Medicina tarawı xızmetkerleri ushın koncert baǵdarlaması shólkemlestirildi
823
Búgin Qaraqalpaqstan Respublikası Joqarǵı Keńesiniń baslaması menen barlıq Medicina tarawı xızmetkerleriniń mádeniy dem alıwın támiyinlew maqsetinde Ózbekstan mámleketlik filarmoniyası Qaraqalpaqstan Respublikası bólimi tárepinen tayarlanǵan koncert baǵdarlaması bolıp ótti.
Ótkerilgen ilajda Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov shıǵıp sóylep, xalqımızǵa medicinalıq xızmet kórsetiw, puqaralardıń salamatlıǵın bekkemlew, salamat áwladtı kamalǵa keltiriw baǵdarında taraw pidayılarınıń xızmetleri joqarı ekenligin atap ótti.
Aytıp ótiw orınlı, xalqımızǵa sapalı medicinalıq xızmet kórsetiw, nawqaslıǵı bar puqaralardıń densawlıǵın bekkemlew, salamat ana hám bala ideyası tiykarında analar hám balalardıń densawlıǵına ayrıqsha kewil bóliw, erteńgi keleshegimiz bolǵan jaslardıń salamat bolıp kamalǵa keliwin támiyinlew baǵdarında medicina tarawınıń barlıq buwınlarınıń atqaratuǵın xızmeti ayrıqsha.
Ótkerilgen koncert baǵdarlamasında usınday iygilikli jumıslardı inabatlı atqarıp kiyatırǵan bir qatar taraw xızmetkerlerine Qaraqalpaqstan Respublikası Joqarǵı Keńesiniń Minnetdarshılıq xatı hám bahalı sawǵalar saltanatlı túrde tapsırıldı.
Ótkerilgen ilaj kórkem óner hám mádeniyat xızmetkerleri qatnasıwındaǵı koncert baǵdarlaması menen dawam etti.
Qaraqalpaqstan Respublikası Joqarǵı Keńesiniń Málimleme xızmeti