Ózbekstan Respublikası Prezidentiniń qararı
Respublikamızdıń turizm potencialınan tolıq hám nátiyjeli paydalanıw, birinshi gezekte transport-logistika hám turizm infrastrukturasındaǵı mashqalalardı jedel sheshiw, sonday-aq, házirgi resurslar hám imkaniyatlardan hár tárepleme paydalanıw esabınan turizm tarawında jumıs alıp barıp atırǵan isbilermenlik subektleri ushın qosımsha sharayatlar jaratıw maqsetinde:
- Tómendegiler:
2023-jılı Qaraqalpaqstan Respublikası, wálayatlar hám Tashkent qalasında turizmdi rawajlandırıwdıń
maqsetli kórsetkishleri 1-qosımshaǵa muwapıq tastıyıqlansın;
2023-jıl báhár-jaz máwsiminde hawa hám temir jollar arqalı jolawshılar tasıwdıń
maqsetli kórsetkishleri 2a hám 2b-qosımshalarǵa muwapıq;
2023-jılı respublikamız aymaǵındaǵı turizm hám mádeniy miyras obektlerine alıp barıwshı avtomobil jolların ońlaw jumıslarınıń
mánzilli dizimi 3-qosımshaǵa muwapıq;
2023-jıl turizm tarawındaǵı resurslar menen imkaniyatlardan hár tárepleme paydalanıw hám mashqalalardı jedellik penen sheshiw boyınsha
«jol kartası» 4a-qosımshaǵa muwapıq;
2023-jılı turizm tarawında ótkeriletuǵın
mádeniy-kewil ashar ilajlar boyınsha «jol kartası» 4b-qosımshaǵa muwapıq;
Qaraqalpaqstan Respublikası, wálayatlar hám Tashkent qalasında turizmdi rawajlandırıw boyınsha 2023-jılı
ámelge asırılatuǵın ilajlar rejeleri 5a-5b-qosımshalarǵa muwapıq tastıyıqlansın.
- Mámlekettiń turizm tarawın rawajlandırıw boyınsha respublikalıq jumısshı topar (keyingi orınlarda – Respublikalıq jumısshı topar) 6-qosımshaǵa muwapıq quramda hám aymaqlıq jumısshı toparlar (keyingi orınlarda – Aymaqlıq jumısshı toparlar) 7-qosımshaǵa muwapıq úlgidegi quramda shólkemlestirilsin.
- Joqarı bilimlendiriw, ilim hám innovaciyalar ministrligi, Mádeniyat hám turizm ministrligi, Transport ministrligi, Ózbekstan xalıqaralıq islam akademiyası sonday-aq, respublikamızdaǵı joqarı bilimlendiriw shólkemleriniń aymaqlardıń turizm potencialın arttırıwǵa járdemlesiw maqsetinde joqarı bilimlendiriw shólkemlerine tiyisli aymaqlardı biriktiriw haqqındaǵı usınısları maqullansın.
- Joqarı bilimlendiriw shólkemlerine biriktirilgen aymaqlar dizimi 8-qosımshaǵa muwapıq tastıyıqlansın hám bul joqarı bilimlendiriw shólkemlerine aymaqtıń turizm potencialın arttırıw boyınsha tómendegi wazıypalar júklensin:
aymaqtıń turizm potencialın úyreniw, aymaq hám onıń tariyxı, turistlik obektleri hám ózine tán ózgeshelikleri haqqında hár qıylı tillerde kontentler jaratıw, olardı úgit-násiyatlaw sonday-aq, turpaketler jaratıwda járdem kórsetiw;
teoriyalıq bilim hám ámeliyattıń sáykesligin támiyinlegen halda professor hám oqıtıwshılardıń izlenisleri, studentlerdiń turizm tarawındaǵı teoriyalıq bilimlerin ámeliyatta qollanıw imkaniyatların keńeytiw;
aymaqlardaǵı xalıq tárepinen turizm xızmetlerin kórsetiw sapasın jaqsılaw hám kadrlardıń mamanlıǵın arttırıwda járdemlesiw.
- Ózbekstan Respublikasınıń sırt ellerdegi diplomatiyalıq wákilxanaları tárepinen 2023-jılı sırt el turistlerin Ózbekstanǵa tartıw boyınsha reje-keste 9-qosımshaǵa muwapıq tastıyıqlansın.
- Tómendegilerge:
a)
Respublikalıq jumısshı topar (A.Aripov, A.Abduxakimov)ǵa:
usı qarar hám oǵan qosımshalarda belgilengen maqsetli kórsetkishler hám ilajlardıń orınlanıwın
qadaǵalaw sonday-aq, bul baǵdardaǵı jumıslardı
hár ayda keminde bir márte dodalap barıw;
Qaraqalpaqstan Respublikası Ministrler Keńesi Baslıǵı, wálayatlar hám Tashkent qalası hákimleri, tiyisli ministrlik hám uyımlar basshılarınıń turizm tarawında ámelge asırılǵan jumıslar boyınsha esabatların tıńlaw;
turizm tarawında payda bolıp atırǵan mashqalalardı operativ saplastırıw hám keleshekte olardıń aldın alıw, Mádeniyat hám turizm ministrligi sonday-aq, basqa da ministrlik hám uyımlardıń jumısın muwapıqlastırıw;
hár sherekte mámlekettiń turizm potencialın arttırıw boyınsha esabattı Ózbekstan Respublikası Prezidenti Administraciyasına kirgizip barıw;
b)
Aymaqlıq jumısshı toparlarǵa:
Mádeniyat hám turizm ministrligi aymaqlıq bólimleriniń orınlarda turizm tarawında jaratılǵan sharayatlar, jergilikli hám sırt el turistlerin tartıw baǵdarında ámelge asırılǵan jumıslar boyınsha
eki háptede bir márte málimlemesin tıńlaw;
orınlarda turizm tarawındaǵı mashqalalardı izbe-iz dodalap barıw, turistlik potencialdı arttırıw boyınsha juwapkerlerdi belgilengen halda ilajlardı tastıyıqlaw hám olardıń orınlanıwın óz waqtında hám sapalı támiyinlew;
aymaqtıń turistlik potencialın arttırıw, jergilikli hám sırt el turistleriniń sanın kóbeytiw boyınsha usınıslar tayarlaw;
v) Qaraqalpaqstan Respublikası Ministrler Keńesi Baslıǵı, wálayatlar hám Tashkent qalası hákimlerine – usı qararǵa 1-qosımshada belgilengen turizmdi rawajlandırıw boyınsha maqsetli kórsetkishlerge erisiw;
g) transport ministri I.R.Maxkamovqa – usı qararǵa 2a hám 2b-qosımshalarda belgilengen jolawshılar tasıwdıń maqsetli kórsetkishlerine erisiw;
d) mádeniyat hám turizm ministriniń birinshi orınbasarı U.A.Azamov hám juwapker ministrlik hám uyımlardıń basshılarına – usı qararǵa 4a hám 4b-qosımshalarda belgilengen ilajlardı óz waqtında hám sapalı orınlaw wazıypaları júklensin.
- Transport ministrligi janındaǵı Avtomobil jolları komiteti Mádeniyat hám turizm ministrligi menen birgelikte 2023-jıl Mámleketlik byudjet parametrlerinde avtomobil jolların qurıw-ońlaw jumısları ushın názerde tutılǵan qarjılar sheńberinde usı qararǵa 3-qosımshaǵa muwapıq tastıyıqlanǵan turizm hám mádeniy miyras obektlerine alıp barıwshı avtomobil jolların ońlaw jumıslarınıń ámelge asırılıwın támiyinlesin.
- Ekonomika hám qarjı ministrligi Transport ministrligi menen birgelikte eki ay múddette 2023-jıl ushın Mámleketlik byudjetten jergilikli aviaqatnaw jónelislerin subsidiyalaw ushın qosımsha 30 milliard sum muǵdarında qarjı ajıratıwdı názerde tutıwshı nızam joybarın Ministrler Kabinetine kirgizsin.
Transport ministrligi Ekonomika hám qarjı ministrligi menen kelisilgen halda reyslerdi olardıń bántliginen kelip shıǵıp subsidiyalaw mexanizmlerin anıqlaytuǵını belgilensin.
- Sonday tártip ornatılsın, oǵan bola 2023-jıl 1-maydan baslap
2024-jıl 1-iyulge shekem tájiriybe túrinde turoperator xızmetlerin kórsetiwshi isbilermenlik subektlerine olar tárepinen 5 hám onnan artıq rezident emeslerge xızmetler kórsetiwdi názerde tutıwshı turpaketler (jaylastırıw, avtomobil yamasa temir jol transportı, ekskursiya hám awqatlanıw boyınsha xızmetler qamtıp alınǵan) boyınsha sırt elli sheriklerge berilgen esap bet-fakturada kórsetilgen qosımsha qun salıǵınıń
20 procent muǵdarındaǵı qarjılar
respublikalıq byudjetten subsidiya sıpatında azaytıladı;
2026-jıl 1-mayǵa shekem jergilikli turoperatorlar, turizm tarawında jaylastırıw xızmetlerin kórsetiwshi yamasa avtomobil transportında jolawshılardı tasıw menen shuǵıllanıwshı isbilermenlik subektlerine óz jumısında jolawshılardı tasıw menen shuǵıllanıwshı isbilermenlik subektlerine óz jumısında jolawshılardı tasıwda paydalanılatuǵın hám aydawshı menen birge on hám onnan artıq orınlıqqa iye bolǵan sonday-aq, islep shıǵarılǵanına 5 jıldan artıq bolmaǵan transport quralların (TIF TN kodları 8702 10, 8702 40, 8702 90) Ózbekstan Respublikası aymaǵına alıp kiriwde qosımsha qun salıǵın procentler esaplanbaǵan hám olardıń tóleniwin támiyinlew talap etilmegen halda
12 ay múddetke bólip-bólip tólew huqıqı beriledi.
- Ózbekstan Respublikasınıń turizm ónimin sırt el turizm bazarlarında úgit-násiyatlawǵa 2023-jılı 50 milliard sum ajıratılǵanlıǵı muǵlıwmat ushın qabıl etilsin.
Mádeniyat hám turizm ministrligi:
a)
bir ay múddette:
mápdar ministrlik hám uyımlar menen birgelikte muzey hám teatrlardıń dem alıs hám bayram kúnlerinde, sonday-aq, keliwshiler ushın qolaylı waqıtlarda islewin támiyinlesin;
ministrliktiń birden-bir Call-orayında kórsetilip atırǵan xızmetler túrlerin keńeytiw ilajaların kórsin;
b)
2023-jıl 1-iyunǵa shekem Ózbekstan Respublikasınıń milliy turizm ónimleri hám xızmetlerin xalıqaralıq abıraylı turistlik hám marketing platformalarında reklama etiw qárejetlerin qaplap beriw tártibin tastıyıqlasın.
Hár jılı Mámleketlik byudjetten Turizmdi qollap-quwatlaw qorına Ózbekstan Respublikasınıń turizm ónimin sırt el turizm bazarlarında úgit-násiyatlaw ushın ajıratılatuǵın qarjılar Mádeniyat hám turizm ministrligi janındaǵı «Milliy PR-orayı» MUKǵa belgilengen wazıypalardı ámelge asırıw ushın ótkerip beriletuǵını belgilensin.
- Transport ministrligi:
a)
bir hápte múddette «Samarqand» xalıqaralıq aeroportında engizilgen «Ashıq aspan» rejimi sheńberinde sırt el aviakompaniyaları ushın reysler hám jónilislerge bolǵan sheklewlerdi alıp taslasın hám «besinshi hawa erkinligi»n qollansın, sonday-aq, sırt ellerdiń aviaciya hákimshilikleri, sırt el aviatasıwshıların bul haqqında belgilengen tártipte xabardar etsin:
b)
2023-jıl 1-maydan « Uzbekistan Airports » AJ menen birgelikte:
Ferǵana, Namangan yamasa Ándijannan Buxara, Samarqand, Termiz, Úrgenshke, sonday-aq, Termiz-Nókis, Samarqand-Úrgensh , Buxara-Úrgensh, Ferǵana-Úrgensh sıyaqlı jónelisler boyınsha turaqlı aviareyslerdi jolǵa qoysın;
Tashkentten Nókis, Úrgensh, Buxara, Qarshı hám Samarqandqa aviaqatnawlardı jolǵa qoyıp, ámeldegiden eki esege shekem arzan tariflerdi engizsin;
v) jańadan shólkemlestirilgen rezident aviakompaniyalarǵa
sırt el jónelislerinde párwazlardı ámelge asırıw ushın kvotalardıń ajıratılıwın támiyinlesin;
g)
bir ay múddette Sırtqı isler ministrligi menen birgelikte usı qarardan kelip shıǵıp, xalıqaralıq shártnamalarǵa jańadan shólkemlestirilgen rezident aviakompaniyalarǵa sırt el hám xalıqaralıq jónelislerde párwazlardı ámelge asırıw ushın kvotalar ajıratıw boyınsha ózgerisler kirgiziw hám párwazlardı ámelge asırıwǵa ruqsat beriw ilajların kórsin;
d)
2023-jıl 1-oktyabrge shekem Úrgensh hám Buxara aeroportlarınıń hár biri boyınsha mámleketlik-jeke menshik sheriklik shártleri tiykarında modernizaciyalaw hám basqarıwǵa beriw boyınsha ayrıqsha tańlawlar járiyalasın;
e)
2023-jıldıń aqırına shekem Namangan aeroportın mámleketlik-jeke menshik sheriklik shártleri tiykarında modernizaciyalaw hám basqarıwǵa beriw boyınsha joybar koncepciyasın hám texnikalıq-ekonomikalıq tiykarların islep shıqsın.
- Mádeniyat hám turizm ministrligi Samarqand wálayatı hákimligi, Qurılıs hám turaq jay kommunallıq xojalıq ministrligi menen birgelikte 2023-jıl 1-sentyabrge shekem YuNVTO qáwenderliginde Xalıqaralıq turizm akademiyasınıń Samarqand kampusın jaratıw maqsetinde «Jipek jolı» turizm hám mádeniy miyras xalıqaralıq universitetine qaraslı Samarqand qalası, Babur Mırza kóshesi, 3a-úy mánzilinde jaylasqan imarat hám obektlerdiń kapital rekonstrukciyalanıwı hám tolıq úskeneleniwin sonday-aq, oǵan tutas aymaqtıń abadanlastırılıwın támiyinlesin.
Ekonomika hám qarjı ministrligi
bir ay múddette usı bánttiń birinshi abzacında belgilengen jumıslardı ámelge asırıw ushın zárúr qarjı ajıratılıwın támiyinlesin.
- Ishki isler ministrligi, Ayrıqsha jaǵdaylar ministrligi hám Transport ministrligi basqa da mápdar ministrlik hám uyımlar menen birgelikte 2023-jıl 1-maydan baslap jol háreketi qáwipsizligi qaǵıydalarına ámel etken halda:
Qamshıq ótkeli arqalı jolawshılardı tasıwda paydalanılatuǵın hám aydawshıdan tısqarı on tórtke shekemgi orınlıqqa iye bolǵan M2 kategoriyadaǵı transport qurallarına;
Jizzaq wálayatındaǵı ótkeller hám Bostanlıq rayonınıń tawlı aymaqlarında tiyisli kategoriyadaǵı jollar arqalı turistlik avtobus hám mikroavtobuslarǵa turaqlı qatnawlardı ámelge asırıwǵa ruqsat beriliwin támiyinlesin.
Onda, tek ǵana
1-aprelden 1-noyabrge shekemgi dáwirde kúndiz, islep shıǵarılǵanına 3 jıldan aspaǵan hám gaz ballon úskeneleri ornatılmaǵan, taw tormozı bar bolǵan hám háreketti baqlaw navigaciya qurılması hám taxograf ornatılǵan transport qurallarında keminde 7 jıl stajı bar aydawshılarǵa avtomobil transportında jolawshılardı tasıw jumısı ushın licenziya bolǵan jaǵdayda qatnawdı ámelge asırıwǵa ruqsat beriledi.
- Oraylıq bank Ekonomika hám qarjı ministrligi, Mádeniyat hám turizm ministrligi Transport ministrligi menen birgelikte:
2023-jılı Shańaraqlıq isbilermenlikti rawajlandırıw baǵdarlaması sheńberinde ajıratılıp atırǵan qarjılar esabınan jolawshılardı tasıwda paydalanılatuǵın hám aydawshıdan tısqarı segiz hám onnan artıq orınlıqqa iye bolǵan transport quralların satıp alıw
ushın 300 million sumǵa shekemgi muǵdardaǵı joybarlardı qarjılandırıwǵa qaratılıwın támiyinlesin;
turizm tarawınıń subektlerine aylanıs qarjılar hám investiciyanı kóbeytiw ushın qosımsha
300 milliard sumlıq kredit liniyaların ashıwdı támiyinlesin;
qarjılar jaylastırılǵan kommerciyalıq bankler haqqındaǵı maǵlıwmatlardı ǵalaba xabar qurallarında járiyalap barsın.
Onda, Ekonomika hám qarjı ministrligi
eki hápte múddette usı bánttiń úshinshi abzacında kórsetilgen kreditler boyınsha procentlerdiń bir bólegin Isbilermenlik jumısın qollap-quwatlaw mámleketlik qorı esabınan qaplap beriw tártibin engiziwdi támiyinlesin.
- Mádeniyat hám turizm ministrliginiń mayıplıǵı bolǵan shaxslar ushın respublikamız boylap sayaxatlar shólkemlestiriw maqsetinde «Sayaxat hámme ushın!» joybarın ámelge asırıw boyınsha usınısı maqullansın.
Mádeniyat hám turizm ministrligi usı joybar sheńberinde
500 mayıplıǵı bolǵan puqaralardıń sayaxatın shólkemlestirsin hám dáslepki basqıshta Xorezm, Buxara hám Samarqand wálayatlarında
100 surdo-gidlerdi tayarlaw boyınsha baǵdarlamanı islep shıqsın.
Onda, usı joybarǵa baylanıslı qárejetler Mádeniyat hám turizm ministrligi janındaǵı Turizmdi qollap-quwatlaw qorınıń qarjıları esabınan qaplanadı.
- Mádeniyat hám turizm ministrligi mápdar ministrlik hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
- Usı qarardıń orınlanıwın nátiyjeli shólkemlestiriwge juwapker hám jeke juwapker etip Ózbekstan Respublikası Bas ministriniń orınbasarı J.A.Xodjaev belgilensin.
Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.
Ózbekstan Respublikası Prezidenti Sh.MIRZIYoEV
