Qayta tikleniwshi energiya dereklerinen paydalanıwdı en jaydırıw hám bar bolǵan energiya dereklerinen nátiyjeli paydalanıwdı shólkemlestiriw máseleleri qarap shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev qayta tikleniwshi energiya dáreklerinen paydalanıwdı en jaydırıw, elektr energiyasınan únemlep nátiyjeli paydalanıw, qurılıs, sociallıq hám basqa da bir qatar obektlerdi kómir janılǵısınan paydalanıwǵa ótkeriw sıyaqlı áhmiyetli máselelerge arnalǵan videoselektor májilisin ótkerdi. Onda Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Húrmetli Prezidentimizdiń 2023-jıl 16-fevraldaǵı 57-sanlı qararı tiykarında sociallıq hám úy-jay kommunal xızmet kórsetiw tarawında hámde ekonomikalıq tarmaqlarda qayta tikleniwshi energiya dereklerin keńnen engiziw, energiya nátiyjeliligin arttırıw arqalı energiya jetispewshiligin qaplaw maqsetinde sociallıq obektler, isbilermenlik subektlerdiń imaratları hám puqaralardıń turaq-jaylarında quyash panelleri hám quyash suw ısıtqıshların ornatıwdı en jaydırıw belgilengen. Usı tiykarda búgingi kúnde respublikamızdaǵı bir qatar obektlerde qayta tikleniwshi energiya dereklerin ornatıw jumısları baslanǵan edi. Qayta tikleniwshi energiya dereklerin paydalanıwdı en jaydırıw boyınsha bir qatar jeńillikler, qolaylıqlar berilmekte. Usıǵan qaramay, búgingi kúnde sociallıq taraw hám mámleketlik uyımlarında quyash panellerin ornatıw rejesi 39,2 procentke orınlanıp, -7500 kilovatlıq paneller, 4,1 mıń litrlik quyash suw ısıtqıshları ornatılmaǵan. Ótkerilgen májiliste bul másele ayrıqsha qarap shıǵılıp, belgilengen reje tiykarındaǵı jumıslardı jedellestiriw kerek ekenligi atap ótildi. Sonday-aq, májiliste energiya resurslarınan nátiyjeli paydalanıwdı durıs shólkemlestiriw boyınsha da bir qatar ámelge asırılıwı tiyis wazıypalar sóz etildi. Elektr energiyası hám gáz támiynatı boyınsha artıqsha paydalanılıp atırǵan jaǵdayları boyınsha energiya resurslarınan nátiyjeli paydalanıwdı durıs jolǵa qoymaǵan ayırım basshılar jumısları sınǵa alındı.

Aytıp ótiw kerek, gúz-qıs máwsiminde birinshi náwbette xalıqtıń hám sociallıq obektlerdiń energiya dereklerine bolǵan talabın qanaatlandırıw boyınsha bir qatar áhmiyetli wazıypalar belgilep alınǵan. Bul baǵdarda teplicalar, qurılıs materialların islep shıǵarıwshı kárxanardı kómir janılǵısına ótkeriw belgilengen. Sonnan, bıyılǵı jılda teplica, cement zavodı, gerbish zavodı hám hák islep shıǵarıw cexları sıyaqlı bir qatar obektlerdi kómirge ótkeriw belgilengen. Tilekke qarsı, bul wazıypalar da talap dárejesinde orınlanbastan qalmaqta. Májiliste belgilep berilgen wazıypalar tiykarında jámi 1555 sociallıq obektlerdiń ısıtıw qazanları inventarizaciyadan ótkerilip, olardan 1483 obekttiń ısıtıw sisteması boyınsha tiyisli joybar-smeta hújjetleri islep shıǵılǵanlıǵı atap ótildi. Sonnan, 620 sociallıq taraӯ obektleriniń yaǵnıy, 287 mektep, 269 baqsha, 64 densaӯlıqtı saqlaӯ obektleriniń ısıtıӯ sistemasın kómir janılǵısına ótkeriӯ rejelestirilmekte. Bul obektlerdi mámleketlik jeke sheriklikke beriӯ boyınsha jámi 34 isbilermen anıqlanıp, kelisimler tayarlanbaqta.

Gúz-qıs máwsiminde energiya jetispewshiliginiń aldın alıw, kómir janılǵısına bolǵan talaptı tolıq qanaatlandırıw belgilep berilgen edi. Ótkerilgen májiliste bul belgilengen wazıypalar boyında ele ámeliy jumıslar baslanbaǵanlıǵı, yaǵnıy, kómir qorları jaratılmaǵanı ayrıqsha tilge alındı. Májilis juwmaǵında tiyisli taraw basshılarına belgilengen tapsırmalardı orınlaw boyınsha tapsırma berilip, aldaǵı ámelge asırılıwı tiyis wazıypalar belgilep alındı.  

Qaraqalpaqstan Respublikası Joqarǵı Keńesiniń Málimleme xızmeti