Ózbekstan Prezidentiniń Germaniyaǵa saparı baslandı

Ózbekstan Respublikası Prezidenti Shavkat Mirziyoev ómirlik joldası menen birge Germaniya Federal Prezidenti Frank-Valter Shtaynmayerdiń mirát etiwine bola 2-may kúni sapar menen Berlinge keldi. «Berlin-Brandenburg» aeroportında Ózbekstan jetekshisiniń saparı múnásibeti menen eki mámleket bayraqları kóterildi, húrmetli qarawıl sap tarttı. Ullı mártebeli miymandı Germaniyanıń rásmiy shaxsları kútip aldı.

Ózbekstan Respublikası Prezidenti Shavkat Mirziyoevtiń Germaniyaǵa saparı usı mámleket Federal Kancleri Olaf Sholc penen sóylesiwlerden baslandı. Ushırasıw aldında mámleketimiz basshısı Germaniya Kanclerine shın júrekten qabıllaǵanı ushın minnetdarshılıq bildirdi. Ózbekstan Germaniyanı óziniń isenimli hám strategiyalıq birge islesiwshisi sıpatında qabıllaytuǵını, mámleketlerimizdi tereń tariyxıy tamırlar baylanıstırıp turǵanı atap ótildi. Keyingi jılları eki tárepleme qatnasıqlar barlıq baǵdarlarda jedel rawajlanıp barmaqta.

Óz-ara tovar almasıw hám birgeliktegi joybarlar sanınıń eki esege artqanı qanaatlanıwshılıq penen atap ótildi. Germaniyadan Ózbekstanǵa investiciyalar kólemi 5,5 milliard dollarǵa jetti, sonnan 4 milliard dollar sońǵı 6 jılda tartılǵan. Sapar sheńberinde ótken birgeliktegi biznes-forum joqarı bahalandı. Onıń juwmaǵında ulıwma bahası 9 milliard dollarlıq sawda, investiciyalıq hám texnologiyalıq joybarlardı ámelge asırıw boyınsha kelisimlerge erisildi. «Jasıl energetika», qazıp shıǵarıw, ximiya, farmacevtika tarmaqlarında, transport infrastrukturasın rawajlandırıw, awıl xojalıǵın sanlastırıw, innovaciya hám basqa tarawlardaǵı kooperaciyalıq joybarlar usılardıń qatarına kiredi.

Germaniya kompaniyalarınıń Ózbekstandaǵı joybarların qollap-quwatlaw maqsetinde «KfW», «Deutsche Bank» bankleri hám Germaniya xalıqaralıq birge islesiw jámiyeti menen keń kólemli sheriklikti rawajlandırıwǵa kelisip alındı. Germaniya húkimeti Ózbekstannıń JSShǵa qosılıwın hám Evropa Awqamı menen Keńeytilgen sheriklik hám birge islesiw haqqındaǵı kelisimge imkanı barınsha tez qol qoyıwın bunnan bılay da qollap-quwatlawǵa tayar ekenligi bildirildi. Siyasiy qarım-qatnastı dawam ettiriw áhmiyetli ekenligi atap ótildi. Tárepler sapar waqtında Kóp táreplemeli birge islesiwdi jáne de tereńlestiriw haqqında Húkimetler aralıq deklaraciyaǵa qol qoyılıwın alǵısladı.

Olaf Sholc Ózbekstannıń Orta Aziyada doslıq hám óz-ara isenim ortalıǵın jaratıw, integraciyanı tereńlestiriw boyınsha jańa regionallıq siyasatın qollap-quwatladı. «Germaniya-Oraylıq Aziya» formatında qarım-qatnas maydanın iske qosıwǵa kelisip alındı. Regionda, sonıń ishinde, Awǵanstandaǵı jaǵdaydı esapqa alǵan halda qáwipsizlikti támiyinlew máseleleri dodalandı. Bul mámleket ushın gumanitarlıq joybarlardı dawam ettiriw, sonıń ishinde, Termizdegi logistika kompleksi hám Awǵan jasları ushın bilimlendiriw orayınıń imkaniyatlarınan paydalanıw zárúr ekenligi atap ótildi. Transport hám logistikanı rawajlandırıw máselelerine ayrıqsha itibar qaratıldı. Tárepler Oraylıq Aziyanı Evropa menen baylanıstıratuǵın nátiyjeli jónelisti qáliplestiriwge xızmet etiwshi Transkaspiy jolın birgelikte rawajlandırıw boyınsha birdey pikir bildirdi.

Mádeniy-gumanitarlıq birge islesiwdiń kún tártibiniń bay ekeni qanaatlanıwshılıq penen atap ótildi. Germaniya tárepi usı kúnleri Berlin qalasında Ózbekstannıń mádeniy miyrasına baǵıshlap ashılıp atırǵan biybaha kórgizbeni joqarı bahaladı. Ózbekstanda nemis tilin úyreniwge qızıǵıwshılıq artıp atırǵanı qanaatlanıwshılıq penen atap ótildi. Germaniya húkimeti mámleketimiz aymaqlarında nemis tilin oqıtıwdı keńeytiwge texnikalıq járdem kórsetiwi haqqında kelisip alındı. Ulıwma, sapar sheńberinde ekonomika, sawda, qarjı, bilimlendiriw, ilim hám innovaciya tarawlarında 16 húkimetler aralıq hám uyımlar aralıq hújjetlerge qol qoyıldı. Ushırasıw sońında mámleketimiz basshısı Germaniya Federal Kancleri Olaf Sholctı sapar menen Ózbekstanǵa keliwge mirát etti. Ózbekstan Respublikası Prezidentiniń Germaniyaǵa saparı dawam etpekte.