Sociallıq tarawda ámelge asırılıp atırǵan ilajlar hám sheshimin kútip turǵan mashqalalar qarap shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalqımızdıń densawlıǵın bekkemlew, salamat turmıstı támiyinlew hám basqa da bir qatar sociallıq tarawlarda ámelge asırılıp atırǵan jumıslarǵa arnalǵan videoselektor májilisin ótkerdi. Onda Qaraqalpaqstan Respublikası Ministrler Keńesiniń Baslıǵı F.Ermanov qatnastı. Májiliste puqaralardıń salamatlıǵın bekkemlew jolında medicina tarawında zamanagóy texnologiyalardan, telemedicinadan keńnen paydalanıw, jeke menshik medicinanı rawajlandırıw, tarawda xalıqaralıq joybarlı tartıw sıyaqlı bir qatar máseleler sóz etildi.

Sonǵı jılları sanlı medicinanı rawajlandırıw maqsetinde bir qatar unamlı jumıslar ámelge asırılmaqta. Degen menen, barlıq medicina mákemelerinde kompyuterlestiriw jaqsı jolǵa qoyılǵan dep ayta almaymız. Ayırım orınlarda jetkerip berilgen medicinalıq ásbap-úskenelerden nátiyjeli paydalanıw jolǵa qoyılmaǵan. Ayırım orınlarda xalıq sanı kóbeyiwi menen jańa poliklinakalardı qurıw zárúrligi payda bolmaqta. Eń ashınarlısı, 2023-jıldıń 4 ayı dawamında 6 jaǵdayda analar ólimi, hám 168 jaǵdayda balalar ólimi júz beriwine jol qoyılǵan.

Bunnan soń májiliste xalıqtı kerekli dári-darmaqlar menen támiyinlew, farmacevtika kompaniyalarınıń jumısları, ayırım tekserilmegen dári ónimleri sebepli puqaralardıń, ásirese, balalar salamatlıǵına úlken zıyan jetip, hátteki awır aqıbetler júzege kelip atırǵanlıǵı, ónimlerdiń bahaları, sonıń menen birge sanitariya-epidemiologiyalıq jaǵdaylar sıyaqlı áhmiyetli baǵdarlar qarap shıǵıldı. Bunnan soń dene tárbiya hám sport tarawı boyınsha másele kórip shıǵıldı.

Atap ótiw orınlı, sport túrleri boyınsha ótkerilgen Aziya hám jáhán chempionatlarında sportshılarımız tárepinen sıylı orınlardı jeńip alıw dárejeleri ayırım rayonlarda tómen bolmaqta. Sonday-aq, sport túrleri boyınsha ótkerilgen Qaraqalpaqstan chempionatı hám kubok jarıslarında ayırım rayonlardıń saylandı komandalarınıń tolıq qatnasıwı jolǵa qoyılmaǵan. Bunnan tısqarı, búgingi kúnde imkaniyatı sheklengen shaxslardı sportqa qamtıp alıw boyınsha jumıslar talap dárejesinde jolǵa qoyılmay atırǵanlıǵı atap ótildi. Májilis dawamında belgilengen wazıypalar tiykarında Nókis qalasında 2 kóshe hám rayonlarda 1 kósheden tańlap alıp, sırtqı reklama qurılmaların ornatıw ushın investorlar tabıw tapsırması berilgenligi bildirildi. Biraq, búgingi kúnde qala hám rayon hákimleri bul wazıypalarǵa itibarsızlıq penen qarap kiyatırǵanı sınǵa alındı. Joqarıdaǵılar menen bir qatarda, ruwxıy-aǵartıwshılıq jumısların túp-tiykarınan jetilistiriw, bul baǵdarda mámleketlik hám jámiyetlik shólkemlerdiń birge islesiwin kúsheytiw baǵdarında anıq wazıypalar belgilep berilgen edi. Biraq, tarawda alıp barılıp atırǵan jumıslar talap dárejesinde orınlanbay atır. Jazıwshı-shayırlarımız tárepinen sońǵı jılları dáwir qaharmanları boyınsha qunlı shıǵarmalardıń jaratılmay atırǵanlıǵı hám basqa da bir qatar kemshilikler atap ótildi. Bunnan soń jaslar máseleleri ayrıqsha qarap shıǵıldı. Búgingi kúnde jaslar jetekshileri tárepinen 384 kishi biznes subektleriniń iske túsiriliwinde ámeliy járdem kórsetilgen. Biraq, ayırım rayonlarda bul kórsetkish pás dárejede bolmaqta. “Bes baslama olimpiadası”nıń tańlaw hám sport jarıslarınıń máhálle basqıshları tolıq ótkerilmegen. Jaslardıń bos waqıtların mazmunlı shólkemlestiriw, olardı kásip-ónerge baǵdarlaw sıyaqlı jumıslardıń talap dárejesinde bolmay atırǵanlıǵı májiliste atap ótildi. Ótkerilgen májilis dawamında usı sıyaqlı bir qatar áhmiyetli jónelisler sın kóz qarasta qarap shıǵıldı. Tarawda ámelge asırılıwı tiyis wazıypalar, aldaǵı isleniwi kerek áhmiyetli jumıslar belgilep alındı.

Qaraqalpaqstan Respublikası Joqarǵı Keńesiniń Málimleme xızmeti