Nókis rayonı jasları menen jaqınnan pikirlesildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonındaǵı belsendi jaslar hám kóshe sárdarları menen ushırastı. Onda jaslarǵa qaratılıp atırǵan úlken itibardıń mámleketlik siyasat dárejesinde alıp barılıp atırǵanı, bilimlendiriw, sport, innovaciya, isbilermenlik sıyaqlı qatar jónelislerde jaslardıń erisip atırǵan jetiskenlikleri haqqında keń túrde sóz etildi.

  Sonday-aq, kóp milletli elimizdiń tınıshlıǵın saqlaw, awızbirshilik hám tatıwlıqtı bekemlew, Watanımızdıń gúllep-rawajlanıwı jolında birgelikte at salısıw boyınsha atap ótildi. Elimizde sońǵı jılları jaslardı hár tárepleme qollap-quwatlaw baǵdarındaǵı jumıslar, student-jaslardıń tólemli-kontrakt pulların, jigitlerdiń mobilizaciyalıq shaqırıw qárejetlerin tólep beriw, járdemge mútáj jaslarǵa materiallıq járdem beriw, úy-jay satıp alıwı ushın subsidiya ajıratıw, isbilermenligin jolǵa qoyıwı ushın jeńilletilgen kredit penen támiyinleniwi sıyaqlı jáne bir qatar múmkinshiliklerdi dawam ettirsek boladı. Bunday imkaniyatlardan paydalanıp, ómirde óziniń ornına iye bolǵan, teńleslerine úlgi tutqanday jaslar rayonda kópshilikti quraydı.

  Ótkerilgen ushırasıwda mine usınday jaslar ushın jaratılǵan kóplegen sharayatlar keń túrde atap ótildi. Ushırasıw juwmaǵında bir qatar belsendi jaslar  "Úmit ushqını" kókirek belgisi hám bahalı sawǵalar menen sıylıqlandı.  

Qaraqalpaqstan Respublikası Joqarǵı Keńesiniń Málimleme xızmeti