Alıs Moynaq hám Qońırat rayonlarındaǵı kóshe sárdarları menen ushırasıw bolıp ótti

Alıs Moynaq hám Qońırat rayonlarındaǵı kóshe sárdarları menen ushırasıw bolıp ótti Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat hám Moynaq rayonlarınıń belsendi jasları hám kóshe sárdarları menen ushırastı. Ushırasıwda elimizde alıp barılıp atırǵan jaslar siyasatı, olarǵa qaratılıp atırǵan úlken itibar, sonday-aq, jaratılıp berilip atırǵan sharayatlar haqqında keń túrde sóz etildi. Haqıyqatında da, búgin jaslarǵa oǵada úlken múmkinshilikler jaratılıp berilip atırǵanı shın mánisinde «Ózbekstan – imkaniyatlar mámleketi» degen pikirdiń ayqın mısalı esaplanadı. Sebebi, óz qabiletin, talantın júzege shıǵarıwdı, isbilermenligin jolǵa qoyıp, onı keńeytiwdi, ilim-pán, bilimlendiriw, kásip úyreniw, óner iyelew, ulıwma hár qanday tarawlarda óz jumısın jolǵa qoyıwdı niyet etken hár bir jasqa barlıq sharayatlar jaratılǵan. Usınday jaratılǵan sharayatlardan nátiyjeli paydalanıp, elimiz jasları arasınan bir qatar jónelislerde jetiskenlikke erisken jaslar, dúnyaǵa belgili sportshılar hám basqa da qatarınıń aldınǵıları jetilisip shıqpaqta. Eń baslısı, usınday jaslar elimizdiń bayraǵın dúnyaǵa tanıtıp atır. Ushırasıw sońında óziniń belsendiligi menen teńlesleri arasında úlgi bolıp atırǵan bir qatar jaslar "Úmit ushqını" kókirek belgisi hám bahalı sawǵalar menen sıylıqlandı.  

Qaraqalpaqstan Respublikası Joqarǵı Keńesiniń Málimleme xızmeti