıw ashıq-aydın pikirlesiw usılında bolıp, járdemge mútáj jaslar hám olardıń ata-anaları tárepinen pikir-usınıslar bildirildi. Olardıń máseleleri belgilep alınıp, sheshimin tabıw boyınsha mánzilli rejege kirgizildi.
Aytıp ótiw kerek, bul da óz náwbetinde elimizde jaslarǵa bolǵan itibardiń bir kórinisi esaplanadı. Jaslardıń mashqalalarına sheshim tabıw boyınsha ámeliy ilajlar dawam ettirilmekte.
Qaraqalpaqstan Respublikası Joqarǵı Keńesiniń Málimleme xızmeti