Tarawlar boyınsha belgilengen wazıypalardıń orınlanıwı eń áhmiyetli másele

Qaraqalpaqstan Respublikası Joqarǵı Keńesiniń Baslıǵı Amanbay Orınbaev alıs aymaqlarda ótkerilgen ushırasıwlar, taraw wákilleri menen pikirlesiwler dawamında kóterilgen máseleler hám basqa da usı baǵdardaǵı orınlanıwı tiyis wazıypalarǵa arnalǵan videoselektor májilisin ótkerdi. Onda Qaraqalpaqstan Respublikası Ministrler Keńesiniń Baslıǵı F.Ermanov qatnastı.

  Búgingi kúnde xalqımızdıń hár bir qatlamınıń pikir hám usınısların, múrájatların inabatqa alǵan xalda ámelge asırılıp atırǵan reformalardan xalqımızdıń razı bolıwın támiyinlew baslı maqsetlerdiń biri bolıp sanaladı. Sonlıqtan, orınlarda bir qatar ushırasıwlar, taraw wákilleri menen pikirlesiwler ótkerildi. Bul ushırasıwlarda qatar mashqalalar kóterilip, pikir-usınıslar bildirildi. Tilekke qarsı, ayırım juwapkerler tárepinen bul bildirilgen usınıslar itibardan shette qaldırılmaqta. Atap aytqanda, alıs aymaqlarda ótkerilgen ushırasıwlarda kelip túsken bir qatar múrájatlar orınlanbaǵan. Qońırat rayonı “Qubla Ústirt” elatı turǵınları menen, Taxtakópir rayonı “Qostruba” elatı turǵınları menen ótkerilgen ushırasıwlarda kelip túsken ayırım múrájatlar qanaatlandırılmaǵan. Bıyılǵı jıldıń basında isbilermenler menen ótkerilgen ushırasıwda bildirilgen múrájatlardıń ayırımlarına tek ǵana huqıqıy túsinik beriw menen sheklengen. Olarda kommercialıq bankler menen baylanıslı jaǵdaylar kóbirek ushıraspaqta.

  Usı jıldıń aprel ayında qala hám rayonlarda puqaralar jıyınlarındaǵı kóshe biyleri menen ótkerilgen ushırasıwlarda bir qatar múrájat hám usınıslar bildirildi. Biraq, ayırım basshılardıń óz jumısına nemquraydılıq penen qarawı nátiyjesinde bir neshe mashqalalar sheshimin tappaǵan. Sonnan, Nókis qalası, Taqıyatas, Xojeli rayonlarında bildirilgen máselelerdiń ayırımları tolıq qanaatlandırılmaǵan. Mart ayında jazıwshı-shayırlar hám jurnalistler menen ótkerilgen ushırasıwda belgilengen wazıypalar taraw basshılarınıń itibarsızlıǵı hám óz jumısına juwapkershilik penen qaramawı sebepli óz múddetinde orınlanıwı keshiktirilmekte. Ilimpaz hám professor-oqıtıwshılar menen ótkerilgen ushırasıwdaǵı wazıypalardıń orınlanıwı barısı úyrenilgende joqarı oqıw orınları tárepinen belgilengen wazıypalardı orınlaw boyınsha jumıslar nátiyjeli jolǵa qoyılmaǵanlıǵı anıqlanǵan. “Jaslar dápteri” fondı qarjıları esabınan 2023-jıl yanvar-aprel aylarında “Jaslar dápteri”ne kirgizilgen 1316 studenttiń shártnama tólemleriniń 50 procentti tólep berilgen. Biraq, 1309 student jastıń shártnama qarjıların tólewde ámeliy járdem kórsetiw ilajları keshiktirilmekte. Bunnan tısqarı, jaslardı qollap-quwatlaw baǵdarındaǵı ayırım ótkeriliwi tiyis ilajlardıń orınlanbawı jaǵdayları ushırasıp atırǵanlıǵı da atap ótildi.

  Májilis dawamında kóp kvartiralı turaq jaylarǵa xızmet kórsetiwshi basqarıw servis kompaniyaları menen ótkerilgen ushırasıw boyınsha da ayırım máseleler ashıq qalıp atırǵanlıǵı sınǵa alındı. Májilis juwmaǵında Joqarǵı Keńes Baslıǵı tárepinen juwapkerler eskertilip, múddet belgilendi hám wzaıypalardı qısqa waqıtta orınlaw tapsırıldı.  

Qaraqalpaqstan Respublikası Joqarǵı Keńesiniń Málimleme xızmeti