Partiya Frakciyasınıń gezektegi májilisinde bir qatar áhmiyetli máseleler qarap shıǵıldı
722
Qaraqalpaqstan Respublikası Joqarǵı Keńesiniń kishi májilisler zalında Qaraqalpaqstan Respublikası Joqarǵı Keńesindegi Isbilermenler háreketi-Ózbekstan Liberal-demokratiyalıq partiyası Frakciyasınıń gezektegi májilisi bolıp ótti. Májiliste Qaraqalpaqstan Respublikası Joqarǵı Keńesindegi O’zLiDeP Frakciyası baslıǵı Sh.Otemisov hám frakciya aǵzaları, tiyisli taraw basshıları qatnastı.
Frakciya májilisi kún tártibinde bir qatar máseleler qarap shıǵıldı. Onda Qaraqalpaqstan Respublikası Ekologiya hám qorshaǵan ortalıqtı qorǵaw tarawında 2022-jıl dawamında ámelge asırılǵan jumıslar haqqındaǵı, Ózbekstan Respublikası Ministrler Kabinetiniń 2021-jıl 19-noyabrdegi «Qaraqalpaqstan Respublikasında qánigelestirilgen medicinalıq xızmetlerdi janede rawajlandırıw haqqında»ǵı 695-sanlı qararınıń Qaraqalpaqstan Respublikası aymaǵında orınlanıw barısı haqqındaǵı, “Mektep bilimlendiriw tarawın reformalaw hám rawajlandırıw boyınsha alıp barılıp atırǵan is-ilajlar ónimdarlıǵı haqqında”ǵı, "Qaraqalpaq suw támiynatı" JShJ hám «Hududgaz Qaraqalpaqstan» gaz támiynatı filialı basshılarınıń «Ózbekstan Respublikası Prezidentiniń 2022-jıl 25-oktyabrdegi PQ-408-sanlı qararı talaplarınıń orınlanıwı boyınsha esabatlarına arnalǵan máseleler qarap shıǵıldı. Ótkerilgen májiliste xalıqtı ishimlik suw menen támiyinlew baǵdarında qurılıs-montaj jumıslar ushın 58,2 mlrd. sum muǵdarında (70,3%) qarjılandırılıp, belgilengen obektlerde jámi 51,7 mlrd. sumlıq (rejege salıstırǵanda 62,5%) qurılıs-rekonstrukciya jumısları orınlanǵanı, yaǵnıy, búgingi kúnde Respublikamızdıń 38 máhállesinde 237 km suw tarmaqları kurılıp, 22292 puqaranıń ishimlik suw támiynatı jaqsılanganlıǵı haqqında atap ótildi. Sonday-aq, gaz támiyinatı tarmaqların ońlaw, rekonstrukciyalaw, gaz bólistiriw shaqapshaların ońlaw hám xojalıqlarǵa qosımsha suyıltırılǵan gaz ballonlar ajıratıw boyınsha 9 joybarǵa 846,7 mln.sum belgilenip, bul rejeler tolıǵı menen orınlanǵanlıǵı málim etildi. Frakciya májilisinde deputatlar tárepinen tarawlarda orın alıp atırǵan kemshilikler sın kѳz qarasta talqılandı. Májilis sońında kún tártibindegi máseleler boyınsha tiyisli qarar qabıl etildi hám Qaraqalpaqstan Respublikası Joqarǵı Keńesiniń gezektegi sessiyası kún tártibine kirgiziw ushın tiyisli tártipte usınıs kirgizildi.
Qaraqalpaqstan Respublikası Joqarǵı Keńesiniń Málimleme xızmeti