Respublikamız aymaǵında ishimlik suw támiynatın jaqsılaw baǵdarında ámelge asırılıp atırǵan jumıslarǵa arnalǵan «Media-tur» hám «Baspasóz konferenciya»sı bolıp ótti
960
«Qaraqalpaq suw támiynatı» juwapkershiligi sheklengen jámiyetiniń 2022-jıl juwmaǵı hám 2023-jılda ámelge asırılıwı rejelestirilgen jumısları boyınsha Media-tur shólkemlestirildi. Onda ǵalaba xabar quralları wákilleri, jurnalist hám blogerler qatnastı. Dáslep qatnasıwshılar Nókis suw tazalaw obektine bardı hám usı jerde ámelge asırılıp atırǵan qurılıs-ońlaw jumısları menen tanıstı.
Búgingi kúnde Nókis suw tazalaw obektinde 2-basqıshta rekonstrukciyalaw jumısları alıp barılıp atırǵan bolıp, obektti tolıq rekonstrukciyalaw ushın Ózbekstan Respublikası Prezidentiniń 2022-jıl 30-dekabr kúngi “2023-2025-jıllarda Ózbekstan Respublikasınıń ekonomikalıq hám islep shıǵarıw infrastrukturasın rawajlandırıw is-ilájları haqqında”ǵı PQ-465-sanlı qararına muwapıq 74,9 mlrd. sum qarjı ajıratılǵan. Joybar sheńberinde qurılıs jumısları tolıq juwmaqlanǵannan soń obekt quwatlılıǵı sutkasına 65 mıń m3 tan 95 mıń m3 qa jetkeriliwi rejelestirilmekte. Nókis suw tazalaw obektinde ishimlik suwı 3 basqıshlı tazalawdan ótkeriledi. Yaǵnıy, bunda «Tındırıw», «Filtrlew» hám «Zıyansızlandırıw» basqıshlarında tazalanǵan hám zıyansızlandırılǵan suw nasos obektleri arqalı tutınıwshılarǵa jetkerip beriledi.
Bunnan soń, «Media-tur» qatnasıwshıları Nókis suw tazalaw obektindegi labaratoriya jumısları menen jaqınnan tanıstı. Bul jerde taraw qánigelerinen ózlerin qızıqtırǵan sorawlarǵa juwap alıp, tutınıwǵa usınılıp atırǵan suwdıń sapasın tekseriw jumısların kózden ótkerdi. «Media-tur» dawamında Qaraqalpaq suw támiynatı» JShJ janındaǵı Xiymiyalıq-bakteriologiyalıq laboratoriyanıń jumıs alıp barıwı procesi menen jaqınnan tanıstı.
Jetkerip berilip atırǵan ishimlik suwı sapası jamiyetke qaraslı oraylıq ximiyalıq-bakteriologiyalıq laboratoriya tárepinen gigienalıq talaplar xám sapasın qadaǵalaw normalarına muwapıqlıǵın 26 túrdegi ximiyalıq-bakteriologiyalıq analizler tiykarında tekserip barıladı. Bunnan tısqarı, 19 aymaqlıq ximiyalıq-bakteriologiyalıq laboratoriyalar da jumıs alıp barıp atırǵan bolıp, laboratoriyalar zamanagoy áspab-úskeneler menen támiyinlengen.
Xalıqtı sapalı ishimlik suw menen támiyinlewde sanitar-gigienialıq tárepten qadaǵalawdı ele de jaqsılaw maqsetinde Mámleketlik arnawlı baǵdarlamalar sheńberinde ótken jıllar dawamında Shımbay, Bozataw rayonlarında tazadan laboratoriya qurılıp, Kegeyli, Xojeli, Taxtakópir rayonlarındaǵı laboratoriyalarda rekonstrukciya jumısları ámelge asırıldı. Usı jumıslar tiykarında 71 túrdegi ásbap-úskeneler xám ólshew ıdısları menen támiyinlengen. Bunnan soń, ǴXQ wákilleri, jurnalist, blogerler hám «Qaraqalpaq suw támiynatı» JShJ basshıları, tiyisli taraw wákilleri qatnasıwında baspasóz konferenciyası shólkemlestirildi. Onda búgingi kúnde xalıqtı ishimlik suwı menen támiyinlew baǵdarında ámelge asırılıp atırǵan jumıslar, mámleketlik baǵdarlamalar boyınsha alıp barılıp atırǵan jańalanıwlar haqqında keń túrde maǵlıwmat berildi.
Búgingi kúnde Qaraqalpaqstan Respublikası xalqınıń ishimlik suwı menen támiyinlengenlik dárejesi 70,5%ti quraydı. Bıyılǵı jılı respublika turǵınlarınıń ishimlik suw támiyinatın ele de jaqsılaw maqsetinde ulıwma joybar baxası 211,8 mlrd. sum qarjılar tiykarında jámi uzınlıǵı 383,8 km ishimlik hám aqaba suw tarmaqları hámde 24 dana suw obektlerinde qurılıs-montaj jumısları ámelge asırılmaqta. Xalqımızǵa sapalı ishimlik suwın jetkerip beriw maqsetinde xalıqaralıq finans institutları qatnasıwında da bir qatar joybarlar ámelge asırılmaqta. Atap aytqanda, Ózbekstan Respublikası Prezidentiniń 2019-jıl 9-aprel kúngi PQ-4271 sanlı qararı tiykarında “Ózbekstannıń batıs aymaǵında ishimlik suw támiynatın rawajlandırıw” joybarı boyınsha bir qatar jumıslar orınlanıp atır. Joybar tiykarında “Túyemoyın” suw tazalaw obektin (quwatlılıǵı sutkasına 140,0 mıń m3), “Taqıyatas” suw tazalaw obektin rekonstrukciyalaw (quwatlılıǵı sutkasına 120,0 mıń m3) hám “Manǵıt” suw tazalaw obektin jańadan qurıw (quwatlılıǵı sutkasına 40,0 mıń m3) jumısları hámde Respublikamızdıń 6 rayonında (Ámiwdarya, Beruniy, Qaraózek, Qońırat, Moynaq hám Nókis rayonları) uzınlıǵı 1236 km ishimlik suw tarmaqları menen 26 dana ishimlik suw obektlerin qurıw hámde rekonstrukciyalaw jumısların ámelge asırıw rejelestirilgen. Bul jumıslar ámelge asırılıwı nátiyjesinde usı jıl juwmaǵı menen aymaqlarda jasawshı 75,5 mıń turǵınlar qosımsha ishimlik suwı menen támiyinlenip, 138,6 mıń turǵınlardıń suw támiynatı jaqsılanıwı hámde respublikanıń suw menen támiyinlengenlik dárejesi 74,3 % ke jetkeriliwi kútilmekte. Baspasóz konferenciyası dawamında jurnalist hám blogerler ózlerin qızıqtırǵan sorawlarǵa juwaplar aldı.
Qaraqalpaqstan Respublikası Joqarǵı Keńesiniń Málimleme xızmeti