Qaraqalpaqstan Respublikası Joqarǵı Keńesiniń Baslıǵı Amanbay Orınbaev Túrkiya mámleketinen kelgen investordı qabılladı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Túrkiya mámleketinen kelgen investordı qabılladı Túrkiya mámleketiniń Artuk kesip alıp islewshi energetika injenerligi qurılıs hám sırtqı sawda JShJ direktorı Xaydar Derdichok hám qarjılıq juwapkeri Tamer Akbair búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.

  Sonday-aq, Ellikqala rayonı hákimi S.Avezov, Qaraqalpaqstan Respublikası Qurılıs ministri A. Qurbanbaev, Ózbekstan Respublikası oraylıq bankiniń Qaraqalpaqstan Respublikası bas basqarması baslıǵı A. Tilewmuratov, Kadastr agentligi Qaraqalpaqstan Respublikası basqarması baslıǵı I.Tleuovlar qatnastı.   Ótkerilgen qabıllawda Ellikqala rayonı Bostan qalasında jańadan puqaralar jasawı ushın kishi qala qurılısı joybarın ámelge asırıw haqqında sóz etildi.

Aytıp ótiw orınlı, investorlar tárepinen usınılıp atırǵan joybarda kóp qabatlı turaq jaylardan ibarat jańa, infrastruktura menen támiyinlengen kishi qala qurıw belgilengen bolıp, onda bir qatar sociallıq obektler qurılısın ámelge asırıw hám aldaǵı waqıtta Turkiya tájiriybesi tiykarında kóp qabatlı turaq jaylar massivlerin tiklew boyınsha pikir-usınıslar bildirilip, usı baǵdarda bir qatar máseleler qarap shıǵıldı. Sonıń menen birge eki tárepleme birge islesiwdi jolǵa qoyıw boyınsha kelisimge keliw máselesi talqılandı. Óz náwbetinde Joqarǵı Keńes Baslıǵı elimizde jańadan qurılıs baslap, aymaqlardıń infrastrukturası hám qala kórinisin jaqsılaw, eń baslısı puqaralarımızǵa sapalı xızmet etiwshi obektlerdiń qurılıwı barqulla qollap-quwatlanatuǵınlıǵın bildirdi. Sonday-aq, investiciyalıq jańa joybarları menen kelgen investorlardıń hár qanday baslamasına barlıq múmkinshilikler jaratılatuǵınlıǵın atap ótti. Bunnan soń investorlar Qaraqalpaqstan Respublikası Ministrler Keńesiniń Baslıǵı F.Ermanov penen ushırastı.

Ushırasıwda Qaraqalpaqstan Respublikası Ministrler Keńesi Baslıǵınıń orınbasarı – Investiciyalar hám sırtqı sawda ministri A.Ótewliev qatnastı hám birge islesiwdi jolǵa qoyıw baǵdarında máseleler átirapında pikirlesildi.  

Qaraqalpaqstan Respublikası Joqarǵı Keńesiniń Málimleme xızmeti