Alıs Beltaw awılında jańa ómir baslanǵan

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taxtakópir rayonındaǵı alıs aymaqlarda awıl xojalıǵı egislik maydanlarınan nátiyjeli paydalanıw boyınsha ámelge asırılıp atırǵan jumıslardı barıp kóriw maqsetinde Beltaw awıl puqaralar jıyını aymaǵında boldı. Onda Ózbekstan Respublikası Prezidentiniń Keńesgóyi T.Xudaybergenov, Qaraqalpaqstan Respublikası Ministrler Keńesiniń Baslıǵı F.Ermanov, Respublika prokurorı E.Tadjiev, Ishki isler ministri B.Torebekov hám basqa da bir qatar juwapkerler qatnastı.

  Puqaralardıń abadan turmısın támiyinlew baǵdarında respublikamızdıń alıs aymaqlarında jasawshı puqaralardı ishimlik suwı menen támiyinlew, olardıń kúndelikli turmısında paydalanıwı ushın suw jetkerip beriliwin jolǵa qoyıw da usı tiykardaǵı jumıslardan bolıp, taynapır burǵılawshı texnikalar járdeminde artezian qudıqların qazıw jumısları Taxtakópir rayonınıń alıs Beltaw APJ aymaǵınan baslanǵan edi. Házirgi waqıtta awıl puqaralar jıyını aymaǵınan úlken kólemdegi artezian qudıqları qazılıp, 500-600 mt tereńlikten suw shıǵarıwǵa erisildi. Sonday-aq, aymaqta jańa egislik jerlerin ashıw maqsetinde 2000 gektar jer maydanı tayarlandı. Bul ushın zárúrli barlıq texnikalar mobilizaciya etildi. Sonıń menen birge, usı egislik maydanlarına tamshılatıp suwǵarıw jolı menen suw jetkerip beriliwin támiyinlew maqsetinde 12 orında jasalma suw saqlawshı basseynlerdi qazıw jumısları alıp barıldı. Nátiyjede jıllar dawamında qarawsız qalǵan egislik maydanları qayta janlandı. Bugingi kúnde jıllar dawamında qarawsız qalıp, tıń bolıp qalǵan atızlar paxta maydanlarına aylandırılǵan. Sonday-aq, xalqımız bazarlarına arzan hám sapalı azıq-awqat ónimlerin jetkerip beriw maqsetinde pomidor, kartoshka, asqabaq, mákke hám basqa da dánli eginler egildi. Suwdan únemlep, nátiyjeli paydalanıw maqsetinde awıl xojalıǵı maydanlarına tamshılatıp suwǵarıw sisteması tiykarında suw jetkerip beriw jolǵa qoyıldı. Bul ámelge asırılıp atırǵan jumıslar nátiyjesinde awıl turǵınları suw menen támiyinlendi, eń baslısı, jańa jerler ashılıwı menen awıl xalqı ushın jańa jumıs orınları da jaratılıp, aymaq turǵınlarınıń turmıs abadanlıǵı jaqsılanıwı ushın bar múmkinshilik jaratıldı. Awılǵa suw kelip, ómir qayta baslanǵanlıǵı búgin hár bir shańaraqtıń úy aldı qıytaq jerlerinde de ayqın seziledi. Sebebi, búgin móldek jerler suwǵarılıp, tegis egilgen. Kimisi baw-baqsha, ovosh eginlerin egip, jazda shańaraq aǵzaları menen birge atızdan úzip alıp dástúrxananı tartıwdı niyet etken bolsa, jáne basqaları miywe nállerin tegis otırǵızıp, jańa baǵqa tiykar salǵan. Awıl házirgi waqıtta jańadan ómir baslaǵan.

 

Qaraqalpaqstan Respublikası Joqarǵı Keńesiniń Málimleme xızmeti