Ózbekstan Respublikası Prezidenti Shavkat Miriziyoev Italiya Respublikası Prezidenti Serjo Mattarellanıń mirát etiwine bola rásmiy sapar menen usı mámlekette bolıp tur. 8-iyun kúni Italiya Respublikası Prezidentiniń rezidenciyası – Rim qalasındaǵı Kvirinal sarayında Ózbekstan Respublikası Prezidenti Shavkat Mirziyoevti rásmiy kútip alıw máresimi bolıp ótti. Saray aldındaǵı maydanda joqarı mártebeli miymannıń húrmetine húrmetli qarawıl hám atlı gvardiya áskerleri sap tarttı. Kvirinal sarayınıń minarasında Italiya, Ózbekstan hám Evropa Awqamınıń bayraqları kóterildi. Mámleketimiz basshısın Italiya Respublikası Prezidenti Serjo Mattarella kútip aldı. Áskeriy orkestr eki mámlekettiń milliy gimnlerin atqardı. Húrmetli qarawıl baslıǵı mámleketimiz basshısına raport berdi. Prezidentler húrmetli qarawıl qatarı aldınan ótip, rásmiy delegaciyalardıń aǵzaların qutlıqladı. Birgelikte súwretke túsiw máresiminen keyin Ózbekstan Respublikası Prezidenti Shavkat Mirzyoev hám Italiya Respublikası Prezidenti Serjo Mattarellanıń sóylesiwleri bolıp ótti.
Mámleketimiz basshısı sapar menen keliw usınısı hám qızǵın miymandoslıq ushın minnetdarshılıq bildirip, Prezident Serjo Mattarella hám Italiya xalqın kúni keshe ótken milliy bayram – Respublika járiyalanǵan kún menen qutlıqladı.
Italiya Prezidenti Jańa Ózbekstanda ámelge asırılıp atırǵan artqa qaytpaytuǵın reformalardı qollap-quwatlaytuǵının bildirdi hám mámleketimizdiń Oraylıq Aziyada turaqlılıq hám abadanlıqtı támiyinlew baǵdarındaǵı háreketlerin joqarı bahaladı. Mámleket basshıları ekonomikalıq máselelerdi kórip shıqtı. Keyingi jıllarda óz-ara tovar almasıw hám qospa kárxanalar sanı eki esege kóbeydi. Elimizde Italiyanıń Pietro Fiorentini, Terra-nova, Danieli, Imagro, Ansaldo, Saipem sıyaqlı jetekshi kompaniyaları tabıslı jumıs alıp barmaqta.
Prezidentler kúni keshe ótken biznes-forum nátiyjelerin qanaatlanıwshılıq penen atap ótti. Onıń juwmaǵında ulıwma bahası 9 milliard evrodan aslam bolǵan kelisim hám shártnamalardıń salmaqlı toplamına qol qoyıldı. Gumanitar baylanıslardı rawajlandırıwǵa ayrıqsha itibar qaratıldı. Ózbekstan hám Italiyanıń mádeniy-tariyxıy miyrasına baǵıshlanǵan kórgizbe shólkemlestiriwge kelisip alındı. Bunnan tısqarı, bilimlendiriw, arxeologiya, ekologiyalıq qáwip-qáterlerge qarsı gúresiw tarawlarında birge islesiw perspektivaları dodalandı.
Tashkentte Turin hám Piza universitetleriniń filialları tabıslı jumıs islemekte. Izbe-iz úsh jıl Ózbekstan Veneciyadaǵı Xalıqaralıq bienallede qatnasıp kelmekte. Jıl basınan mámleketimizge kelip atırǵan italiyalı turistlerdiń sanı 5 esege kóbeydi. Usı jılı aprel ayınan baslap Tashkent hám Milan arasında tikkeley aviaqatnawlar jolǵa qoyılǵanı turistler aǵımınıń artıwına xızmet etedi.
Jetekshiler regionallıq hám xalıqaralıq áhmiyetke iye máseleler, bárinen burın Awǵanstandaǵı jaǵday boyınsha da pikir alıstı. Awǵan xalqına mánzilli gumanitar járdemdi dawam ettiriw hám arnawlı wákillerdiń másláhátlesiwlerin turaqlı ótkeriw áhmiyetli ekenligi atap ótildi. Ushırasıw juwmaǵında Shavkat Mirziyoev Serjo Mattarelanı mámleketimizge rásmiy sapar menen keliwge mirát etti. Rim qalasındaǵı rásmiy ilajlar baǵdarlamasına muwapıq, Ózbekstan Respublikası Prezidenti Shavkat Mirziyoev Kiji sarayında Italiya Respublikası Ministrler Keńesiniń Baslıǵı Djordja Meloni menen sóylesiw ótkerdi. Mámleketimiz basshısı Italiya úlkesinde kórsetilip atırǵan miymandoslıq ushın shın kewilden minnetdarshılıq bildirdi. Italiya Ózbekstannıń Evropadaǵı áhmiyetli hám isenimli sherigi ekeni, keyingi jıllarda siyasat, qáwipsizlik, ekonomika, energetika, mádeniy-gumanitarlıq tarawlardaǵı birge islesiw jedelleskeni atap ótildi.
Búgin strategiyalıq sheriklik qatnasıqları ornatılıp, mámleketlerimiz arasındaǵı baylanıslar misli kórilmegen joqarı dárejege shıqtı. Bul, álbette, tariyxıy waqıya Ózbekstan – Italiya kóp táreplemeli birge islesiwin bunnan bılay da rawajlandırıwda jańa áhmiyetli basqıshtıń baslanıwı bolıp esaplanadı. Bas ministr Djordja Meloni Jańa Ózbekstanda ámelge asırılıp atırǵan artqa qaytpaytuǵın demokratiyalıq jańalanıwlar hám ekonomikalıq reformalardı tolıq qollap-quwatlaytuǵının jáne olardıń tabıslı bolatuǵınına isenetuǵının bildirdi. Jetekshiler qatnasıqlardı tiykarǵı baǵdarlarda bunnan bılay da bekkemlew perspektivaların hár tárepleme dodaladı.
Sawda-ekonomikalıq birge islesiwdi bunnan bılay da keńeytiw tiykarǵı wazıypa ekeni atap ótildi. Óz-ara sawda hám investiciyalar kólemi keyingi jıllarda eki esege kóbeydi. Metallurgiya, energetika, elektrotexnika hám basqa da tarmaqlarda Italiyanıń jetekshi kompaniyaları menen sanaat kooperaciyasınıń joybarları tabıslı ámelge asırıldı. Ámeliy birge islesiwdi rawajlandırıw ushın úlken imkaniyatlar bar ekenin esapqa alıp, tárepler texnologiyalıq hám innovaciyalıq sheriklik boyınsha qospa joybarlardı alǵa qoyıw áhmiyetli ekenligin atap ótti.
Eki mámleket aymaqları arasındaǵı tikkeley baylanıslardı xoshametlew zárúrligi atap ótildi. Mádeniyat, italyan tilin úyreniw, bilimlendiriw hám turizm tarawlarında birge islesiwdi rawajlandırıw ushın úlken imkaniyat bar ekeni kórsetip ótildi. Bas ministr Ózbekstannıń Oraylıq Aziyada sheriklik, jaqsı qońsıshılıq hám isenim ortalıǵın bekkemlew baǵdarındaǵı háreketlerin qollap-quwatladı hám «Italiya – Oraylıq Aziya» birge islesiw formatın bunnan bılay da rawajlandırıwǵa shaqırdı.
Awǵanstandaǵı jaǵday boyınsha pikir alısıp, awǵan xalqına insanıylıq járdemin kórsetiwdi, sonıń ishinde, Termiz qalasındaǵı logistika orayınıń imkaniyatlarınan paydalanǵan halda dawam ettiriw áhmiyetli ekenligi atap ótildi. Ushırasıw juwmaǵında Ózbekstan Prezidenti Shavkat Mirziyoev Italiyanıń Bas ministri Djordja Melonidi sapar menen elimizge keliwge mirát etti.
Sóylesiwler juwmaǵında Ózbekstan Respublikası Prezidenti Shavkat Mirziyoev hám Italiya Respublikası Ministrler Keńesiniń Baslıǵı Djordja Meloni eki mámleket arasında Strategiyalıq sheriklik qatnasıqların ornatıw haqqındaǵı qospa deklaraciyanı qabılladı. Jetekshiler qatnasıwında kóp táreplemeli birge islesiwdi keńeytiwge qaratılǵan 11 mámleketleraralıq, húkimetleraralıq hám uyımlararalıq hújjetlerdi almasıw máresimi de boldı. Huqıqıy máselelerde, sanaat múlki hám awıl xojalıǵı tarawlarında birge islesiw haqqındaǵı kelisimler usılardıń qatarına kiredi. Sonday-aq, Ózbekstan Respublikası Mádeniy miyras agentligi menen Italiya sawda agentligi arasında restavraciya tarawında, Ózbekstan mádeniyat hám kórkem ónerdi rawajlandırıw fondı hám Italiya Respublikası Mádeniyat ministrligi arasında mádeniyat tarawında birge islesiw haqqındaǵı memorandumlar, sırtqı isler ministrlikleri arasında 2023-2024-jıllarǵa mólsherlengen birge islesiw baǵdarlaması hám 2026-jılǵa shekem mádeniy almasıwlar baǵdarlaması qabıl etildi.
Ózbekstan Respublikası Prezidenti Shavkat Mirziyoev Italiyaǵa rásmiy saparınıń birinshi kúninde BMSh Azıq-awqat hám awıl xojalıǵı shólkemi (FAO) ofisine keldi hám onıń direktorı Cyuy Dunyuy menen ushırasıw ótkerdi. Ózbekstan menen bul áhmiyetli qánigelestirilgen xalıqaralıq institut arasındaǵı birge islesiwdi, bárinen burın, agrar tarmaqtı modernizaciyalaw hám azıq-awqat qáwipsizligin támiyinlew sıyaqlı tiykarǵı baǵdarlarda keńeytiwdiń ámeliy tárepleri de kórip shıǵıldı.
Mámleketimiz basshısı keyingi jıllardaǵı jemisli birge islesiw nátiyjelerin ayrıqsha qanaatlanıwshılıq penen atap ótti. Ózbekstanda FAO ofisi tabıslı jumıs alıp barmaqta. Keyingi bir neshe jılda birge islesiw portfeli úsh esege keńeydi hám búgingi kúnde jer hám suwdan paydalanıw, agrosanaat kompleksi, toǵay xojalıǵı, ekologiya, sharwashılıq hám kóplegen basqa da baǵdarlardı qamtıp alǵan.
Globallıq kólemde azıq-awqat qáwipsizligine qáwip-qáterler kúsheyip atırǵan sharayatta sheriklikti bunnan bılay da keńeytiwden tárepler mápdar ekeni atap ótildi. Azıq-awqat qáwipsizligi, fundamental ilimiy-izertlewler, awıl xojalıǵın sanlastırıw, Aralboyınıń ekologiyalıq mashqalaların sheshiw hám basqa da tarawlarda anıq joybarlar menen ilajlardı ámelge asırıwdı názerde tutatuǵın 2030-jılǵa shekem birge islesiw boyınsha keń kólemli baǵdarlamanı islep shıǵıw tiykarǵı baǵdar sıpatında belgilep alındı.

FAO qáwenderliginde Samarqandta ótkeriletuǵın joqarı dárejedegi xalıqaralıq konferenciyaǵa tayarlıq máseleleri de dodalandı. Bas direktor Cyuy Dunyuy Ózbekstanda agrar tarawdı modernizaciyalawǵa qaratılǵan strukturalıq reformalardı qollap-quwatladı.
Ushırasıw juwmaǵında mámleketimiz jetekshisi bas direktorǵa usı jıldıń iyul ayında bolajaq FAO baslıǵı saylawında tabıslar tiledi. Sonıń menen birinshi kúnnin ilajları juwmaqlandı. Bunnan keyin mámleketimiz basshısı Rimnan Milan qalasına keldi. «Malpense» aeroportında joqarı mártebeli miymandı Lombardiya wálayatınıń baslıǵı kútip aldı. 9-iyun kúni mámleketimiz basshısı bul aymaqtıń gubernatorı menen ushırasadı hám Italiyanıń jetekshi kompaniyaları hám shólkemleriniń basshıları menen dógerek sáwbetin ótkeredi. «ITMA 2023» toqımashılıq mashina qurılısı boyınsha eń iri xalıqaralıq kórgizbege barıwı da rejelestirilgen.