Joqarǵı Keńes Baslıǵı basshılıǵındaǵı delegaciyanıń Namangan wálayatına ámeliy saparı dawam etti

Ámeliy sapar dawamında delegaciya aǵzaları Davlatobod rayonındaǵı «Fazman» JShJ joybarı menen jaqınnan tanıstı. Bul jerde Germaniya hám Turkiya mámleketlerinen alıp kelingen úskeneler járdeminde tanımalı brend astında kiyim-kenshek islep shıǵarılmaqta. 10 gektar maydanda jumıs baslawshı joybardıń ulıwma bahası 100 mlrd. sumdı quraydı. Kárxana jılına 1 mln. dana tayar ónim islep shıǵarıw quwatlıǵına iye boladı hám jıllıq eksport kólemi 15 mln. dollar bolıwı kútilmekte. Usı tiykarda 3000 jańa jumıs orınları jaratılıwı kútilmekte. Bunnan soń usı rayondaǵı «Yuksalish kishi sanaat zonası jaylasqan "Flat tile" JShJ, "Botir Muhammadali" JShJ, "Santex dizayn" JShJ kárxanaları jumısları kózden ótkerildi. Ulıwma jer maydanı 9,4 gektar bolǵan joybardıń tiykarǵı jumısı keramik kafeli islep shıǵarıw menen baylanıslı. Texnologiya hám úskeneler Qıtay mámleketinen alıp kelingen hám 120 jumıs ornı jaratılǵan.

  Sapar dawamında delegaciya aǵzaları «Jańa Namangan» kishi qalası qurılısı boyınsha ámelge asırılıp atırǵan jumıslar menen tanıstı. Kishi qalanıń 1 mıń 203 gektar maydanında 750 den artıq 9-16 etajlı turaq jay kompleksi, 100 den artıq sawda orayları, mektep, joqarı oqıw orınları hám basqa da bir qatar sociallıq obektler qurılıwı belgilengen. Qurılıs jumısları juwmaqlanǵannan soń 200 mıńnan artıq xalıq ushın barlıq infrastrukturaǵa iye bolǵan zamanagóy qalasha kórinisine iye boladı. Sonday-aq, 68 gektar maydanǵa «Jańa Ózbekstan» baǵı da shólkemlestiriliwi rejelestirilmekte. Joqarǵı Keńes Baslıǵı basshılıǵındaǵı delegaciya Davlatobod rayonındaǵı máhállebay islesiw sisteması boyınsha ámeldegi jumıslardı kórdi. Shamil Ishmakovtıń shańaraǵında qıytaq jerden nátiyjeli paydalanıw boyınsha birǵana úy mısalında balıqshılıq, qusshılıq, pal hárreshilik, qoyanshılıq hám nál jetistiriw hám olarǵa xızmet kórsetiw jumıslarınıń jolǵa qoyılǵan.

  Sonday-aq, Ózbekstan Respublikası Prezidentiniń 27.01.2022-jıldaǵı PQ-104-sanlı qararı tiykarında rayondaǵı bir qatar kóshelerde shólkemlestirilip atırǵan sawda hám turmıslıq xızmet kórsetiw jónelislerine qánigelestirilgen arnawlı kósheler jumısları menen jaqınnan tanıstı.  

Qaraqalpaqstan Respublikası Joqarǵı Keńesiniń Málimleme xızmeti