Respublikamızdıń qubla rayonlarınıń kóshe sárdarları hám belsendi jasları menen ushırasıw ótkerildi

Keńpeyillik, miynetsúygishlik, awızbirshilik hám tatıwlıq, bul pazıyletler respublikamızdıń qubla rayonları esaplanǵan Ellikqala, Beruniy hám Tórtkúl rayonı xalqınıń minezine tán jaqsı qásiyetlerden esaplanadı. Jasları da bir-birinen talantlı, qábiletli, umtılıwshań hám miynetkesh esaplanadı. Joqarǵı Keńes Baslıǵı Amanbay Orınbaev búgin respublikamızdıń qubla rayonlarındaǵı belsendi jaslar hám kóshe sárdarları menen ushırastı.

  Ushırasıwda olarǵa mámleketimizde alıp barılıp atırǵan jaslar siyasatı, qaratılıp atırǵan itibar hám kórsetilip atırǵan ǵamxorlıqlar, bir qatar baǵdarlarda berilip atırǵan jeńillikler haqqında aytıp ótildi. Usınday jaratılǵan sharayatlardan nátiyjeli paydalanıp, Ellikqala, Beruniy hám Tórtkúl rayonı jasları arasınan bir qatar jónelislerde jetiskenliklerge erisken jas talant iyeleri, ilim-bilimge qushtar ziyrekler, dúnyaǵa belgili sportshılar hám basqa da qatarınıń aldınǵıları jetilisip shıqpaqta. Eń baslısı, olar mámleketimizde jaratıp berilgen imkaniyatlardan keń túrde paydalanıp atır.

  Ótkerilgen ushırasıwda jaslar menen ashıq-aydın, jaqınnan pikirlesilip, awızbirshilik hám tatıwlıqtı bekkemlew, tınıshlıǵımızdıń qádirine jetiw kerekligi ayrıqsha tilge alındı. Óz náwbetinde, jaslar tárepinen de bir qatar pikir-usınıslar bildirildi hám sol orınnıń ózinde qadaǵalawǵa alındı.

Sonıń menen birge óziniń belsendiligi menen teńlesleri arasında úlgi bolıp atırǵan bir qatar jaslar  "Úmit ushqını" kókirek belgisi hám bahalı sawǵalar menen sıylıqlandı.

Qaraqalpaqstan Respublikası Joqarǵı Keńesiniń Málimleme xızmeti