Joqarǵı Keńes baslıǵı kóshe sárdarları hám belsendi jaslar menen pikirlesti

Búgin Joqarǵı Keńes Baslıǵı Amanbay Orınbaev «Jaslar aylıǵı» sheńberinde Qanlıkól hám Shomanay rayonınıń belsendi jasları hám kóshe sárdarları menen gezektegi ushırasıwın ótkerdi. Bolıp ótken ushırasıwda búgingi kúnde elimizde jaslarǵa degen itibar, olardıń qábiletin hám uqıplılıǵın júzege shıǵarıw ushın jaratıp berilgen sharayatlar, keń múmkinshilikler hám bul imkaniyatlardan nátiyjeli paydalanıw baǵdarında sóz etildi.

Mámleketlik siyasat dárejesine jaslarǵa degen itibar kóterilgen bir waqıtta teńlesleri arasında úlgi bolarlıq nátiyjelerge erisken, barlıq tarawlarda óziniń kúsh-jigerliligi, ayrıqsha minez-qulqı, umtılıwshańlıǵı, eń baslısı jańa baslama hám ideyalarǵa bay ekenligi menen ajıralıp turatuǵın jaslar kópshilikti quraydı. Ushırasıwda jaslarǵa bolǵan usınday itibardıń joqarılıǵı, bunda Qanlıkól hám Shomanay rayonları jasları arasınan da bir qatar aldınǵı jigit-qızlar jetilisip shıǵıp atırǵanlıǵı atap ótildi. Bul eki rayonda da bir qatar millet wákilleri dos, tatıw hám awızbirshilikte jasap kelmekte. Kóp milletli xalqımız arasınan elimizge belgili, bárshemiz maqtanısh tutatuǵınday jaslar kamalǵa kelip, jetilisip shıqqan.

Ushırasıwda sonday-aq, búgingidey globallasıw dáwirinde eń biybaha baylıq bolǵan tınıshlıqtı saqlaw, keńpeyil xalqımızǵa tán awızbirshilikti ele de bekkemlew, jaslarǵa jaratıp berilip atırǵan oǵada keń kólemli imkaniyatlardan nátiyjeli paydalanıp, elimiz rawajlanıwı jolında birgelikte at salısıw kerek ekenligi boyınsha sóz etildi. Bunnan tısqarı, teńlesleri arasında úlgi bolıp atırǵan bir qatar jaslar "Úmit ushqını" kókirek belgisi hám bahalı sawǵalar menen sıylıqlandı.

Qaraqalpaqstan Respublikası Joqarǵı Keńesiniń Málimleme xızmeti