Joqarǵı Keńes Baslıǵı basshılıǵındaǵı delegaciyanıń Namangan wálayatına ámeliy saparı dawam etpekte
827
Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı qala hám rayon hákimleri, isbilermenlik, innovaciyalar boyınsha juwapkerlerden ibarat delegaciya aǵzaları tájiriybe almasıw, isbilermenlikti rawajlandırıw, kishi biznes penen shuǵıllanıwshı isbilermenlik subektleriniń jumısların jolǵa qoyıw baǵdarında ámelge asırılıp atırǵan jumıslar menen tanısıw maqsetinde Namangan wálayatında bolıp turıptı.
Delegaciyanıń gezektegi sapar obekti Namangan qalasındaǵı «Barkamal áwlad» kishi sanaat zonası boldı.
Usı kishi sanaat zonasındaǵı derlik 10 gektar maydandaǵı 46 joybar, isbilermenler tárepinen ámelge asırılıp atırǵan jumıslar, islep shıǵarılıwı jolǵa qoyılǵan ónimler menen jaqınnan tanısıldı. Kishi sanaat zonasındaǵı “Master klass”, “Sifat yoǵoch” hámde “Balans teks” juwapkershiligi sheklengen jámiyeti jumısları delegaciya aǵzalarında unamlı tásir qaldırdı.
Házirgi waqıtta kishi sanaat zonasında 18 joybar óz jumısın baslaǵan. Sonnan, "Sifat yogʻoch" JShJde 100 ge jaqın jigit-qızlar miynet etpekte. Jumısshılar sanı 150 ge jetkerilgen bolıp, kárxana tolıq quwatlıqta jumıs islep baslaǵannan soń 31 mlrd. sumlıq mebel ónimleri islep shıǵarıladı.
Házirgi waqıtta Namangan wálayatında 62-Xalıqaralıq Gúller festivalına tayarlıqlar qızǵın túrde alıp barılıp atır. Wálayat orayınan baslap, oraylıq kósheler, dem alıw baǵları hám qala maydanları gúller hám hár qıylı kompoziciyalar menen bezetilmekte.
Ámeliy sapar dawamında delegaciya aǵzaları mádeniyat hám dem alıw baǵında alıp barılıp atırǵan jumıslar menen jaqınnan tanıstı.
Bıyılǵı festivalǵa tayarlıq kóriw aldınan Babur baǵı, Ápsanalar alabı tematikalıq parki hámde qalanıń kósheleri hám kewil ashar orınlarına 30 million dana gúl egiw jumısları alıp barılmaqta. 300 túrdegi gúllerden ibarat júzlegen kompoziciyalardı jaratıw boyınsha gúlshi dizaynerler miynet etip atırǵanlıǵı haqqında keń túrde maǵlıwmat berildi.
Joqarǵı Keńes Baslıǵı Amanbay Orınbaev hám wálayat hákimi Sh.Abdurazakov penen birge delegaciya aǵzaları gezektegi «Dashtboǵ» kishi sanaat zonasındaǵı kárxanalarda alıp barılıp atırǵan jumıslardı barıp kórdi.
Derlik 4 gektar maydanda ulıwma bahası 118,7 mlrd. sumlıq, sonnan, 103,7 mlrd. sum óz baslaması menen qarjı kirgizgen isbilermenlerdiń úlesi hám 15 mlrd. sum bank kreditleri qarjıları menen jámi 22 joybar iske túsirilgen.
Kishi sanaat zonasında jılına 56,2 mlrd. sumlıq ónimler islep shıǵarılıwı jolǵa qoyılǵan hámde 2,2 mln. dollar muǵdarında eksport ámelge asırılmaqta. Nátiyjede 3 200 jańa jumıs orınları jaratılǵan hám islep shıǵarıw kólemi arttırılǵan.
Delegaciya aǵzalaranıń Namangan wálayatına bolǵan saparı dawamında Davlatobod rayonındaǵı — «Jańa Ózbekstan — jaslar ziya máskanı» jumısları kózden ótkerildi.
Namangan wálayatınıń eń kórkem imaratlarınıń biri esaplanǵan usı dárgayda bir waqıttıń ózinde 500 kitapqumarǵa xızmet kórsetiledi. Túrli tematikalardaǵı hár qıylı kitaplar, oqıw zalları, kompyuter xızmeti, Kitapqumar balajan – pikirlesiw maydanı, book kafe, IT Park hám sanlı kitapxana kúni-tún xızmet etpekte.
Jaslardıń ruwxıy dúnyasın bayıtıw, kitapqumarlıqtı úgit-násiyatlawǵa xızmet etiwshi "Jańa Ózbekstan — jaslar ziya máskanı " tek ǵana Namangan jasları ushın emes, pútkil respublika jasları ushın da xızmet etetuǵınlıǵı wálayat basshısı tárepinen atap ótildi.
Qaraqalpaqstan Respublikası Joqarǵı Keńesiniń Málimleme xızmeti