Jańa redakciyadaǵı Ózbekstan Respublikası Konstituciyasın ámelge asırıw boyınsha birinshi gezektegi ilajlar haqqında

Ózbekstan Respublikası Prezidentiniń pármanı

Elimizde 2023-jıl 30-aprel kúni ótkerilgen referendumda jańa redakciyadaǵı Ózbekstan Respublikası Konstituciyası qatnasqan puqaralardıń 90,21 procenti tárepinen jaqlap dawıs beriw arqalı qabıl etilgenligi onda xalqımızdıń Jańa Ózbekstandı qurıw boyınsha arzıw-niyetleri hám umtılısları óz kórinisin tapqanınan dárek bermekte. Jańa redakciyadaǵı Konstituciya Jańa Ózbekstan strategiyasın ámelge asırıwdıń siyasiy-huqıqıy tiykarların jaratıp, milliy mámleketshilik rawajlanıwınıń tariyxıy áhmiyetli basqıshında mámleket hám jámiyetti jáne de rawajlandırıwdıń tiykarǵı baǵdarların belgilep berdi. Referendum kóp milletli ullı xalqımızdıń tileklesligi hám awızbirshiligi, suveren, demokratiyalıq, huqıqıy, sociallıq hám dúnyalıq mámleket qurıwǵa qatań qarar etkeniniń isenimli kórinisi boldı. Atap aytqanda, Konstituciyada mámleketlik qurılıstıń jańa strategiyalıq maqseti – sociallıq mámleket qurıw ekeni belgilep berildi, sociallıq ádillik hám tilekleslik principleri engizildi, insan huqıqları menen erkinliklerin qorǵawdıń pútkilley jańa mexanizmlerin názerde tutatuǵın konstituciyalıq tiykarlar bekkemlendi. Hákimiyatlar bóliniwi principi hám óz-ara tıyıp turıw hám mápler kelispewshiligi sistemasınıń zamanagóy koncepciyasın esapqa alǵan halda, Oliy Majlis, Ózbekstan Respublikası Prezidenti hám Húkimeti arasında wákillikler qayta bólistirildi. Orınlarda hákimler hám xalıq deputatları Keńesleri wákillikleriniń bólistiriliwine tiykarlanǵan mámleketlik hákimiyattı dúziwdiń jańa modeli názerde tutıldı. Jańa redakciyadaǵı Ózbekstan Respublikası Konstituciyasın sózsiz hám tolıq ámelge asırıw, onda bekkemlengen tiykarǵı principlerdi Jańa Ózbekstannıń ullı ideyasına sáykes tárizde ámelge asırıw, mámleketlik uyımlardıń jumısın jańasha konstituciyalıq-huqıqıy sharayatlarda jolǵa qoyıw, puqaralar óz turmısında xalıq Konstituciyası ruwxın ayqın sezip turıwın támiyinlew maqsetinde: 1. Jańa redakciyadaǵı Konstituciyanı sózsiz hám tolıq ámelge asırıw barlıq dárejedegi mámleketlik uyımlar hám shólkemlerdiń birinshi gezektegi tiykarǵı wazıypası etip belgilensin. 2. Mámleketlik uyımlar hám shólkemlerdiń basshıları jańa redakciyadaǵı Konstituciyanı támiyinlew ushın jeke juwapker esaplanatuǵını; jańa redakciyadaǵı Konstituciya joqarı yuridikalıq kúshke iye ekeninen kelip shıǵıp, mámleketlik uyımlar hám shólkemler, sonıń ishinde, sud hám huqıq qorǵaw uyımlarınıń jumısında tikkeley hám sózsiz qollanılatuǵını; jańa redakciyadaǵı Konstituciya normaların olardı ámelge asırıw ushın basqa da nızamshılıq hújjetleriniń joq ekenligi yamasa nızamshılıqqa Konstituciyaǵa muwapıq ózgerisler hám qosımshalar kirgizilmegeni sıltawı menen qollanıwdan bas tartıw qatań qadaǵan etiletuǵını belgilep qoyılsın. 3. Jańa redakciyadaǵı Ózbekstan Respublikası Konstituciyasınan kelip shıǵatuǵın wazıypalardı ámelge asırıw boyınsha ilajlar baǵdarlaması (keyingi orınlarda – baǵdarlama) 1-qosımshaǵa muwapıq tastıyıqlansın. 4. Tómendegiler: Jańa redakciyadaǵı Ózbekstan Respublikası Konstituciyasınıń tiykarǵı ideyaların júzege shıǵarıw hám normaların turmısqa engiziw boyınsha Mámleketlik komissiya (keyingi orınlarda – Mámleketlik komissiya) 2-qosımshaǵa muwapıq quramda; Jańa redakciyadaǵı Ózbekstan Respublikası Konstituciyasındaǵı suveren, demokratiyalıq, huqıqıy, sociallıq hám dúnyalıq mámleket principlerin izbe-iz ámelge asırıw boyınsha ekspertlik keńesleri (keyingi orınlarda – ekspertlik keńesleri) 3-7-qosımshalarǵa muwapıq quramlarda dúzilsin. 5. Mámleketlik komissiya: jańa redakciyadaǵı Konstituciya hám baǵdarlamanı ámelge asırıwǵa qaratılǵan ilajlar óz waqtında hám sapalı ótkeriliwin támiyinleytuǵını; mámleketlik uyımlar hám shólkemler, ekspertlik keńeslerdiń jańa redakciyadaǵı Konstituciya hám baǵdarlamanı ámelge asırıw baǵdarındaǵı jumısın muwapıqlastıratuǵını; jańa redakciyadaǵı Konstituciya hám baǵdarlamanı ámelge asırıwda keń jámiyetshilik, puqaralıq jámiyeti institutları, ilimiy toparlar hám sırt elli ekspertler qatnasıwı ushın sharayatlar jaratatuǵını; jańa redakciyadaǵı Konstituciyanı ámelge asırıw sheńberinde islengen jumıslardı keńeytilgen tárizde jılına keminde eki ret sın kózqarastan dodalap baratuǵını hám mámleketlik uyımlar hám shólkemler, ekspertlik keńesler basshılarınıń esabatların tıńlaytuǵını belgilensin. 6. Ekspertlik keńesler (T.Narbaeva, I.Ismoilov, N.Ywldashev, J.Qwchqorov, A.Tashkulov): 2024-jıl 1-yanvarǵa shekem orta hám uzaq perspektivalı suveren, demokratiyalıq, huqıqıy, sociallıq hám dúnyalıq mámleketti rawajlandırıw koncepciyalarınıń islep shıǵılıwı hám Mámleketlik komissiyaǵa kirgiziliwin támiyinlesin; jańa redakciyadaǵı Konstituciyada bekkemlengen suveren, demokratiyalıq, huqıqıy, sociallıq hám dúnyalıq mámlekettiń tiykarǵı principleri islep shıǵılıp atırǵan normativlik-huqıqıy hújjetler joybarlarında sáwlelendiriliwi ústinen monitoring alıp barsın; jańa redakciyadaǵı Konstituciya hám baǵdarlamanıń ámelge asırılıwı boyınsha hár sherekte Mámleketlik komissiyaǵa esabat kirgizip barsın. 7. Ózbekstan Respublikası Prezidenti janındaǵı Nızamshılıq hám huqıqıy siyasat institutı jańa redakciyadaǵı Konstituciyanı ámelge asırıw procesin informaciyalıq-analitikalıq, ilimiy hám ekspertlik jaqtan támiyinlew ushın juwapker etip belgilensin hám oǵan tómendegi qosımsha wazıypalar júklensin: jańa redakciyadaǵı Konstituciyaǵa muwapıq islep shıǵılǵan normativlik-huqıqıy hújjetler joybarların ilimiy ekspertizadan ótkeriw; mámleketlik uyımlar, ásirese, sud hám huqıq qorǵaw uyımlarınıń jumısında jańa redakciyadaǵı Konstituciya normalarınıń tikkeley qollanılıw jaǵdayın monitoring etip barıw; jańa redakciyadaǵı Konstituciya tiykarında jańa oqıw baǵdarlamaları, sabaqlıqlar hám basqa da qollanbalardı tayarlaw boyınsha ilimiy-metodikalıq ilajlardı muwapıqlastırıw. 8. Oliy Majlis palataları hám siyasiy partiyalardıń Oliy Majlis Nızamshılıq palatası hám jergilikli Keńeslerdegi deputatlar korpusın qáliplestiriwdiń majoritar-proporcionallıq túrine tiykarlanǵan saylaw sistemasın engiziw haqqındaǵı usınısları maqullansın. Oliy Majlis Nızamshılıq palatasına bir ay múddette majoritar-proporcionallıq túrge tiykarlanǵan saylaw sistemasına ótiwdi názerde tutatuǵın nızam joybarın islep shıǵıw usınıs etilsin. 9. Jańa redakciyadaǵı Konstituciyanıń 32-statyasında belgilengen mámleket boylap erkin háreketleniw, turaq jay hám jasaw ornın tańlaw huqıqı tolıq ámelge asırılıwın támiyinlew maqsetinde: Ministrler Kabineti (A.Aripov) eki ay múddette «Tashkent qalası hám Tashkent wálayatında turaqlı jasaw ornı boyınsha dizimge alınıwı kerek bolǵan shaxslar – Ózbekstan Respublikası puqaraları kategoriyalarınıń dizimi haqqında»ǵı Nızamı óz kúshin joyıtqan dep tabıw boyınsha nızam joybarın Oliy Majlis Nızamshılıq palatasına kirgizsin; Ishki isler ministrligi (P.Bobojonov) bir ay múddette puqaralardı jasaw ornı boyınsha dizimge alıwda xabardar etiw tártibin engiziwge qaratılǵan pútkilley jańa mexanizmlerdi názerde tutatuǵın Ózbekstan Respublikası Prezidenti Pármanı joybarın usınsın. 10. Jańa redakciyadaǵı Konstituciyanıń 78-statyasında belgilengen balalar hám jaslarda xalıqtıń bay mádeniy miyrasın maqtanısh etiw, Watanǵa bolǵan mehir-muhabbat sezimlerin qáliplestiriwge baylanıslı qaǵıydalardı ámelge asırıw maqsetinde 2023-jıl 1-sentyabrden baslap respublika puqarası esaplanǵan hám 18 jasqa shekemgi balalardıń mádeniy miyras obektlerine, sonıń ishinde, kórgizbeler, tariyxıy hám zıyarat etiw orınları, sonday-aq, mámleketlik muzeylerge tólemsiz kiriw tártibi engizilsin. Oliy Majlis palatalarına bala huqıqları, erkinlikleri hám nızamlı máplerin támiyinlew hám qorǵaw, balanıń fizikalıq, aqılıy hám mádeniy jaqtan tolıq rawajlanıwı ushın múnásip sharayatlardı jaratıw maqsetinde «Ózbekstan Respublikası Oliy Majlisiniń Bala huqıqları boyınsha wákili (Balalar ombudsmanı) haqqında»ǵı nızam joybarın qısqa múddette qabıl etiw usınıs etilsin. 11. Puqaralardıń jańa redakciyadaǵı Konstituciyanıń 50-statyasında belgilengen bilim alıw huqıqları kepilliklerin jáne de kúsheytiw maqsetinde 2023-jıl 1-avgusttan baslap salıq tólewshiler tárepinen jasına qaramastan perzentleriniń Ózbekstan Respublikası bilimlendiriw shólkemlerinde bilim alıwı ushın qaratılatuǵın tólemler salıq salınbaytuǵın dáramatlar kategoriyasına kirgizilsin. 12. Jańa redakciyadaǵı Konstituciyanıń 41, 65-67-statyalarınıń talaplarınan kelip shıǵıp, sonday-aq, múlk huqıqlarınıń isenimli qorǵalıwın támiyinlew, usı huqıqlardı sheklep atırǵan faktorlardı saplastırıw, múlk qatnasıqlarına tiykarsız aralasıwǵa jol qoymaw maqsetinde 2023-jıl 1-iyunnen baslap tómendegiler biykar etilsin: tólem xızmetlerin kórsetetuǵın shólkemler fizikalıq shaxslar arasında pul ótkermeleri ámelge asırılǵanda, olar kórsetilgen xızmetler ushın elektron esapbet-fakturalar usınıw hám rásmiylestiriw tártibi; usaqlap satıw hám xızmet kórsetiw obektleriniń jumıs alıp barıw waqtına baylanıslı sheklewler. 13. Ekonomika hám qarjı ministrligi (Sh.Kudbiev) Oraylıq bank (M.Nurmuratov), Investiciyalar, sanaat hám sawda ministrligi (L.Kudratov), Tábiyat resursları ministrligi (A.Abduxakimov) menen birgelikte eki ay múddette «jasıl qarjılandırıw» mexanizmlerin engiziw boyınsha qarar joybarın Ministrler Kabinetine kirgizsin hám onda sonıń ishinde, «jasıl sertifikat», «jasıl kreditler» hám xalıqaralıq tájiriybede keńnen paydalanılatuǵın basqa da institutlardı názerde tutsın. 14. Jańa redakciyadaǵı Konstituciyanıń 55-statyasında belgilengen hár bir shaxstıń óz huqıqları menen erkinliklerin sud arqalı qorǵaw huqıqı kepilliklerin jáne de kúsheytiw maqsetinde 2024-jıl 1-yanvardan baslap, hákimshilik sudlarǵa shaǵım etiwde puqara hám isbilermenlik subektlerinen mámleketlik bajını óndirmew, onda mámleketlik bajını jumıstı kórip shıǵıw nátiyjesi boyınsha ayıpker tárepten óndiriw tártibi engizilsin. Joqarı sud (B.Islamov) Ádillik ministrligi (A.Tashkulov), Ekonomika hám qarjı ministrligi (Sh.Kudbiev) menen birgelikte 2023-jıl 1-oktyabrge shekem usı bántte názerde tutılǵan másele boyınsha nızam joybarın Oliy Majlis Nızamshılıq palatasına kirgizsin. 15. Jańa redakciyadaǵı Konstituciyanıń 21-statyasında belgilengen huqıqıy tásir ilajların qollanıwda teńsalmaqlılıq principin turmısqa engiziw maqsetinde Ádillik ministrligi (A.Tashkulov) Joqarı sud (B.Islamov), Bas prokuratura (N.Ywldoshev), Ishki isler ministrligi (P.Bobojonov) hám Ekonomika hám qarjı ministrligi (Sh.Kudbiev) menen birgelikte: eki ay múddette hákimshilik juwapkershilik haqqındaǵı nızamshılıqta shártnamalıq hám basqa da puqaralıq-huqıqıy múnásibetlerden kelip shıǵatuǵın juwapkershilik ilajları biykar etiw; 2024-jıl 1-yanvarǵa shekem nızamshılıq bazasın tolıq xatlawdan ótkerip, onda belgilengen huqıqıy tásir ilajların teńsalmaqlılıq principine muwapıqlastırıw boyınsha usınıslar kirgizsin. 16. Ádillik ministrligi (A.Tashkulov) Ekonomika hám qarjı ministrligi (Sh.Kudbiev), Joqarı sud (B.Islamov) hám Bas prokuratura (N.Ywldoshev) menen birgelikte eki ay múddette jańa redakciyadaǵı Konstituciyanıń 29-statyasında belgilengen mámlekettiń huqıqbuzarlıqlardan jábirlengenlerge jetkerilgen zıyannıń ornı qaplanıwı ushın sharayatlardı jaratıw minnetlemesi tolıq ámelge asırılıwın támiyinlewge qaratılǵan mexanizmlerdi názerde tutatuǵın Ózbekstan Respublikası Prezidentiniń qarar joybarın islep shıqsın hám belgilengen tártipte kirgizsin. 17. Jańa redakciyadaǵı Konstituciyanıń 26-statyasında belgilengen insannıń abırayı hám qádir-qımbatına qolqatılmaslıǵı kepilliklerin jáne de bekkemlew maqsetinde Bas prokuratura (N.Ywldoshev) Ishki isler ministrligi (P.Bobojonov), Joqarı sud (B.Islamov) hám Mámleketlik qáwipsizlik xızmeti (A.Azizov) menen birgelikte 2023-jıl 1-avgustqa shekem qamaqqa alıw tárizindegi ihtiyat sharasın qollanıwda shaxstı qamaqxanaǵa jaylastırıwdan aldın májbúriy medicinalıq tekseriwden ótkeriw tártibin engiziw boyınsha tiykarlanǵan usınıslardı kirgizsin. 18. Jańa redakciyadaǵı Konstituciya 142-statyasınıń talaplarınan kelip shıǵıp: a) jınayat procesinde qorǵawshınıń statusın kúsheytiw maqsetinde, oǵan tómendegi qosımsha huqıq hám kepillikler berilsin: sorastırıw hám dáslepki tergewde qorǵawshı tárepinen qálegen waqıtta jınayat isin qozǵatıw hám juwmaqlaw haqqındaǵı qararlardan nusqa alıw; kórsetpelerdi aldınnan bekkemlep qoyıw (deponirovanie) ushın sudqa tikkeley ótinish xat kirgiziw; tergewge shekemgi tekseriw ótkerilip atırǵan shaxslarǵa maman yuridikalıq járdemnen paydalanıw huqıqın kepillew maqsetinde tergewge shekemgi tekseriw procesinde qorǵawshı statusında qatnasıw; jumıs boyınsha shártnama tiykarında sud ekspertizaları ótkeriliwin hám zárúr bilimge iye qánigeler tartılıwın shólkemlestiriw; jınayat isi boyınsha maǵlıwmatlarǵa iye shaxslardı sorawdan ótkeriwde olardıń kelisimi menen arnawlı texnika qurallarınan paydalanıw; b) advokatura tarawına jas kadrlardı jedel tartıw maqsetinde 2023-jıl 1-sentyabrden baslap joqarı bilimlendiriw shólkemleri yurisprudenciya baǵdarında bilim alıp atırǵan pitkeriwshi kurs studentlerine advokatlıq strukturalarda miynet nızamshılıǵına muwapıq oqıwdan bos waqıtta advokat járdemshisi sıpatında jumıs alıp barıwǵa ruqsat etilsin. Ádillik ministrligi (A.Tashkulov) Joqarı sud (B.Islamov), Bas prokuratura (N.Ywldoshev), Mámleketlik qáwipsizlik xızmeti (A.Azizov) hám Ishki isler ministrligi (P.Bobojonov) menen birgelikte eki ay múddette qorǵawshınıń huqıqları menen kepilliklerin keńeytiw, advokat járdemshisi sıpatında jumısın alıp barıw tártibin jetilistiriwdi názerde tutatuǵın nızam joybarın belgilengen tártipte kirgizsin. 19. Bas prokuratura (N.Ywldoshev) Ishki isler ministrligi (P.Bobojonov), Milliy gvardiya (R.DJuraev) hám Mámleketlik qáwipsizlik xızmeti (A.Azizov) menen birgelikte bir ay múddette uslanǵan hám tergew astında bolǵan shaxstıń konstituciyalıq processuallıq huqıqların tolıq túsindirip beriwshi kórgizbeli materiallardıń huqıq qorǵaw uyımları, sonıń ishinde, tergew uyımlarınıń imaratlarında puqaralarǵa kórinetuǵın tárizde jaylastırılıwın támiyinlesin. 20. Bilimlendiriwdi rawajlandırıw respublikalıq ilimiy-metodikalıq orayı Mektepke shekemgi hám mektep bilimlendiriwi ministrligi (X.Umarova), Joqarı bilimlendiriw, ilim hám innovaciyalar ministrligi (I.Abduraxmanov), Ádillik ministrligi (A.Tashkulov) hám basqa da mápdar uyımlar menen birgelikte 2023–2024-oqıw jılı baslanǵanǵa shekem: barlıq bilimlendiriw túrleri hám basqıshlarındaǵı Konstituciyanı úyreniw boyınsha oqıw rejeleri hám bilimlendiriw baǵdarlamaların qayta kórip shıǵıw hám olardı jańa redakciyadaǵı Konstituciya normaları hám qaǵıydalarına beyimlestiriw; oqıwshılarǵa, jasın esapqa alǵan halda, jańa redakciyadaǵı Konstituciyanı úyretiw boyınsha zamanagóy metodika tiykarında sabaqlıqlar, oqıw qollanbaları hám arnawlı ádebiyatlardı jaratıw ilajların kórsin. Usı bánttegi ilajlardı ámelge asırıwǵa baylanıslı qárejetler Mámleketlik byudjet qarjıları esabınan qaplansın. 21. Mámleketlik xızmetti rawajlandırıw agentligi (Ǵ.Mirzaev) Ádillik ministrligi (A.Tashkulov), Sudyalar joqarı keńesi (X.Yodgorov) hám huqıq qorǵaw uyımları menen birgelikte bir ay múddette tómendegilerdi názerde tutatuǵın 2023–2024-jıllarda jańa redakciyadaǵı Konstituciya boyınsha mámleketlik puqaralıq xızmetkerler hám sud-huqıq sisteması xızmetkerlerin oqıtıw rejesin tastıyıqlasın: óz aldına grafik tiykarında barlıq buwındaǵı mámleketlik puqaralıq xızmetkerler hám sud-huqıq sisteması xızmetkerlerine jańa redakciyadaǵı Konstituciyanıń mazmun-mánisin oqıtıwdı shólkemlestiriw; mámleketlik puqaralıq xızmetkerler hám sud-huqıq sisteması xızmetkerleriniń konstituciyalıq mádeniyatı, huqıqıy bilimdanlıǵın arttırıw hám bahalaw sistemasın jańa redakciyadaǵı Konstituciyaǵa beyimlestiriw kózqarasınan qayta kórip shıǵıw. 22. Oliy Majlis palataları, Konstituciyalıq sud Ózbekstan Respublikası Prezidenti janındaǵı Nızamshılıq hám huqıqıy siyasat institutı hám Insan huqıqları boyınsha Milliy oraydıń jańa redakciyadaǵı Konstituciyanıń statyama-statya ilimiy-ámeliy túsinigin tayarlaw haqqındaǵı usınısı maqullansın. Jańa redakciyadaǵı Konstituciyanıń statyama-statya ilimiy-ámeliy túsinigin tayarlaw boyınsha redakciyalıq keńesi 8-qosımshaǵa muwapıq quramda qáliplestirilsin hám onıń jumısshı uyım etip Ózbekstan Respublikası Prezidenti janındaǵı Nızamshılıq hám huqıqıy siyasat institutı belgilensin. Redakciyalıq keńes (M.Raxmankulov): túsinikti tayarlawda jańa redakciyadaǵı Konstituciyanıń kóp milletli xalqımızdı birlestiriwdegi potencialın, onda óz kórinisin tapqan suveren, demokratiyalıq, huqıqıy, sociallıq hám dúnyalıq mámleket principlerin, insan huqıqları menen erkinliklerin qorǵawdıń jańa mexanizmlerin ashıp beriwge, sonday-aq, onıń tekstin xalıqtıń keń qatlamları, ásirese, jaslar ushın túsinikli hám ápiwayı tilde bolıwına itibar qaratsın; jetekshi milliy hám sırt elli ekspertler, huqıqtanıwshılar hám mámleketlik ǵayratkerler tartılǵan halda, 2023-jıl 1-dekabrge shekem túsindiriw teksti tayarlanıwın hám ózbek hám shet tillerde basıp shıǵarılıwın támiyinlew ilajların kórsin. 23. Sanlı texnologiyalar ministrligi (Sh.Shermatov) Ózbekstan Respublikası Prezidenti janındaǵı Nızamshılıq hám huqıqıy siyasat institutı (M.Raxmankulov) hám Ádillik ministrligi (A.Tashkulov) 2023-jıl 1-iyunǵa shekem ózbek hám shet tillerde «Jańa Ózbekstan Konstituciyası» birden-bir milliy portalı (keyingi orınlarda – portal) hám onıń mobil qosımshası iske qosılıwın támiyinlesin. Onda, portal hám onıń mobil qosımshasında puqara hám isbilermenler ushın nızamshılıqtı jańa redakciyadaǵı Konstituciyaǵa muwapıqlastırıw hám onı ámelge asırıwda júzege kelip atırǵan mashqalalardı saplastırıw boyınsha usınıslardı beriw imkaniyatı názerde tutılsın. 24. Ádillik ministrligi (A.Tashkulov) Ózbekstan Respublikası Prezidenti janındaǵı Nızamshılıq hám huqıqıy siyasat institutı (M.Raxmankulov) menen birgelikte úsh ay múddette nızamnan kelip shıǵatuǵın hújjetlerdi xatlawdan ótkeriw hám portalǵa kelip túsken usınıslardı ulıwmalastırıw nátiyjelerine bola jańa redakciyadaǵı Konstituciyaǵa muwapıqlastırılıwı kerek bolǵan normalardı qayta kórip shıǵıw boyınsha usınıslardı Ministrler Kabinetine kirgizsin. 25. Ózbekstan Milliy málimleme agentligi hám Ózbekstan Milliy teleradiokompaniyasına ǵalaba xabar qurallarında jańa redakciyadaǵı Konstituciyanıń turmısqa engizip barılıwı, sonıń ishinde, xalıqtıń turmısındaǵı unamlı ózgerislerdi keńnen sáwlelendiriw usınıs etilsin. 26. Usı Pármannıń orınlanıwın nátiyjeli shólkemlestiriwge juwapker hám jeke juwapker etip baǵdarlamada atqarıwshı sıpatında názerde tutılǵan ministrlikler, uyımlar hám ekspertlik keńeslerdiń basshıları, Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası hákimleri belgilensin. Pármannıń orınlanıwın qadaǵalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyasınıń basshısı S.U.Umurzakovqa júklensin.  

Ózbekstan Respublikası Prezidenti                Sh. Mirziyoev