Investiciyalıq joybarlar, eksport prognozınıń orınlanıwı hám sanaat zonaları boyınsha jumıslar talqılandı
948
Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev investiciyalıq joybarlardıń iske túsiriliwi, eksport prognozınıń orınlanıwı, sırt el investiciyaların tartıw, iri joybarlardı iske túsiriw hám sanaat zonaları boyınsha ámelge asırılıp atırǵan jumıslarǵa arnalǵan videoselektor májilisin ótkerdi.
Onda ekonomikanı rawajlandırıw hám investiciyalıq joybarlar menen baylanıslı bir qatar áhmiyetli máseleler qarap shıǵıldı.
Ótkerilgen májiliste bıyılǵı jılı 1076 investiciyalıq joybarlardı iske túsiriw rejelestirilgeni, bul joybarlarǵa sektor basshıları, qala hám rayon hákimleriniń barlıq orınbasarları, kommerciyalıq bankler hámde taraw basshıları biriktirilip, qadaǵalap barıw tapsırılǵanlıǵı, biraq, búgingi kúnde iske túsirilgen joybarlar sanı qanaatlandırarlı dárejede emesligi, yaǵnıy, jıllıq reje kem orınlanǵanı sınǵa alındı.
Sonday-aq, eksport rejesi belgilengen prognozǵa salıstırǵanda 2 esege kóbeytilip, 300 mln dollarǵa jetkeriw rejelestirilgenligi, biraq, ótken yanvar-may ayları rejesine salıstırǵanda jámi kútilgenindey ónimler eksportı ámelge asırılmaǵanlıǵı atap ótildi.
Aldınǵı ótkerilgen májilislerde sektor basshıları hám hákim orınbasarlarınıń hár birine keminde jańadan bir eksportyor kárxanalardı jaratıw tapsırması berilgen edi.
Usı tapsırma tiykarında bul juwapkerler basshılıǵında 175 kárxana tárepinen ónimler eksportın ámelge asırıw rejelestirilgen. Biraq, tek ǵana 14 kárxana, yaǵnıy, 8 procenti bul jumıslardı jolǵa qoyǵan.
Bunnan tısqarı, bıyılǵı jılı jámi 80,1 mln dollar tikkeley sırt el investiciya hám kreditlerin ózlestiriw reje etip belgilengen bolsa, sonnan, búgingi kúnge shekemgi rejege tiykar 7 mln 90 mıń dollar tikkeley sırt el investiciyaları ózlestirilip, yanvar-aprel ayları prognozı 101 procentke orınlanǵan. Kegeyli hám Qońırat rayonlarında bolsa usı kúnge shekem birde bir investiciyalıq qarjılar ózlestirilmegen.
Usı jıldıń ózinde 12 iri joybarlardı iske túsiriw arqalı 1370 jumıs orınların jaratıw belgilengen bolıwına qaramay, ayırım orınlarda artta qalıwshılıq jaǵdayları ushıraspaqta.
Bıyılǵı jılı sanaat ónimlerin islep shıǵarıw kólemin 21 trln.sumǵa jetkeriw hámde ósim tempın 114 procentke jetkeriw reje etip alındı. Degen menen, dizimnen ótken 4403 sanaat kárxanalarınan búgingi kúnde 1055 sanaat kárxanaları, yaǵnıy 24 procenti háreketsiz qalmaqta.
Májilis dawamında qala hám rayonlardaǵı kishi sanaat zonaları, jaslar sanaat zonaları, sonday-aq, erkin ekonomikalıq zonalar jumısların nátiyjeli shólkemlestiriw de ayırım basshılardıń itibarsızlıǵı sebepli talap dárejesinde orınlanbastan qalıp atırǵanlıǵı atap ótildi.
Májiliste óz jumısın orınlawda qáte-kemshiliklerge jol qoyǵanı hám belgilengen tapsırmalardı orınlawda nemquraydılıq penen qaraǵanı ushın:
Tórtkúl rayonı hákiminiń orınbasarı – investiciyalar hám sırtqı sawda bólimi baslıǵı;
AK Xalıq banki Tórtkúl rayonı bólimi baslıǵı;
Tórtkúl rayonı Mámleketlik Salıq inspekciyası;
Ámiwdárya rayonı hákiminiń qurılıs, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı intizamıy jazaǵa tartıldı.
Ótkerilgen májilis juwmaǵında bir qatar wazıypalar belgilep berildi.
Qaraqalpaqstan Respublikası Joqarǵı Keńesiniń Málimleme xızmeti