Turmıs mashaqatların kórgen, tınıshlıq ushın gúreskenlerdiń gúrrińinde hikmet boladı

9-may – Eslew hám qádirlew kúni Ol endi ǵana on segizge shıqqan edi. Tashkenttiń Achaabat máhállesinen tikkeley Smolensk qalasına urısqa ketti. Sol waqıtta 1942-jıldıń fevralı edi. Keyin ala Belarus, Polsha hám Germaniyada tınıshlıq ushın gúresti. Ómiriniń hár máwriti qáwip-qáterde boldı. Qashan onıń qálbin qorqınısh iyelese, kózlerin áste jumatuǵın edi. Kóz aldında háwlisi – qıytaq jerinde jer awdarıp atırǵan ákesi, tandırda nan jawıp atırǵan anası kóz aldına keletuǵın edi. Qulaqlarına bolsa ini-qarındaslarınıń shadlı dawısları esitilip ketetuǵın edi. Bunnan keyin, bir minutlıq qorqınısh seziminiń ornın ǵayritábiyǵıy mártlik iyeleytuǵın edi. Usınday qáwipte ómiriniń tórt jılı ótti. Nesiybesi úzilmegen eken, máhállesine jeńis penen qayttı. Urıstan keyin mektepte muǵallimshilik etti. Balalarǵa nemis hám inglis tili páninen sabaq beredi. Baslawısh klasslarǵa mólsherlengen «Nemis tili» sabaqlıǵınıń jaratılıwında qatnasadı. Bul miynetler umıtılmadı – ol bir qatar mámleketlik sıylıqlar menen sıylıqlandı. Paytaxtımızdaǵı «Chinobod Plaza» salamatlandırıw kompleksiniń ekinshi qabatı. Ásir menen júzlesken Abbas ata Appanovtıń basınan ótkergen turmıslıq gúrrińin tıńlap otırman. – Aytıp atırǵanlarıńız kinoǵa uqsaydı ya, ata, deymen tán qalǵanımdı jasıra almay. – Solay oylap atırǵanıń, ertektey túsinip atırǵanın seniń baxtıń, balam, – deydi ata kózlerime mehir menen tigilip. – Bul ashıq aspan, dasturxandaǵı mine mına jemisler, hesh bir qáwetersiz sáwbetlesip otırıwımız óz-ózinen bolǵan emes. Óz-ózinen bolıp atırǵanı joq. Ayırım waqıtları mine usı jumsaq orınlıqqa ayaǵımdı sozsam… Ohh… Sozsam ızǵar yamasa ılay suwǵa tolǵan qándekte dushpan tárepke tigilip jatqanlarım qıyalıma keledi. Urısta qansha qurallas doslarımnan ayırıldım. Búgin bilerge uqsaǵanlar húrmette, sol doslarımnıń esteligi bolsa xalqımızdıń yadında. Ata tereń gúrsinedi. Araǵa qolaysız tınıshlıq shógedi. Xanaǵa hákimiyattan wákil kirip, qolaysızlıqtı «jumsartadı». Ol bul jerge jaqın arada Prezident keletuǵının, xananı biraz tártipke keltirip qoysaq jaqsı bolatuǵının aytıp ketedi. Ata menen jáne kórisiwdi wáde etip, xoshlasamız.

Mámleketimizdiń barlıq aymaqlarında 9-may – Eslew hám qádirlew kúni múnásibeti menen hár qıylı ilajlar, ushırasıwlar ótkerilmekte. Ekinshi jer júzilik urıs qatnasıwshıları xoshametlenbekte. Olardıń densawlıqların bekkemlewge itibar qaratılmaqta. Prezident Shavkat Mirziyoev 8-may kúni Tashkent qalasındaǵı «Chinobod Plaza» sanatoriysine barıp, urıs qatnasıwshılarınıń jaǵdayınan xabar aldı. Haqıyqatında da, Ekinshi jer júzilik urısta qaytıs bolǵan ata-babalarımızdıń esteligin máńgilestiriw, búgin de qatarımızda turıp, Watanımızdıń abıray-mártebesin arttırıw, jaslardı ruwxıy-ádep-ikramlılıq jaqtan tárbiyalawǵa úles qosıp atırǵan veteranlardı húrmetlew mámleketlik siyasat dárejesine kóterildi. Bul boyınsha Prezident pármanına qol qoyılıp, Ekinshi jer júzilik urıs qatnasıwshıları hám mayıplardıń hár birine on segiz million sum muǵdarında bir mártelik aqshalay sıylıq beriw belgilendi. – Atam ózlerine berilip atırǵan ǵamqorlıqtı hámiyshe sezinip, onnan kúsh-quwat alıp turadı, – deydi piskentli Ashir atanıń ulı Erali Wsarov. – Mine usı sanatoriyde úsh-tórt kúnnen berli densawlıǵın bekkemlep atır, zárúr diagnozlardı alıp atır. Ne járdem dep, hákimiyattan, hár qıylı shólkem hám uyımlardan sorap keledi. Mámleket basshısı menen búgingi ushırasıw kútilmegen boldı. Prezident urıs veteranlarına sizlerdi kóreyin, bayram menen qutlıqlayın dep keldim, dedi. Bul sizlerdiń bayramıńız, sol waqıtlardaǵı mártligińiz sebepli keyingi áwladlar erkin jasadı degen waqtında maqtanıp kettim. Sáwbetten keyin atamnıń tetikligin aytpaysız ba? Urıs veteranları mámleketimiz basshısına ózleri ushın elimizde jaratılǵan sharayatlar hám itibar ushın minnetdarshılıq bildirdi. Salamatlandırıw kompleksinde densawlıǵın bekkemlew ushın barlıq sharayat jaratıp berilgenin atap ótti. Haqıyqatında da, usı jerde mámleketimizdegi abıraylı salamatlandırıw komplekslerinen biri bolǵan «Chinobod Plaza» sanatoriysi haqqında qısqasha maǵlıwmat beremiz. Bul mákeme 2020-jılı paydalanıwǵa tapsırılǵan. Medicina orayı aymaǵında bes emlew blogi hám bir miymanxana bar. Bul 144 stacionar orın, aylıq 432 qatnawdı qabıllaw quwatlılıǵı degeni. Bul jerge Germaniya, Italiya hám Rossiya mámleketlerinen zamanagóy úskeneler keltirilgen. Orayda jılına 4 mıń 500 as sińiriw aǵzaları kesellikleri, urologiyalıq hám ginekologiyalıq, nevrologiyalıq, endokrinologiyalıq, sonıń ishinde, qantlı diabetke shatılǵan nawqastı salamatlandırıw imkaniyatı bar. Ushırasıwda turmısta kóp sınaqlardı kórgen, derlik bir ásirlik turmıs tájiriybesine iye bolǵan bul insanlardıń tilekleri orınlanatuǵının atap ótti. Nuraniylar ushın barlıq zárúr sharayatlardı jaratıw bunnan bılay da úlken itibarda bolatuǵını atap ótildi.