Улыўма орта билимлендириў мектеплериниң питкериўши жасларына

Qádirli perzentlerim! Bárinen burın, mine, usı quwanıshlı áyyyamda jetiklik shahadatnamasın (attestatın)  qolǵa alıp, erkin ómirge qádem qoyıp atırǵanıńız benen barlıǵıńızdı shın kewlimnen qutlıqlayman. Sizler árman etip kútken 25-may sánesinde mámleketimizdegi 10 mıńnan aslam mekteplerde «sońǵı qońıraw»lar jańlap, derlik 392 mıń jaslarımız qádirdan mektepleri, mehriyban ustazları menen xoshlaspaqta. Ásirese, 12 mıńnan aslam pitkeriwshilerimiz oqıwdı altın, 2 mıńnan zıyatı gúmis medal menen juwmaqlap atırǵanı bayram keypiyatın jáne de arttırmaqta. Álbette, bulardıń barlıǵı tek ǵana siz, áziz perzentlerimiz emes, al biz – ata-analar, ustaz-tárbiyashılar ushın da oǵada quwanıshlı hám tolqınlandırıwshı waqıyalar bolıp tabıladı. Sizlerdi zamanagóy bilim alıp, kásip óner úyrenip, jámiyetimizde múnásip orın iyelewińiz ushın jańalanǵan Konstituciyamızda belgilengen sheksiz imkaniyatlar kútpekte. Sózsiz, óz bilim hám qábiletin Watanımızǵa múnásip perzent bolıwday maqsetlerge jumsawǵa bel baylaǵan sizdey jaslar – Jańa Ózbekstannıń altın fondı, biybaha ǵáziynesi bolıp esaplanadı. Áziz ul-qızlarım! Búgingi kúnde janajan Watanımızdıń rawajlanıwında milliy rawajlanıw dáwiri baslanbaqta. Ásirese, bilimlendiriw sistemasın rawajlandırıwǵa ayrıqsha itibar berip atırǵanımız sizlerge jaqsı belgili. Atap aytqanda, Insanǵa itibar hám sapalı bilimlendiriw jılı dep atalǵan 2023-jılı arnawlı mámleketlik baǵdarlamanı qabıl etip, tarawdıń rawajlanıwın jańa basqıshqa kóteriw, muǵallim hám tárbiyashılardıń jámiyettegi ornı menen abıray-mártebesin arttırıw boyınsha kóplegen ilajlardı ámelge asırmaqtamız. Házirgi waqıtta elimizde 10 mıńnan aslam mámleketlik ulıwma bilimlendiriw mektepleri, Prezident qánigelestirilgen hám dóretiwshilik mektepleri menen birge kóplegen mámleketlik emes, mámleketlik-jeke menshik sheriklik túrindegi mektepler jumıs alıp barmaqta. Tek ǵana ótken jılı 3,2 trillion sum qarjı esabınan 807 mektepte qurılıs hám ońlaw jumısları ámelge asırıldı. Bıyıl bolsa orta bilimlendiriw dárgaylarına 40 mıń zamanagóy kompyuterler, 442 komplekt robototexnika úskeneleri hám basqa da zárúr qurallar jetkerip berildi. «Bárkamal áwlad» balalar mektepleri, balalar hám jas óspirimler sport mekteplerinde keń kólemli ruwxıy-aǵartıwshılıq ilajlar ámelge asırılmaqta, jaslarımız arasında kitapqumarlıqtı kúsheytiw, olardı ádebiyat, kórkem óner hám sport dógereklerine jedel tartıw boyınsha izbe-iz jumıs alıp barılmaqta. Mine, usınday jumıslarımızdıń nátiyjesi sıpatında elimiz oqıwshıları usı jılı regionallıq hám xalıqaralıq pán olimpiadalarda 2 altın, 15 gúmis, 27 bronza medalların qolǵa kirgizgeni, 6 qábiletli qızımız Zulfiya atındaǵı mámleketlik sıylıqqa miyasar bolǵanı bárshemizdi quwandıradı. Sonday-aq, oqıwshalırdı mektep dáwirinde-aq kásipke iye bolıwı ushın 11-klasstı turmısqa jollama beriwshi klass bep belgilep, jaslarǵa keminde eki shet tilin hám isbilermenlerdi tartqan halda bir zamanagóy kásip úyretiw sisteması engizilmekte. Húrmetli pitkeriwshiler! Keyingi waqıtta Ózbekstan ónip-ósip kiyatırǵan sizdey kúsh-ǵayratlı jaslarımız ushın úlken imkaniyatlar mámleketine aylanıp barmaqta. Elimizdegi 210 joqarı oqıw ornı, 330 kásip-óner mektebi, derlik 400 ge shamalas kolledj hám texnikumlar sizlerge ózińiz tańlaǵan tarawlar boyınsha jetik kadr hám tájiriybeli qánige bolıw ushın imkaniyat maydanı bolıp xızmet etedi. Studentlerdiń óndiristen ajıralmaǵan halda oqıp, joqarı maǵlıwmat alıwın támiyinlew maqsetinde 154 joqarı oqıw ornında sırtqı, 15 joqarı oqıw ornında bolsa aralıqtan tálim túri jumıs alıp barmaqta. Sonıń menen birge, dáwir talabınan kelip shıǵıp, jaslardı zamanagóy kásiplerge úyretetuǵın monooraylar, Ay-Ti hám texnoparklerdiń qurılıwı olardıń óz biznesleri menen shuǵıllanıwına xızmet etpekte. Sizlerdiń jámiyette múnásip ornıńızdı iyelewińiz ushın orınlardaǵı hákimlikler, sektor basshıları, máhálle jámiyetshiligi de jaqın járdemshi hám másláhátshi boladı. Bunday iygilikli maqset jolında olardıń esikleri bárqulla sizler ushın ashıq. Sizler jaratılǵan bul imkaniyatlardan paydalanǵan halda, keleshekte elimizdegi zamanagóy óndiris kárxanaları, úlken-úlken firma hám kompaniyalar, mámleketlik hám mámleketlik emes shólkemlerde miynet etip, óz bilim hám tájiriybeńiz menen mámleketimizdiń rawajlanıwına múnásip úles qosasız. Búgin mektepti tamamlap shıǵıp atırǵan jigit-qızlarımızdıń hár biri el-xalqımızdıń mehiri hám itibarında bolatuǵının jáne bir márte atap ótpekshimen. Siz, áziz perzentlerimizdi keleshekte jáne de úlken hám juwapkershilikli shekler kútpekte. Hár birińiz turmısta múnásip ornıńızdı tabıwıńız ushın biz bunnan keyin de bar kúsh hám imkaniyatlardı tolıq iske qosamız. Men siz, áziz perzentlerimnen bir nárseni soraymanÚ tınımsız oqıp, izlenip, zamanagóy bilimlerdi iyelewden hasla toqtamań: Hámiyshe waqıttıń qádirine jetip, turaqlı bilim hám tájiriybeńizdi arttırıp barsańız, qatań belgilep alǵan reje hám maqsetlerińizge isenimli háreket etseńiz, álbette, keleshekte úlken tabıslarǵa erisesiz. Sizlerdiń bárqulla shekti bálent alıp, bir kúsh bolıp háreket etetuǵınıńızǵa isenemen. Sizler onı álbette orınlay alasız. Mine, usınday maqtanıshlı hám juwapkershilikli jolda bársheńizge úlken jetiskenlik hám tabıslar, jeke ómirińizde baxıt hám áwmet tileymen. Sizlerdi mektep bilimlendiriwin tabıslı tamamlaǵanıńız benen jáne bir márte qızǵın qutlıqlayman. Erkin turmıstaǵı qádemlerińiz qutlı hám bereketli bolsın, áziz ul-qızlarım!  

Shavkat Mirziyoev,

Ózbekstan Respublikası Prezidenti