Joqarǵı Keńes Baslıǵı basshılıǵındaǵı delegaciya isbilermenlikti rawajlandırıw, kishi biznes subektlerin qollap-quwatlaw baǵdarındaǵı jumıslar menen tanısıw maqsetinde Namangan wálayatına ámeliy sapar menen bardı
987
Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı qala hám rayon hákimleri, isbilermenlik, innovaciyalar boyınsha juwapkerlerden ibarat delegaciya aǵzaları tájiriybe almasıw, isbilermenlikti rawajlandırıw, kishi biznes penen shuǵıllanıwshı isbilermenlik subektleriniń jumısların jolǵa qoyıw baǵdarında ámelge asırılıp atırǵan jumıslar menen tanısıw maqsetinde Namangan wálayatına bardı.
Aytıp ótiw orınlı, isbilermenlik subektleri jumısların nátiyjeli jolǵa qoyıw boyınsha Namangan wálayatı aldınǵı tájiriybege iye aymaqlardan esaplanadı. Sonlıqtan, delegaciya aǵzaları da Namangan tájiriybelerin úyreniw maqsetinde usı aymaqta ámeliy saparda bolıp turıptı.
Delegaciya aǵzaları dáslep Úyshi rayonındaǵı Yorkatay kishi sanaat zonası tárepinen ámelge asırılıp atırǵan jumıslar menen jaqınnan tanıstı.
Bul sanaat zonası ulıwma 4,7 gektardi maydanda jaylasqan bolıp, ulıwma bahası 115 mlrd. sumlıq 26 joybar ámelge asırıladı. Usı jerde tiykarınan tekstil jónelisindegi kárxanalar jumıs alıp barıwın jolǵa qoyıw rejelestirilgen bolıp, 1730 jańa jumıs orınları jaratıladı.
Bunnan soń, Joqarǵı Keńes Baslıǵı basshılıǵındaǵı delegaciya aǵzaları wálayat hákimi Sh.Abdurazakov penen birge “Mega fayz teks” JShJ tárepinen jip iyiriw arqalı material gezlemeler ónimlerin islep shıǵarıw, “Agro sof zaxira” JShJ tárepinen tigiwshilik ónimlerin islep shıǵarıwdı shólkemlestiriw, «Uychi med diagnoz» JShJniń noski ónimlerin islep shıǵarıw joybarları menen tanıstı.
Bul jerde usınday kishi islep shıǵarıw kárxanalarınıń jumısların jolǵa qoyıw ayrıqsha nátiyjeli ekenligini atap ótildi.
Qaraqalpaqstan Respublikası Joqarǵı Keńesiniń Málimleme xızmeti