Joqarǵı Keńes Baslıǵı ózi atalıqqa alǵan jaslar menen ushırastı

Búgingi kúnde elimizde jaslardı ozıq oylı, joqarı bilimli, fizikalıq jaqtan shınıqqan hám ruwxıy jetik insan etip tárbiyalaw, olardıń qábiletlerin júzege shıǵarıw ushın zárúr sharayatlar jaratıw boyınsha bir qatar ilajlar ámelge asırılıp kelinbekte. Húrmetli Prezidentimiz basshılıǵında jaslarǵa itibar mámleketlik siyasat dárejesine kóterilip, barlıq baǵdarlarda olar hár tárepleme qollap-quwatlanıp atır. Prezidentimiz baslaması menen 14-30 jas aralıǵındaǵı jaslar sociallıq jaǵdayı, qábileti hám qızıǵıwshılıqlarınan kelip shıǵıp, úsh kategoriyaǵa ajıratıldı. Mámlekettiń itibarı hám járdemine mútáj bolǵan jaslar Joqarǵı Keńes Baslıǵı, sektor basshıları, ministrlikler menen qala hám rayon hákimleri, sektor basshılarına biriktirildi. Usı tiykarda respublikamızda jaslar menen individual islew sisteması jaratılmaqta. Qaraqalpaqstan Respublikası Joqarǵı Keńesiniń Baslıǵı Amanbay Orınbaev ózi atalıqqa alǵan jaslardıń mashqala hám usınısların tıńlaw maqsetinde bir qatar jaslar hám olardıń ata-anaları menen ekinshi márte ushırastı.

Ótkerilgen ushırasıwda jaslar menen jaqınnan pikirlesilip, olardıń tilek-ótinishleri, sonday-aq, turmısında ushırasıp atırǵan mashqalaları tıńlandı. Atap aytqanda, densawlıǵın bekkemlew ushın ámeliy járdem kórsetiw, bántligin hám ózin ózi bánt etiwin támiyinlew, sociallıq qollap-quwatlaw, oqıw ushın kontrakt pulların tólep beriw, oqıwǵa kiriw ushın arnawlı tayarlaw kurslarında oqıw ushın qarjılay járdem beriw sıyaqlı bir qatar máseleler jaslar hám olardıń ata-anaları tárepinen kóterildi. Sol orınnıń ózinde bir neshe jaslardıń ózin-ózi bánt etiwi ushın tigiw mashinaları, santexnika buyımları, kepserlew úskeneleri jıynaǵı menen támiyinlew boyınsha juwapkerlerge tapsırma berildi. Sonday-aq, jumıssız puqaralardıń bántligin támiyinlew maqsetinde kásip-ónerge baǵdarlaw boyınsha arnawlı kurslarda oqıtıw belgilep alındı. Joqarǵı Keńes Baslıǵı bul mashqalalarǵa sheshim tabıw boyınsha tiyisli taraw basshıları menen birge arnawlı “Jol kartası”n islep shıǵıw hám tez pursatta sheshim tabıw máselesinde tapsırmalar berdi. Ashıq-aydın jaqınnan pikirlesiw usılında ótkerilgen ushırasıwda jaslar ózlerinin pikirlerin emin-erkin bildirdi. Ushırasıw juwmaǵında wazıypalar belgilep alındı.

Qaraqalpaqstan Respublikası Joqarǵı Keńesiniń Málimleme xızmeti