Usı jıldıń 5-may kúni Berdaq atındaǵı Qarakalpaq mámleketlik muzıkalı teatrında Ózbekstan hám Qaraqalpaqstan xalıq shayırı Ibrayım Yusupovtıń tuwılǵan kúni múnásibeti menen, Ózbekstan hám Qaraqalpaqstan Respublikalarınıń kórkem óner ǵayratkeri, «Mehnat shuxrati» hám «El yurt hurmati» ordenleriniń iyesi, Mámleketlik sıylıqtıń laureatı, kompozitor Najimatdin Muxammeddinovtıń «Ayt sen Ayaziydiń qosıqlarınan» atamasındaǵı saltanatı keshesi bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupovtıń tuwılǵanına 94 jıl tolıwı múnásibeti menen jıynalǵanlardı qutlıqladı. Hámmemizge belgili, Húrmetli Prezidentimiz qaraqalpaq ádebiyatı menen mádeniyatına hámiyshe joqarı húrmet penen qarap, onı jáne de rawajlandırıw máselesine ayrıqsha itibar qaratıp kelmekte. Ásirese Húrmetli Prezidentimiz tárepinen bildirilgen: - «men Jolmırza Aymurzaev, Xojabek Seytov, Tilewbergen Jumamuratov, Turdımurat Najimov, Sadıq Nurımbetov, Abbaz Dabılov, keyin ala «Ózbekstan Qaharmanı» degen joqarı ataqqa miyasar bolǵan: - Ibrayım Yusupov, Tólepbergen Qayıpbergenov sıyaqlı úlken shayır hám jazıwshılardıń dóretpeleri menen tanısıp, qaraqalpaq xalqınıń úrp-ádet hám qádiriyatları, dárt hám ármanları, arzıw-niyetleri tuwralı bay túsinikke iye bolǵanman» degen pikirler xalqımız tariyxına hám dóretiwshiligine degen joqarı baha dep oylaymız. Sebebi, xalqımızdıń súyikli shayırı Ibrayım Yusupovtıń “Joldas muǵallim”, “Tumaris”, “Aktrisanıń ıǵbalı”, “Dala ármanları”, “Qırıq qız”, “Ómir – saǵan ashıqpan” sıyaqlı kóplegen shıǵarmaları xalqımızǵa ruwxıy azıq baǵıshlap kelmekte. Onıń qosıqları túrkiy tiller ádebiyatınıń gúltajına aylandı. Bir qatar dóretpeleri qazaq, ukrain, belarus, gruzin, bolgar hám basqa da xalıqlardıń tillerine awdarmalandı. Son-ay-aq, Prezidentimiz Shavkat Mirziyoevtiń arnawlı qararı menen Nókiste Ibrayım Yusupovtıń esteligi hám onıń atındaǵı dóretiwshilik mektebi qurıldı. Ádebiyatımızdıń ullı tulǵasınıń miyrası barqulla ardaqlanıp, eske alınıp kelinbekte. Shayır Ibrayım Yusupovtıń qosıq qatarların xalqımız yadtan biliwi menen birge, onıń qosıqlarına jazılǵan namalar kewillerge ózgeshe zawıq baǵıshlaydı. Usılar qatarında Mámleketlik sıylıqtıń laureatı, kompozitor Najimaddin Muxammeddinovtıń ornı ayrıqsha sanaladı. Ásirese, bul eki dóretiwshi insan tárepinen jaratılǵan Qaraqalpaqstan Respublikasınıń Mámleketlik Gimni, sonday-aq, «Kewil kewilden suw isher», «Mustaqıllıq gúlleri», «Jáne jáyhun bolıp aqtıń da keldiń», «Muń qalmas» sıyaqlı qosıqlar kewillerde milliy maqtanısh sezimlerin oyatadı. Búgingi ótkerilgen koncert baǵdarlamasında shayır qáleminen dóregen qosıqlar namaǵa salınıp, onıń ólmes miyrasına jáne bir márte húrmet kórsetildi.

Qaraqalpaqstan Respublikası Joqarǵı Keńesiniń Málimleme xızmeti