Ózbekstan Respublikası Prezidenti sırt el delegaciyaları basshıların qabılladı

Ózbekstan Respublikası Prezidenti Shavkat Mirziyoev 27-aprel kúni ekinshi Tashkent xalıqaralıq investiciyalıq forum sheńberinde Islam rawajlanıw banki prezidenti Muhammed bin Sulayman al-Jassir, Qırǵız Respublikası Ministrler Kabineti Baslıǵı – Prezident Administraciyası basshısı Aqılbek Japarov, Birlesken Arab Ámirlikleri energetika hám infrastruktura ministri Suxayl al-Mazruiy, Vengriya ekonomikalıq rawajlanıw ministri Marton Nad, Saudiyanıń «ACWA Power» kompaniyasınıń basqarma baslıǵı Muhammed Abdulla Abunayyan hám BMSh Bas xatkeriniń orınbasarı, Evropa ekonomikalıq komissiyası (EEK) Atqarıwshı xatkeri Olga Algaerova menen ushırasıwlar ótkerdi.

Islam rawajlanıw bankiniń prezidenti Muhammed bin Sulayman al-Jassir menen ushırasıwda jańa orta múddetli sheriklik baǵdarlaması sheńberinde Bank toparı menen keń kólemli birge islesiwdi jáne de keńeytiw máseleleri dodalandı.

Házirgi kúnde birgeliktegi joybarlar portfeli ekonomikanıń tiykarǵı tarmaqların qamtıp alǵan halda 1,3 milliard dollardan artqanı qanaatlanıwshılıq penen atap ótildi. Forum sheńberinde awıl hám transport infrastrukturasın modernizaciyalaw, mektepke shekemgi bilimlendiriwdi rawajlandırıw boyınsha joybarlardı ámelge asırıw boyınsha ulıwma bahası 400 million dollarlıq kelisimlerge qol qoyıldı.

Ushırasıwda ámeliy birge islesiwdi rawajlandırıw, isbilermenlik hám jeke menshik investiciyalardı qollap-quwatlaw, qarjı mexanizmlerin jetilistiriw, Bank strukturaların joybarlaw jumıslarına belsene tartıw baǵdarında anıq joybarlardı alǵa qoyıw, sonday-aq, mámleketimizdiń JSShǵa qosılıwı hám innovaciyalıq ekosistemanı jaratıw máselelerinde texnikalıq járdemdi keńeytiwge ayrıqsha itibar qaratıldı. Qırǵız Respublikası Ministrler Kabinetiniń Baslıǵı – Prezident Administraciyasınıń basshısı Aqılbek Japarov penen ushırasıwda Ózbekstan-Qırǵızstan kóp tárepleme birge islesiwine baylanıslı ámeliy máseleler dodalandı.

Eki tárepleme qatnasıqlardıń házirgi joqarı dárejesi qanaatlanıwshılıq penen atap ótildi. Jedel qarım-qatnas dawam ettirilmekte, áhmiyetli ekonomikalıq hám gumanitarlıq baǵdarlamalar ámelge asırılmaqta. Jaqında Osh qalasında Zahiriddin Muhammed Babur atındaǵı teatrdıń jańalanǵan imaratı saltanatlı ashıldı, Qoqand qalasında bolsa sportshılardıń spartakiadası tabıslı ótkerildi. Aymaqlar forumı hám Áwladlar ushırasıwın ótkeriwge puqta tayarlıq kórilmekte.

Mámleketimizde avtomobil qurılısı, energetika, transport infrastrukturası, paytaxtlarda sawda úylerin ashıw boyınsha kooperaciyalıq joybarlardı tezlestiriw zárúr ekenligin atap ótti.

Birlesken Arab Ámirlikleri energetika hám infrastruktura ministri Suxayl al-Mazruiy menen ushırasıwda Ózbekstan – BAÁ kóp tárepleme birge islesiwi sheńberindegi joybarlardı alǵa qoyıw máseleleri kórip shıǵıldı.

Sóylesiwler aldında ministr al-Mazruiy mámleketimiz basshısına Prezident Sheyx Muhammed Ol Nahayan hám Vice-prezident, Bas ministr, Dubay Ámiri Sheyx Muhammed Ol Maktumnıń sálemin jetkerdi.

Eki tárepleme qatnasıqlar rawajlanıwınıń házirgi joqarı páti úlken qanaatlanıwshılıq penen atap ótildi. Keyingi bir neshe jılda tovar almasıw eki esege arttı, 50 jańa kárxana shólkemlestirildi, investiciyalıq joybarlar portfeli 3 milliard dollardan arttı. Birgeliktegi investiciyalıq kompaniya tabıslı jumıs alıp barmaqta. Bolajaq joqarı dárejedegi ushırasıwlarǵa tayarlıq kóriw hám olardı anıq mazmun menen bayıtıw maqsetinde Ózbekstan jetekshisi «jasıl ekonomika», energetika, transport hám logistika, awıl xojalıǵı, infrastruktura hám basqa da tiykarǵı baǵdarlarda perspektivalı joybarlardı ámelge asırıw zárúr ekenligin atap ótti.

Vengriya ekonomikalıq rawajlanıw ministri Marton Nad penen ushırasıwda mámleketlerimiz arasındaǵı sawda-ekonomikalıq birge islesiwdi jáne de rawajlandırıwdıń birinshi gezektegi ilajları dodalandı.

Ilajlar hám aymaqlar dárejesindegi kooperaciyanı túpkilikli keńeytiwge ayrıqsha itibar qaratıldı. Jaqın aylarda tikkeley aviaqatnawlardı jolǵa qoyıw, tereńlesken sanaat kooperaciyası ushın mólsherlengen struktura shártlerin tez waqıt ishinde kelisiw hám jumısın baslaw áhmiyetli ekeni atap ótildi.

Awıl xojalıǵı, farmacevtika, transport hám kommunikaciyalar, nátiyjeli qarjı mexanizmlerin jaratıw baǵdarındaǵı joybarlardı tayarlaw hám ámelge asırıw jumısların tezlestiriwge kelisip alındı.

Saudiyanıń «ACWA Power» kompaniyasınıń basqarma baslıǵı Muhammed Abdulla Abunayyan menen ushırasıwda házirgi joybarlardı ámelge asırıw máseleleri hám sheriklikti túp-tiykarınan keńeytiw imkaniyatları kórip shıǵıldı.

Mámleketimiz basshısı Ózbekstannıń «jasıl energetika» tarmaǵınıń rawajlanıwına eń kóp investiciya kirgizip atırǵan bul kompaniya menen birge islesiw nátiyjeli bolıp atırǵanın qanaatlanıwshılıq penen atap ótti.

Házirgi kúnde alternativ energetika tarawında 7,5 milliard dollarlıq joybarlar ámelge asırılmaqta. Bunnan tısqarı, quyash hám samal elektr stanciyaların qurıw, «jasıl vodorod» islep shıǵarıw boyınsha jańa joybarlar jedel tayarlanbaqta. Sóylesiw waqtında kooperaciyanı jáne de tereńlestiriw, birinshi gezekte innovaciyalıq joybarlardı, sonıń ishinde, Ózbekstan – Saudiya Isbilermenler keńesi sheńberinde ámelge asırıw perspektivaları dodalandı.

BMSh Bas xatkeriniń orınbasarı, Evropa ekonomikalıq komissiyası (EEK) Atqarıwshı xatkeri Olga Algaerova menen ushırasıwda Turaqlı rawajlanıw maqsetlerine jedel erisiw baǵdarında BMSh institutları, sonıń ishinde, EEK menen kóp tárepleme birge islesiwdi rawajlandırıw máseleleri kórip shıǵıldı.

Oraylıq Aziya regionı mámleketleri ushın arnawlı baǵdarlama sheńberinde nátiyjeli birge islesip atırǵanı qanaatlanıwshılıq penen atap ótildi. Tárepler Ózbekstannıń Jáhán sawda shólkemine aǵza bolıwı hám «Jasıl mákan» baǵdarlamasın, júk tasıwlardı sanlastırıw hám toqımashılıq sanaatı joybarların ámelge asırıw máselelerinde almasıwlardı dawam ettiriwden mápdar ekenin atap ótti.

Sáwbette BMSh EEK menen tiykarǵı baǵdarlarda birge islesiwdi jáne de keńeytiw máseleleri de dodalandı.