Qaharmanlardıń mártligi hesh qashan umıtılmaydı
734
9-may – Eslew hám qádirlew kúni ulıwmaxalıqlıq bayramı, sonday-aq, bıyıl Ekinshi jáhán urısında fashizm ústinen erisilgen jeńistiń 78 jıllıǵı.
Qıyan-keski ótken sawashlardaǵı jeńiste qanshama mashaqat, kúsh, awızbirshilik, quwanısh bar bolsa, sonshama qayǵı-hásiret, qurbanlar da bolǵan.
Márt jawıngerlerdiń erligi menen erisilgen jeńiste qaraqalpaqstanlı azamatlardıń da úlesi bar.
Búgin sáne múnásibeti menen Qaraqalpaqstan Respublikası Joqarǵı Keńesiniń Baslıǵı Amanbay Orınbaev usınday márt jawıngerlerdiń biri bolǵan Qaraózek rayonında jasawshı, Ekinshi jer júzilik urıs qatnasıwshısı Genjemurat ata Allaniyazovtıń shańaraǵında bolıp, bayram sawǵaların tapsırdı.
Joqarǵı Keńes Baslıǵı veterandı qutlıqladı hám Ózbekstan Respublikası Prezidentiniń bayram qutlıqlawın oqıp esittirdi.
Sonday-aq, Prezidentimizdiń usı jıl 2-mayda qabıl etilgen «Ekinshi jáhán urısı qatnasıwshıların xoshametlew haqqında»ǵı pármanı tiykarında Ekinshi jáhán urısı qatnasıwshısı Genjemurat Allaniyazovqa 18 million sum muǵdarında bir mártelik aqshalay sıylıq tapsırıldı.
Sonıń menen birge, urıs qatnasıwshısına mámleketimiz tárepinen ajıratılǵan estelik sawǵaları, Qaraqalpaqstan Respublikası Joqarǵı Keńesi, Ministrler Keńesi, Arqa-batıs áskeriy okrugi, Qaraózek rayonı hákimligi hám bir qatar shólkemler atınan bahalı sawǵalar berildi.
Qaraqalpaqstan Respublikası Joqarǵı Keńesiniń Málimleme xızmeti