Intensiv usılda balıq jetistiriwge arnalǵan ámeliy seminar bolıp ótti
Búgin Tórtkúl rayonı “Kwna Twrtkwl” awıl puqaralar jıyınında jaylasqan «Super balıqlar»fermer xojalıǵında Prezidentimizdiń PQ-83-sanlı qararında belgilengen wazıypalardı támiyinlew maqsetinde Qaraqalpaqstan Respublikası Joqarǵı Keńesi baslaması menen «Intensiv usılda balıq jetistiriwdi shólkemlestiriw» boyınsha ámeliy seminar bolıp ótti.
Seminarda respublikamızdıń barlıq rayonlarındaǵı balıqshılıq tarawında jumıs alıp barıp atırǵan fermer xojalıqları hám kárxanalar basshıları, tiyisli taraw wákilleri, balıqshılıq tarawına qızıǵıwshılıǵı bar isbilermenler qatnastı.
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnasıp, elimizde intensiv usılda balıq jetistiriwdi rawajlandırıw baǵdarında ámelge asırılıwı tiyis wazıypalar boyınsha keń túrde atap ótti.
Házirgi waqıtta balıqshılıqqa qánigelesken bul fermer xojalıǵında 250 gektar jasalma suw háwizi bar bolıp, ayrıqsha 10 túrge jaqın, 300 tonna balıq jetistirilip berilmekte. Jergilikli jumıssız 30 puqaranıń bántligi támiyinlenip, jáne 120 tonna shabaq, 130 mln. lichinka jetistirilmekte.
Seminar qatnasıwshıları dáslep xojalıqtıń inkubaciya cexi menen tanıstı. Cexta balıqtı kóbeytiw ushın óz aldına baǵılıp atırǵan ana balıqlar, ata balıqlardı ósiriw, lichinkalardı rawajlandırıw ushın arnawlı úskeneler bar bolıp, qánigeler tárepinen barlıq procesler boyınsha maǵlıwmat berildi.
Sonday-aq, fermer xojalıǵında bar bolǵan jerlerden nátiyjeli paydalanıw maqsetinde Kaliforniya jawın qurtın jetistiriw de jolǵa qoyılǵan. Búgingi kúnde jawın qurtı arqalı diyqanshılıq ushın tábiyiy minerallarǵa bay biogumus alınadı.
Sonday-aq, kórgizbeli seminarda ilimiy xızmetkerler tárepinen balıqshılıq tarawın rawajlandırıwda paydalı hám arzan dafniya sıyaqlı bir kletkalı ósimliklerdi jetistiriw arqalı balıq ushın hám azıqlıq hám kislorod islep shıǵarılıwı haqqında da maǵlıwmat berildi.
Seminar dawamında bolıp ótken jıynalısta respublikamız aymaǵındaǵı imkaniyatlardan paydalanıp, balıqshılıqtı rawalandırıw ushın jeterli múmkishilik bar ekenligi, tarawdı rawajlandırıw jumıssız puqaralar ushın dáramat deregi bolıwı, bazarlarımızdıń rastaların balıq ónimleri menen toltırıwdıń paydası kóp ekenligi taraw qánigeleri tárepinen atap ótildi.
Seminar juwmaǵında qatnasıwshılar taraw mamanlarınan ózlerin qızıqtırǵan sorawlarǵa juwap aldı.
Qaraqalpaqstan Respublikası Joqarǵı Keńesiniń Málimleme xızmeti